可唔可以唔好再講「女仔搵工易啲」?

 

近來工作上諸多波折,宜家一邊返份秘書part time一邊搵full time(搵到full time就會寫文講講咩事)。
同男性朋友講電話,

我:「其實我又唔係好擔心搵唔到工,我interview成功率一向都唔錯,差在有幾想做份工嘅啫。」
友:「女仔搵工易啲㗎嘛。」
我:「好睇你搵咩工種㗎喎。」
友:「唔好講咩體力勞動,講啲普通文職,不嬲都係女仔易啲見成㗎。」
我:「我從來都唔覺得自己係因為女性優勢所以搵到工喎。」
友:「梗係啦,因為你係既得利益者丫嘛。」
我:「咁點解宜家職場上女性管理人員嘅數字仲係低男人一截丫?」
友:「你又唔係要搵啲管理職位。」
我:「點解我唔搵啲管理職位?又唔係未做過。」

女人搵junior職位就有優勢過男人,對男人真係好唔公平;到搵senior/managerial職位,又自動assume女人只係期望搵junior職位,你講曬啦!你個龍門搬到去中東都得㗎啦!
宜家咩年代?差啲以為自己睇緊《男女單打戰》仲喺七十年代未走返出嚟。

女性主義嘅本質唔係要突出女權,而係性別平權,但因為坊間有啲害群之馬濫用女權之名苛索女性特權,就搞到女性主義好唔入屋,好似得自己友圍爐咁。
我就向來都不以女性主義者自居嘅,我都知道父權社會長久以嚟嘅枷鎖,唔係一兩句就改變到。但第一步,我哋唔好再同自己以外嘅性別對立喇,停喇好嗎?

喺香港做男人好辛苦,係呀真係好撚辛苦。但喺香港做個唔依附父權嘅女人都一撚樣辛苦㗎咋。
就算同係男人/女人,符合主流審美觀嘅靚定唔靚已經可以係兩種人生,一個唔靚嘅女仔點都辛苦過一個靚嘅男仔。既然天生呢一欄唔夠高分,就唯有喺其他地方幫自己加分。
係唔公平㗎啦,但每個人都有其他人體會唔到嘅辛苦,亦唔係簡單二元地用做男人定女人容易啲就分到。世上係冇絕對嘅平等,所謂平等就係每個人都能作為個體被獨立看待同評價。
當男人概嘆生為女兒身嘅輕鬆之際,其實只不過深化緊父權畀自己嘅詛咒㗎咋,如果唔想下一代嘅仔仔都咁撚辛苦,解放咗自己先啦好嗎?

我唔要求身邊嘅任何男性朋友或者男朋友要做所謂嘅「男人大丈夫」,但我希望佢哋至少係會尊重別人嘅人類。
當佢見唔成工嘅時候,唔係概嘆自己輸畀女人,而係檢討自己輸畀個叻過自己嘅人。
到我見得成工嘅時候,都唔係話「女仔係易啲嘅」,而係欣賞我同恭喜我。

另,
我啲CV從來唔貼相唔寫年齡同性別,本身冇英文名,中文名亦好中性,所以齋睇CV你最多只能從畢業年份估到我大約幾多歲,打電話同見面之前都唔會知我咩性別。
因為我唔想畀呢啲唔關事嘅因素影響我嘅工作機會。

再另,
近來成日聽@Supper Moment嘅《大丈夫》,當然你可以話佢一語雙關,既有中文「大丈夫」嘅男性意識,亦係日文「だいじょうぶ(沒問題)」嘅意思。
但聽者可以選擇如何理解。
我選擇將歌詞中嘅大丈夫,全部都理解成日文意思。因為喺我聽嚟,唔依附父權嘅女人,一樣要擔扛起宇宙、一樣有很多重擔。
性別不只兩種邊種都好,一樣可以同人哋講「大丈夫」,亦一樣可以喺軟弱時問一句「大丈夫って言ってくれない?(可唔可以同我講一句大丈夫?)」

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 172076
Date: 2017-11-10 06:05:22
Generated at: 2019-08-20 23:08:40
Permalink: https://www.vjmedia.com.hk/articles/2017/11/10/172076/可唔可以唔好再講「女仔搵工易啲」?