做人做到阿仙奴咁,其實都幾慘

 

小弟自細睇波就已經捧開阿仙奴。以前既阿仙奴憑住極高既控球比率、水銀瀉地既地面進攻、華麗既足球,曾經喺2003/04球季做過全季不敗既創舉。

但係近年黎英超水平不斷提升,令到成個聯賽變得更加緊湊刺激,而阿仙奴亦都成日輸埋啲唔爭氣既波。

就等我形容一下阿仙奴典型既輸波既情況:

我地通常會見到阿仙奴會有頗高既控球比率,射門次數亦都高,而對方會採取防守反擊既戰術,一般都係會死守唔攻,又或者對方個龍門上哂身,硬係攻極都攻唔入。

到上半場尾段對手通常都會憑住一個反擊或者一球爭議性既十二碼,領先阿仙奴一球入番更衣室。

下半場既阿仙奴更加會踩行turbo,落足力係咁猛攻,但係對方見贏緊一球就會再加強防守,將全部球員龜縮到自己後半場,一有波黎就大腳清走而到最後就會憑住嗰一球波擊敗阿仙奴。

每次睇完啲咁既屎波,作為一個阿迷,真係會成肚火,成晚都訓唔著。

「搞錯呀,噤住人地黎攻都攻唔入!」

「頂,阿記全場十幾廿球on target,人地射左一球on target 就入波。」

正所謂「三分已袋」,你唔好理我點樣贏,仲之我依家就係贏左你,吹咩?

依一種「數據好過對手」既輸波,我近年黎都唔知睇過幾多次,不知不覺就覺得睇阿仙奴輸波就好似同人生一樣咁唏噓。

好多時你已經好落力,做足哂準備去做一樣野。每個人都同你講你掂,輕鬆無問題,但係到頭來唔知邊到殺出個程咬金,打亂哂你啲陣腳,一野就收你皮。

無錯,過後有人會同你講話你已經做得好好,唔緊要,下次繼續努力。但係,從結果上,你知道你就係輸左俾人,感覺就好似同你講緊:過程? Who cares?結果先係最重要。

諷刺既係我諗一般家長都會教自己既小朋友過程其實比結果更加重要依個道理,因為我地可以從過程中吸取經驗,從錯誤中學習,令我地成長。

但係喺依個idea 真係apply落依家社會上咩?

講讀書,有無試過晚晚通頂讀書,放假推哂同啲friend既約會,但到最後考出黎個成績仲差過嗰啲日日上堂唔聽書,到臨考之前嗰一日先黎溫既同學?唔通間學校見到你咁努力讀書,會將你啲F變哂做A?到你畢業之後攞住份溶溶爛爛既CV 去搵工,唔通你喺份CV寫雖然你GPA 爛哂grade,但係其實個人好nice、好勤力,間公司就會俾offer你?

講做野,有無試過你已經晚晚OT,但係老細仍然狠狠咁屌你點解仲未搞得掂啲野?唔通老細見你咁博命做野就會自願分擔埋你既工作?

好啦,到你終於了解到其實依個世界係咁樣運作既時候,你個人無何奈何地會變得非常現實。但係現實得濟又會比人話做乜個人咁現實淨係識得睇住賺錢,但係唔現實既話又會比人話年紀都唔細,仲成日天馬行空咁唔成熟。

成個logic 係非常之矛盾。

大家要知道,個現實就係,學校見你唔合格,你就係唔合格,HR唔俾offer你,你就係無offer,公司見你meet 唔到target 你就係meet 唔到target,正如同足球界一樣,你輸左波就係輸左波。無人會同情你,要怪就怪自己廢。

更加慘既係,為左係依個咁既社會上生存,你除左繼續埋頭苦龫咁工作,你仲有其他選擇咩?做得唔開心就劈炮唔勞?你唔駛交租、唔駛生活咩?Ops, sorry,我唔覺意又現實得濟添。

當身邊所有野都係用個結果去衡量既時候,你真係好難可以說服到自己,過程其實係比結果更加重要。

所以聽落好似好有道理既鋼鍊名句「等價交換」,其實同片入面既鍊金術一樣根本唔會發生喺現今社會,完全係無稽之談。

正如,領隊雲加都講:

“In the modern game we have lost the perspective of what is important and what is not. It is always here and now, and it’s for ever. The now is permanent. The judgment is permanent and for ever. But it is in society, as well”

 

作者:鑄墨

一個看透世事既閒人。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 171573
Date: 2017-11-01 02:54:31
Generated at: 2020-02-26 18:14:41
Permalink: https://www.vjmedia.com.hk/articles/2017/11/01/171573/做人做到阿仙奴咁,其實都幾慘