冇父幹的話,喺香港做咩工作都只係食屎同食好多屎嘅分別。

 

 

近來搵工,坦白講真係唔知搵咩工好。
冇父幹的話,喺香港做咩工作都只係食屎同食好多屎嘅分別。

當然,我有喜歡嘅事、有想做嘅事,但一係搵唔到錢,一係就自己唔夠本事做到搵到錢。
同所有廢青一樣,都喺生計同興趣之間畀咗好多掙扎。
近來睇《校閱女孩.河野悅子》嘅special番外篇,主角悅子都畀好多掙扎。

話說呢,悅子由細到大都好鍾意一本叫《Lassy》嘅時裝雜誌,耳濡目染下,除咗日日都著到隻雀咁出街之外,仲立志要做Lassy嘅時裝編輯。
Apply咗份工七年,終於畀佢如願入到Lassy⋯⋯間出版社,但唔係畀佢去做Lassy,而係要佢做校對,完全唔關Lassy事。
樸實嘅校對工作同光鮮亮麗嘅時裝編輯梗係差天共地啦,但因為悅子係主角嚟㗎嘛,佢梗係唔可以咁容易放棄啦,仲成日不按牌理出牌,顛覆曬傳統嘅校對工作添。而套劇叫「校閱女孩」丫嘛,所以悅子梗係做校對做到如魚得水咁啦。
但悅子雖然身在校對,但依然一心想去Lassy做編輯。

而番外篇呢(係呀頭先嗰啲係正篇嘅劇情嚟),就講到悅子終於如願以償去到Lassy做編輯,不過唔知點解,明明做緊多年來夢寐以求嘅工作,但硬係冇做校閱嗰陣嗰種投入到hi咗嘢嘅狀態,亦得唔到做校閱嗰種要跳起yeah嘅滿足感。
然後佢有個做文學編輯嘅同事,就講咗圖中呢一句--「夢想又不一定等於天職」。
幾經掙扎,最後悅子發現校對先係佢嘅天職,決定返去做校對。而佢對Lassy嘅熱誠亦得到總編欣賞,專登開咗個位畀佢,做Lassy嘅校對。
Happy ending,聽日一定會更加開心㗎你話係咪呀哈姆太郎。

故事係虛構嘅,但情感和掙扎是真的。
做喜歡但未必適合自己嘅工作,初初一定會好有熱誠,但亦正正因為付出嘅熱誠好多,效果又唔成正比,久而久之一定會頹,熱誠逐漸減褪,原先嘅興趣變成統粹嘅工作,連興趣都冇埋;
但做一啲發揮到才能嘅工作,就算初初未必好有熱情,但慢慢會喺冇期望嘅情況下得到成功感,而人類都需要被認同嘅滿足感,久而久之,就算唔會成為興趣,都好可能會由工作變成事業。

當世界都好鍾意歌頌夢想嘅氣氛下,要說服自己,一直追尋嘅夢想其實並唔適合自己,係好撚需要勇氣同智慧。
我都需要靜下來,鼓起勇氣,唔問自己喜歡什麼,而問自己擅長什麼。

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 172189
Date: 2017-11-12 05:55:57
Generated at: 2019-08-20 23:05:51
Permalink: https://www.vjmedia.com.hk/articles/2017/11/12/172189/冇父幹的話,喺香港做咩工作都只係食屎同食好多