點解你地要咁樣對保方?——寫在意大利出局後

享受人生 / 最新文章綜覽

 

終於,所有我稍為捧下嘅球隊,全部都係外圍賽就出局。2018年嘅世界杯,好似只係知道邊隊係冠軍就得。

估唔到,保方職業生涯最後一年,要過得咁淒涼。祖雲達斯打唔出應有表現,要狂㩒佢平安鐘不在話下,居然,居然,居然,最後一次打世界杯嘅希望,都斷送係自己主場。點解你班仆街要咁樣對保方?

先唔講球證先生點樣顛覆我對足球規則理解(要計十二碼嘅話,唔多,合理嘅起碼每隊各兩個),同首回合一樣,意大利一開波就瘋狂兩翼斬中時,你明白,雲杜拿所謂424,從善如流地轉換至352,只係換湯唔換藥,前場依舊係零配合。全場波,除左上半場最尾一段小高潮以外,意大利攻勢都係疲弱得令人窒息,令人躁底。

完左場波,好多問題係心底,但全部都搵唔到人解答。點解意大利要係對瑞典呢啲北歐隊,踢到90年代嘅英格蘭咁?唔通意大利前鋒有空中霸王?有人好善頂?兩邊橫出波好高質素?北歐人生得特別矮?

點解要出一個係曼聯連波皮都摸唔到嘅達米安;要出一個啱啱傷好,第一回合已經敗家嘅比洛迪;要出一個係祖雲達斯坐多過踢嘅貝拿度斯治,而放棄一個意甲榜首,炙手可熱,可以射破曼城嘅恩薛尼呢?

最諗唔明係,點解雲杜拿呢啲垃圾仲要獻世?

 

 

香港地好多人已經唔睇意大利波好耐,覺得意大利波悶、意大利波冇星,意大利波假(意甲又名意假)。自從捧祖記,睇多左意甲後,意大利國內其實有好多有能力,有潛質嘅球員,唔係真係坊間所講青黃不接得咁緊要。雖然垃圾雲杜拿嘅責任不可推卸,但球員嘅表現一樣係差,係你地親手斷送一個可以令自己更上一層樓嘅舞台。

最後,係fb見到保方賽後訪問流下男兒淚地告別意大利國家隊,真係好心噏,滿以為可以以世界杯作為告別保方嘅最後舞台,可惜事與願違。感謝咁多年黎你為意大利嘅付出,你永遠係我心目中最好最好嘅門將。

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 172309
Date: 2017-11-14 13:37:58
Generated at: 2022-07-07 03:21:04
Permalink: https://www.vjmedia.com.hk/articles/2017/11/14/172309/點解你地要咁樣對保方?-寫在意大利出局後