名副其實的痴漢磁石

其實我做錯乜嘢，個天成日咁玩我？
我問過身邊住熊本嘅friend，都無人有過咁嘅遭遇。
自從6月時被痴漢跟蹤，報埋警後，一路都好平安。
自己返屋企都會小心好多，留意附近無人先入大廈。
只係有一次放工後見到有個男人喺大廈前徘徊，
為免危險，我特登去一轉超市先。
返嚟見到佢唔喺度，我先入廈返屋企。

到今日返工，如常去停車場準備開車時，
見到有張紙條喺我電單車上面！
我以為係咪我違反咗啲咩rule，例如呢度唔泊得車，
或者係咪我唔小心hi花隔離部單車所以比人屌啦。
望一望，屌！痴線㗎？！？！？！
用膠布痴嘅！！！！！
紙條內容係咩都唔緊要啦，但你要痴都搵張膠紙正正經經痴啦！！！
唔知點解我一見到膠布就會諗起愛滋！
好彩望落應該係未用過嘅膠布嚟嘅⋯⋯

之後梗係即刻睇下紙條寫咩先啦，
「ちなみに
何号室
このマンションの
人ですか？」

睇完個心寒一寒，感覺好似有人望住我咁⋯⋯
但下一秒就feel到自己燥燥地。
屌你，身為日本人，有無禮貌架？

第一，寫紙條唔洗自我介紹先？至少都下款寫返自己個名啦。
第二，一開頭「ちなみに」即係乜意思？？？乜叫做「順帶一提」？？無頭無尾ち乜鬼なみに？
第三，你問我住邊，又唔話我知乜事，唔係覺得我見到就會痴返張紙條答你我住101號室丫嘛？

就算你係痴漢，就當你想溝我（真荒謬.jpg），都至少有返啲禮貌，加幾句開場白話「我留意咗你好耐，想做個朋友」之類啦。
咁樣整張紙條，其實想我點回你？

因為朝早趕住返工，結果搣走住紙就照開車返工。
返到公司就問下啲日本人同事點睇，有咩建議。
你知啦，人在異鄉，唔100%sure當地文化，
可能寫紙條係日本人嘅新式打招呼嚟㗎嘛。
咁我同事都話好恐怖，叫我去同屋主講聲，叫做報告下。

我返到屋企都打比屋主報告，
佢都好好人嘅，唔會嫌我煩同埋嫌我外國人講啲日文1999，
夜媽媽都肯聽我電話講咗8分鐘。

屋主聽完後都好有耐性安慰我，話因為住得近，日後有咩事都可以打比佢。
不過其實佢都幫唔到我啲乜，叫我去報警。

最搞笑嘅係，臨收線前佢問我叫咩名⋯⋯
大佬，你上嚟整燈泡同抽氣扇都上咗幾次，
而且記得我之前有朋友住過，又記得我係外國人，
但唔記得我叫咩名咁搞笑嘅⋯⋯
就算唔記得我個名都可以查下放租紀錄㗎嘛，
唔覺得租咗間屋比我就快一年先問我叫咩名好搞笑㗎咩？

Anyway，結果我應該都唔會去報警㗎啦。
經過上次痴漢事件，發現日本警察都係廢廢地㗎啦⋯⋯（可能平時治安太好啦）
同埋就算報警，除咗留個record外，佢哋根本無其他嘢做到去保障我嘅安全。

最後，補返張紙條嘅翻譯﹕
「順帶一提
邊間房
呢棟大廈
嘅人？」

有無蝶粉可以解解碼？

作者：林璃蝶

林璃蝶，九十後香港博客。活在記憶，迷戀過去，因此喜歡以文字記下已發生的一切。最新文章﹕《張先生，謝謝你來探望我，可是……》、《鳩夢想》、《點解香港人就係唔識欣賞魔術》等。 Facebook專頁：https://www.facebook.com/o.indicum

閱讀後覺得好，請多多讚好及分享～：）