見工都放飛機?祝你一世唔憂做 :)

 

話說,近來返緊份HR類嘅文職,成日都要打電話call啲candidatesss interview,唔做唔知,做落先知,原來個世界有咁撚多蛋散見工會放飛機。

後來我每次收線之前都會補一句:「我會將個interview時間通知返相關department,佢哋會安排同事見你㗎喇,所以記得on time去到喇。」潛台詞就係「你放飛機唔淨係你自己嘅事呀,係嘥撚緊人哋時間呀!」

咁當然都係有人甩底㗎啦。有啲人會send email或者打電話嚟話佢唔舒服、屋企有事,問可唔可以改期,呢啲有交帶嘅小朋友我都會幫佢改期嘅;有啲呢,會通知我佢已經攞到offer,所以唔嚟interview喇,呢啲都係有交帶嘅小朋友,我會同佢講聲恭喜再幫佢cancel個面試。
但嗰啲冇任何通知又唔show up嘅蛋散呢,我一定會打返去問咩事。

有啲醒水嘅呢,就唔聽電話;但聽咗電話嗰啲呢,死硬呀,我仲唔趁機鬧鳩佢。
除咗試過有一個傻仔,約咗呢個禮拜三但記錯咗下禮拜三所以唔小心甩咗底,其他嘅都係真心冇交帶,叫呢啲蛋散做廢青都嫌侮辱埋自己。

我:「之前幫你約咗xx號xx點有個interview㗎,唔知你有冇印象呢?」
散:「哦⋯有呀⋯⋯」
我:「聽講你冇去到個面試喎,點解嘅?」
散:「哦⋯因為我諗諗下都係覺得份工唔係好啱自己⋯所以就冇去到喇⋯⋯」
我:「咁點解你唔send個email或嚟打個電話嚟通知呀?」
散:「Errr 我唔記得咗呀⋯⋯」
我:「你唔記得咗就順手嘥咗interviwer時間喇喎。」
散:「哦⋯唔好意思呀⋯⋯」
我:「我哋公司會blacklist你,以後唔會再介紹工作畀你,希望你順利搵到工,bye-bye。」

雖然唔理佢聽唔聽電話,搵咩藉口都好,我都會blacklist佢。但有啲連唔好意思都冇句,仲要正氣凜然咁重申放飛機嘅理由,我作為一個負責任嘅同事,收得人工就一定要做足嘢,所以都會本住慈悲嘅心,教育下呢啲初出茅廬嘅年輕蛋散。
(嗱,大懵傻仔一發現自己懵咗有即刻say sorry,所以我笑住話咗佢兩句大頭蝦就幫佢安排過第二個時間喇。)

有啲人會歸咎於「宜家啲後生仔」,但咁樣我同嗰啲相信「年輕就是原罪」嘅老嘢有咩分別?
我老闆娘就係呢啲,明明佢自己都只係八十後,又唔係老,都已經會講「宜家啲後生仔唔憂做㗎」,我心諗你試下遲十年出世睇你仲會唔會咁講。
同埋當你一次又一次見到啲香港蛋散旅客,去日本一次過book咗五間餐廳放四間飛機,慢慢搞到人哋唔畀香港人預約,要全部香港人埋單,你就知根本唔關年齡事。可能呢啲面試放飛機嘅小蛋散,佢哋老豆老母就係去日本餐廳放飛機嘅老蛋散。

我希望呢啲見工蛋散真係唔憂做,屋企有條大水喉一直射住射到全身都係,因為呢啲人就算畀佢呃到個interviwer半個鐘,見得成份工,都呃唔到佢上司半年。

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 171288
Date: 2017-10-27 06:03:34
Generated at: 2019-08-20 23:03:30
Permalink: https://www.vjmedia.com.hk/articles/2017/10/27/171288/見工都放飛機?祝你一世唔憂做