生命係譯出嚟嘅——Ribosome

「生命係譯出嚟嘅。」

個題目好似懶有詩意咁，但其實呢句所言非虛，生命的確係譯出嚟嘅，靠嘅係眼睇唔見、喺顯微鏡下都睇唔見嘅譯者——Ribosome。

Ribosome係生物入面非常重要嘅大分子(Macromolecule)。點知佢重要呢？就係橫跨唔同界嘅生物都會見到佢嘅存在。人又好、菌又好、菇又好、霉又好、曱甴又好，全部都必需靠ribosome先至生存到。科學家認為ribosome係一粒古老嘅大分子，由生物形成初期就存在。

咁佢咁重要，究竟有咩用呢？首先好簡單講講生物嘅「中心教條」Central Dogma（冇錯，EVA動畫都有用到呢個專有名詞）。「中心教條」講嘅係資訊傳遞－生命資訊嘅傳遞。我哋寫字係一種傳遞資訊嘅方式，電腦啲1010係資訊傳遞，咁身體入面啲資訊係點傳㗎呢？要介紹三位主角出場：DNA, RNA同Protein(蛋白質)。呢三劍俠有順序嘅關係，DNA生RNA，RNA生Protein。DNA係用作保存同流傳嘅「正本」，所以既穩定又堅固；佢好似黃頁咁龐大，將所有資訊都牢牢記低。RNA係將DNA入面其中一忽抄出嚟嘅「抄本」，短暫而短小，係攞嚟使用同發佈嘅；可大量生產，係視乎需要而決定要抄寫幾多；而且係用完即棄，有如過眼雲煙，一閃即逝。Protein係製成品，係生產線嘅終點，係照住藍圖製造出嚟嘅機械；細胞入面種種活動都係靠蛋白質落手落腳去做；相比起DNA，Protein可謂形態萬千，種類繁多。「中心教條」講嘅資訊傳遞，就係指DNA嘅信息可以抄寫成RNA，而RNA又可翻譯成Protein。

我哋翻譯語言可以用Google translate，又或者靠一個識聽你講嘢、又精通另一種語言嘅人幫你傳譯。生物都有呢種傳譯機器。DNA靠DNA dependent RNA Polymerase抄成RNA；而Ribosome(終於入正題)，就係將RNA譯成蛋白。

Ribosome識得讀一種RNA – messenger RNA (mRNA)，按照上面嘅「密碼」，逐粒胺基酸砌落去。胺基酸就係蛋白嘅組件，好似你玩lego咁，砌幾十粒、百幾幾百粒(通常係呢個長度)、甚至幾萬粒(最大可高達三萬粒)，砌好嘅「胺基酸鏈」就係蛋白質（長嘅叫蛋白，短嘅叫肽 peptide）。

Ribosome個結構好似漢堡包咁，分兩部份，一大一細，中間夾住條mRNA。佢會一路跣過去，一路讀，一路譯，一路砌，直至砌好mRNA上面要傳達嘅信息(所以叫messenger)為止。

不過要提多一點，就係Ribosome仲需要多一樣嘢先翻譯到mRNA。原來Ribosome係唔識一手拎住mRNA，另一隻手就搵啲相對應嘅胺基酸埋嚟連埋佢哋。佢需要一樣叫Transfer RNA (tRNA)嘅嘢。

tRNA係成個翻譯機器嘅重要橋樑 – 佢真係一條橋，一邊駁住粒胺基酸，另一邊有三粒蘊藏住翻譯規則嘅RNA核苷酸(nucleotide)(核苷酸即係RNA嘅組件，正如胺基酸係蛋白組件)。tRNA將兩個系統接駁埋一齊。

RNA有AUGC四個碼，Protein有廿個碼(廿隻胺基酸)，而「中心教條」嘅翻譯規則就係 － 三粒RNA 核苷酸視為一個codon，一個codon可譯成一粒胺基酸。譬如AUG呢三粒可譯成methionine呢隻胺基酸，而UAG可譯成「完結/停止」。呢堆規則可以寫成一個表，叫codon table，就好似字典咁。

雖然mRNA上面係由連綿不斷嘅核苷酸(A, U, G, C)所組成，但我哋可以將上面嘅密碼三粒三粒咁拆開睇，睇成一個個codon。而生物入面亦都有好多款唔同嘅tRNA，各自擁有獨特嘅anti-codon。呢啲anti-codon會好似磁石咁痴落相對應嘅codon度，從而將正確嘅胺基酸帶過去。

Ribosome提供嘅係適當嘅環境，畀tRNA入嚟配對吓。就好似speed-dating咁，合則來不合則去。「配對」係A-site發生嘅事。如果啱key，Ribosome就會將佢哋帶入去內部，再將佢哋速遞過嚟嘅胺基酸(所以叫Transport RNA)連埋一齊。「連結」係P-site發生嘅事。完事就會去E-site，Exit，就此再見。Ribosome亦有份監察翻譯嘅準確性，對唔啱嘅話佢係唔會放人入去。雖然成個翻譯過程牽涉繁複嘅步驟，但係Ribosome翻譯嘅速度一啲都唔慢，每秒砌到20粒胺基酸㗎，即係廿幾卅秒就砌好一嚿蛋白。

圖入面Ribosome嘅3D立體結構並唔係隨手拈來嘅嘢，係經過血汗而得嘅科學發現。淨係發掘出呢個結構已經值一個諾貝爾獎。2009年嘅諾貝爾化學獎就係頒發畀Ribosome結構嘅發現團隊，得獎者2011年仲曾經嚟過香港講talk㖭。

中國晚清譯者嚴復講過：「譯事三難：信、達、雅。」、「信達而外，求其爾雅」。咁睇嘅話，Ribosome算得上係個稱職嘅譯者，佢的而且確做到「信」：按照規則、防止譯錯；「達」：將資訊成功傳遞變成有用嘅蛋白質；「雅」：用翻譯帶嚟雅麗嘅生命啊。

作者：講故盧

講故佬；因姓盧，故可稱為講故盧。每日一定要食書，已經練成行路睇書嘅習慣。《講故佬BookTalker》Facebook Page嘅負責人，會定期將啲冇咗版權嘅中英書籍譯做廣東話。

閱讀後覺得好，請多多讚好及分享～：）