去唱K 好似去咗開心大發現咁

自從讀完書之後，都冇乜機會約到人唱K，甚至連近幾年嘅K歌係乜我都冇乜留意，剩係知宜家多咗好多韓文歌。我仲成日唱K嘅年代應該仲係Neway鬥加州紅時代，加州紅後來都執埋，後起嘅係Red Mr都冇乜點去過。本來已經有幾年冇去過唱K，吹吹吓水忽然有人興之所致，大家心癢癢一拍即合竟然組到團去唱K。

去到Red Mr，見到門口隔離放咗間劏房咁大嘅玻璃房仔，就係傳說中嘅單人毒撚K房。先唔講單人K房仲貴過其他房嘅收費，個房細到咁真係唔多想入去。而且，仲要係玻璃房，係人都睇到，我諗唔係毒撚都應該會有啲怕醜。據知，呢種單人K房係中國嘅商場好受歡迎，有人認為香港好落後，但我其實唔認為香港嘅人會習慣被人見到自己鳩唱鳩叫囉。以前一人去唱K得到嘅服務其實同幾個人嘅服務一樣，唔明點解對毒撚服務差咗會係一種服務會係一種進步？

毒撚出城，特別大驚小怪。原來宜家嘅K房Wifi接收得好好，我對上幾次去唱K，唱乜已經唔記得，但就記得個Wifi好難連到，去K房上唔到網對毒撚黎講係幾咁大鑊呀你話。相信係時代嘅進步，宜家個Wifi好似收得勁咗好多，呢點係非常感恩的。

毒撚出城，真係大撚驚小怪。我仲諗緊個搖控係邊嘅時候，我個朋友已經可以用電話點緊歌，原來宜家用佢哋嘅app就可以點歌，可以做齊所有搖控做到嘅事，界面仲幾方便。用呢種軟功引人download app其實唔錯，但諗諗吓如果第日玩得再癲啲，連個mic都要用佢個app代勞，第日會唔會真係好似舊登討論嘅會員咁講要帶私家咪唱K？

我嘅年代，係陳奕迅嘅年代，宜家陳奕迅仍然係熱門歌手。但係，據非正式統計，婚禮上最唔受歡迎歌曲第一位嘅《呀牛》竟然搵唔到。再搵搵，連大家都好鐘意嘅黃宗澤都無，祝福聲仲有邊個聽到呀？！老老實實，我寧願唔想韓星係個list度，可唔可以畀返黃宗澤我？就算畀布偉傑首廣告歌我唱都好……

唔知有冇人都會試過呢種情況：我有一個識咗幾年、細過我好幾年嘅朋友，之前未聽過佢唱歌，佢同我講，佢唔識唱歌。然後佢一開聲，我心諗一句：「嘩屌你老母咁撚好聽嘅？！」歌聲看似柔和，但又有穿透力，不剛不柔、亦柔亦剛，根本就係高手黎。相比之下，我應該只係鳩叫級菜鳥。如果我係佢老豆，我應該會帶佢去美國玩America Got Talent，然後借個女上位搵大錢，可惜我唔係。老老實實平日做得yes man多，柒頭都會搵位客套咁讚一讚，但呢次真係由心想讚出黎，不過諗到咁好聽都話唔識唱，又想一邊讚一邊屌鳩人，因為咁樣真係唔係幾老實囉～

如果成日唱K嘅朋友睇到，可能覺得好平常啫唔使咁寫篇野嘛，但對於幾年冇見識過K場嘅毒撚，真係覺得有點增廣見聞。尤其係果啲人成日話自己唱歌唔好但又唱得好好，直頭有少少覺得被欺騙感情唷！各位毒撚手足不妨去體驗吓宜家K場係乜狀況，可能會有更多新發現～

作者：牛肉麵

閱讀後覺得好，請多多讚好及分享～：）