打爆左《Super Mario Odysseys》,發現真正愛Peach公主嘅,唔係Mario呢條仆街,而係Bowser

 

之前我已經整理過 Mario 系列的時間線,發現呢個故事基本上就係「捉姦在床但係又次次遲左少少等條八婆又扮受害者」呢條套路,咁我諗今次《Super Mario Odysseys》都唔會例外啦,大佬呀,唔通Mario又跌入異世界同Zelda(無錯,唔係Link)一齊打異型咩,梗係條女又比人「捉」左,佢又走去「救」佢咁啦。

重溫Mario之前的故事時間線:《其實Mario 頂帽綠到發紫》

點知,今次真係唔同!

今次《Super Mario Odysseys》嘅故事,係一個真真正正、有血有肉嘅愛情故事。

 

——以下劇透 (估唔到連Mario都有要出動劇透線嘅一日)——

 

一開始,即刻係定番劇情,Bowser突然出現,「又」綁架左公主。今次有少少唔同,Bowser話要娶公主,準備左一套禮服,捉埋頂有生命嘅皇冠,撕爛Mario頂帽,將佢打落船,然後搭飛船飛走左。

今次都算做戲做全套,又飛船又盛,唔係無啦啦捉走左求其留低個蛋糕就算。但係阿Peach公主,你可唔可以進修下D演技?邊有人好似你咁,被人綁架綁得個樣咁陶醉?

 

 

咁Mario大叔就係船度飛左落一個叫Cap Kingdom嘅地方,見到有頂有生命嘅帽同佢講野,原來果頂有生命嘅皇冠係佢細妹,你又比人撕爛左頂帽,咁不如一齊出發去救人啦。

 

 

咁頂帽就西利,法力無邊,又可以上身,又可以打人,仲可以變唔同樣添。有頂咁嘅帽唔收錢、唔使請佢食飯一齊出發去冒險,根本就Mario大叔著數晒,必要時又可以好似對Yoshi咁過橋抽板,邊有反對唔同你組隊嘅理由呢?

 

 

咁人地Bowser自己搵錢,自己洗,當然可以買架飛船黎接條女走啦。

但係你呀Mario先生呢,就係無飛船嘅,所以頂帽就諗到一個方法,佢話有隻廢棄飛船Odysseys,佢地可以搵D Power Moon黎整返佢,然後就可以追Bowser啦。

咁遊戲就跟住開始,你會追住Bowser,見到佢「東市買駿馬,西市買鞍韉,南市買轡頭,北市買長鞭」咁去籌備佢嘅婚禮,搶左一件婚紗,一隻介指,一支汽水,仲有一大紮花;真係九牛二虎、盡心盡力咁為左討好呢個Peach公主。

反觀Mario,你做左乜呢?

  • 追住Bowser
  • 安慰下果D比佢搶野嘅人(但係無幫佢地拎返D野)
  • 搵Power Moon幫Odysseys差電
  • 同頂帽一齊毆打Bowser嘅Wedding Planner四人組

 

 

  • 買下新衫、跳下舞、變下2D再跳跳跳

 

 

  • 去New Donk City同舊女友Pauline見面,同2D Donkey Kong敍舊。

 

 

喂!愛?有幾愛呀你?

人地Bowser,係月球Book左間教堂,係世界各地出埋機票錢、搵埋保鑣護送D賓客上月球觀禮。

 

 

你呢?你二仔底死跟,跟跟跟,其實乜都無做過!

之後上到月球,你仲要扮許文強撞開教堂度門大叫「我唔願意!」,你醜唔醜呀?你為呢個女人做左咩?你次次都係去捉姦咋!阻人扑野死左之後春袋會比人BBQ嫁!

打到人地Bowser七個一皮,暴力地破壞人地好事(雖然都睇得出公主其實唔想嫁比Bowser,梗係啦,你估佢得呢兩個咩,出面城成隊兵啦!),真係黑社會咁款。

 

 

之後?居然係超展開,有一堆外星石頭從天而降,Mario用頂帽嘅力量上左Bowser身,揹住公主逃難。

 

 

你睇條女個樣High到!呢個外表係Bowser,內心係Mario嘅人,可能先係佢真正Dream Man,不過,我又唔係佢肚入面條蟲,真係無辦法知道。

 

 

咁終於逃走到去月球表面,Mario同Bowser分返體,Bowser呢個時候都唔死心,畢竟佢花光心血、大灑金錢籌備呢個婚禮,為左佢呢生人最愛嘅女人,最後居然比鬍鬚仔暴力打斷左,於是佢拎起手上紥食人花(講真,我覺得呢紮花好靚,如果佢隻Amiibo係拎住呢紮花就好),衝前向公主表白。

然後呢個世界最唔知醜嘅事情發生啦!

Mario居然隨手係地下執起一朵牽牛花,衝前一齊示愛,叫Peach揀!大佬呀!你知唔知咩叫樣衰呀!人地Bowser環遊全球,拎最好嘅野黎搞婚宴,教堂揀係月球,誠意同愛意滿分;你呢?你做過乜春呀!唔好咁撚肉酸好唔好呀!

 

 

(我之後用Mario跳熔岩自殺左18次懲罰佢,要佢永不超生!)

 

果時我幾驚呢個八婆跟左Mario走呀!呢隻Game好多小朋友玩嫁!如果Peach公主揀左Mario,即係傳遞緊一個訊息,就係呢個世界誠意、努力、心意全撚部都係廢嘅,只有血統同主角威能先係有用。

如果係咁,呢個世界就玩完嫁啦!唔會再有真善美嫁啦!

好在,佢兩個都無要,搶左鬍鬚仔架飛船,決定輕輕的我走了,不帶走一片雲彩!兩條友比人發好人卡,梗係頹晒啦!

 

 

但係,鬍鬚仔咁厚面皮又點會放手,佢貫徹佢嘅哲學,就係「二仔底,死跟!」,跟左上船,仲順手一腳踢暈左Bowser,可憐嘅Bowser,真係「練拳不練功,到老一場空」。

 

——劇透完畢——

 

故事就咁完左,呢個真係一個真真正正、有血有肉嘅愛情故事。我完全感受真正愛Peach公主嘅,唔係Mario呢條仆街,而係Bowser。

 

 

作者:Katarina Prestor

Katarina Prestor
好想寫小說,但寫親都無人睇。當然我唔覺得係自己問題。因為呢個世界上,當問題出現既時候,永遠都係人地有問題。https://www.facebook.com/katarinaprestor

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 171435
Date: 2017-10-30 03:17:05
Generated at: 2020-08-04 10:17:53
Permalink: https://www.vjmedia.com.hk/articles/2017/10/30/171435/打爆左《super-mario-odysseys》,發現真正愛peach公主嘅,唔係mario呢