【塔羅個案】「我想分手,佢話唔好,不如去開房;然後我覺得佢仲愛我」

 

大家睇我啲個案分享嘅時候,應該唔多唔少會認為文中嘅主角都係傻豬豬或者唔夠醒目;不過,又好老實講,無論男女,陷於一段關係入面嘅時候,總會有失去理性嘅時候,輕則係做啲唔 Make Sense 嘅嘢,嚴重嘅咪分分鐘搞到見血(不過,我就好彩無遇上過啲咩命案 Case⋯Touchwood)

今次嘅故事女主角 Sally,廿歲出頭,同個同年紀男朋友拍咗一年幾,已經驚男朋友仲未提出結婚,驚自己嫁唔出;從而再衍生啲負面諗法,例如係男朋友唔上進,唔愛自己,甚至會唔會識第二個女仔等等。

咁大家又唔好覺得 Sally 傻豬豬住,佢第一次拍拖,對於關係或者感情,當然都仲會有大量不切實際同埋唔成熟嘅想法。咁佢原本就黎問「男朋友仲愛唔愛自己」,開牌出黎,無話愛唔愛嘅,個男仔都仲未定性,Sally 對佢黎講,係一個相處算係開心嘅對像,不過最近 Sally 比緊壓力佢,所以有少少想逃避。簡單黎講,係啲好常見嘅情侶相處問題……咁當然啦,廿幾歲仔就比女朋友 Chur 結婚,唔好玩啦,最起碼一點:邊有錢呀?

咁 Sally 聽到之後好失望,或者佢原本想聽到啲好浪漫嘅答案啦,不過我都有同佢講,其實現實入面兩個人相處,真係無咁多 Fantasy 架,唔會有咁多「非妳不娶」,唔會有咁多「命中注定」。因為 Sally 言談之中有透露自己都幾鍾意睇韓劇,咁少女心真係比平常人多咗少少嘅。

Sally 結果都係無問「分唔分手好」呢個問題,因為佢好驚自己都唔細(重申:佢廿歲出頭),飛咗現任,就要做姑婆啦;所以佢都係想考慮多一陣。

兩個星期後,Sally 聯絡我想預約占卜,不過今次想問工作。見面嘅時候,我就好奇問一句「咦?今日唔駛問感情?同男朋友無事啦?」

Sally 露出一個好甜嘅笑容,「神婆,我有聽妳講,去同男朋友講出我嘅憂慮,當時我心諗,如果佢仲係吊兒郎當嘅,我就算啦。點知……」Sally 壓低聲線,「我當時話,如果你呢兩年唔娶我嘅,就分手啦!你都唔愛我嘅!結果佢聽完,同我講,唔好分手啦,不如咁,我,我同你去開房好無?神婆,妳明唔明我嗰刻嘅心情?」

Errr……開、開房?咪住,咁同分手有咩關係?應該有咩心情?我有啲唔識反應,惟有拎起杯熱茶呷咗兩啖,示意 Sally 繼續講。

「佢話帶我去開房呢一下,我覺得佢仲愛我。」Sally 雙眼散發住神采,「我無諗過佢會咁樣挽留我。」

即係咁。如果正常女仔講緊分手,而個男朋友嘅反應係「不如開房囉」嘅話,我諗正常嘅反應,應該係躁底,或者覺得個男仔想執多劑……總之唔慌好嘢。好似 Sally 咁認為「開房=愛」我諗我都好難遇上第二個。

定還是 Sally 份人好原始,覺得男友「用行動表示愛」係最真摯嘅方式呢?咁……是但啦,個客開心咪得,本身個男仔又的確唔係玩佢嘅。不過我最後都係忍唔住同 Sally 講,「妳對愛情嘅睇法都幾唔同,一般人聽到男朋友分手時嗌開房,未必會好似妳咁開心。」

「真係架?我呢個諗法特別咩?」Sally 傻裡傻氣咁笑住,「如果妳想寫,妳可以寫架!」

……咁我真係寫架啦,多謝 Sally 提供素材,祝妳同男朋友開心啦:)

 

【塔羅牌個案分享】

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

  • 【真人真事】「我知道怎樣讓那些女人高潮,我每一次都成功。」 by 阿痞
    阿旦講到一半,也許發現我面無表情,也沒怎麼參與對話(應該是參與不了),突然笑了一聲,吐了一口煙,一臉意味深長地盯著我道﹕「你好冷靜,真是個成熟的女生。我喜歡女生成熟。」雞皮……疙瘩……掉一地………
  • 【塔羅個案】年輕女性客戶努力儲錢,只希望將來間屋買大啲比男朋友擺Gundam by 神婆
    Cherry 由大學畢業後就開始搵我問工作方向,到而家不知不覺第五年了。出野做野無幾耐,佢經朋友介紹認識一個宅宅地嘅男朋友,兩人皆從事金融行業,人工尚算不錯,加上理財有道及各種原因,兩人加起來略有積蓄,近日男友暗示有結婚之意。…
  • 【跳樓啦】唔小心講多左 LEGO跳樓機今年殺到?! by 阿九
    LEGO 過山車熱潮都仲未減退,大家都仲諗緊點安置佢嘅情況下,喺德國嘅 LEGO 銷售網站 Brickmerg […]…
  • 香港人,返工返到傻L左 by 哈姆太狼
    話說呀輝是應屆畢業生,正在一間剛正名的大學裡面做辦公室助理。至於在前文提到他準時下班需要向上司提交合理理由,這不是我編的,而是真人真事。呀輝的工作合約是朝九晚五,但每天都要加班到七點才能下班,最重要的是加班還沒錢。「Quit左佢啦!伏工。」…
  • 女朋友話我當佢係洩欲工具 by 哈姆太狼
    最近女朋友拒絕行房,令我百思不得其解。明明思前想後也沒有得罪這位主子的地方,難道是.....「黎m呀?」我摟著她。以我的經驗,只要我抱她抱得緊緊的,總能大事化小,小事化無。「吓⋯⋯冇呀。」「咁做咩唔想呀?」「唔想咪唔想囉⋯⋯」她把頭撇到了一…
歡迎讚好我們的facebook page,免費資訊源源送上。