無煙花嘅迪士尼,仲係咪good show 嘅迪士尼呢?

(photo via cc Flickr user Ishak J)

 

早前不獲續約又不獲通知,完結咗七年嘅迪士尼cast member生涯冇耐,就見到新聞話出年一月一就係迪士尼煙花last day,亦都係煙花組大部分員工嘅last day,都咪話唔心up。

究竟點解迪士尼需要晚晚放煙花呢?

首先你要知道,迪士尼樂園嘅理念,就係當你穿過門口嗰條隧道之後,你就一步步踏入咗唔同嘅故事裡面,以第一身去經歷同感受呢啲故事。
大家平時睇迪士尼出版嘅動畫同電影有冇睇到最尾?記唔記得最尾會有幾秒鐘嘅畫面,喺個城堡上空劃過一發煙花?冇錯,迪士尼樂園每晚放嘅煙花,就係呼應返嗰個ending scene,象徵所有賓客喺樂園入面玩咗一日,經歷完唔同嘅故事之後,有個圓滿嘅ending。

唔放煙花嘅迪士尼,仲係咪一個good show嘅迪士尼呢?
(當然,你可以話佢因為工程,所以一段時間唔放煙花都無可厚非。雖然唔知擴建完會唔會放返。)

劉永基2010年先加入迪士尼(同我一樣喎),2015年尾先回流返香港,上年一接任CEO就即刻炒咗成百個人工高嘅中高層員工,仲要人簽保密協議先有額外賠償;到宜家因為唔放煙花唔需要嗰班同事,又直接炒咗佢。
嗱,在商言商,你做生意要開源節流,炒人的確係一個辦法,但唔係高手嘅做法囉。

最首先影響士氣就一定㗎啦,你宜家搞theme park生意呀,真係以為員工=數字咩?尤其前線嗰班,日撚日喺出面畀客屌,仲要日撚日幫公司賣笑,人工已經唔係高,再睇住公司咁樣對自己人,越做越冇心機服務質素自然每況愈下,「殷勤有禮」?bye9bye啦,啲遊客玩得唔開心印象唔好,下次嚟香港自然就唔再嚟㗎啦。你啲硬件嘢設計得幾靚幾好玩,冇啲好嘅軟件support一樣發揮唔到最大嘅價值,而軟件質素唔係湊夠員工人頭數就維持到囉。

雖然我唔係營商嘅專才,但既然學生要因材施教,我相信做生意都係,你總不能用管治公營機構嗰套去管理一個有獨特文化嘅theme park。
迪士尼嘅形象就係充滿夢想、快樂同想像力嘅地方丫嘛,炒人又唔幫人安家,除咗破壞公眾形象之餘,又係咪一個有想像力嘅做法呢?「迪士尼都不外如是」,長遠嚟講仲會影響吸納人材,有本事嘅人會頂唔順走;想發揮才能嘅人唔會加入;淨返喺度嘅一係冇競爭力,一係冇動力。

咁佢上年炒咗一批高人工嘅員工之後,係咪平衡返啲收支呢?又唔係喎,炒人之後嗰個年度仲蝕過之前個年度喎。做生意慳錢重要定賺錢重要呢?我實覺得賺錢重要啲嘅,淨係識慳錢又唔識賺錢嘅公司,與其炒啲高人工嘅同事,CEO點解唔炒咗自己呀?低手就做啲低嘅職位攞低嘅人工啦,幫唔到公司賺錢又破壞企業形象仲攞咁高人工,面皮仲厚過Frozen入面啲雪呀。

本身仲打算出年農曆新年返去行下睇下煙花,宜家搞成咁都唔知返唔返去好。

另,
個人睇煙花私心位唔係城堡前面,而係後面嘅幻想世界,灰姑娘旋轉木馬附近。雖然睇唔到城堡投影,但同煙花近好多,望落會震撼幾倍,而且嗰度人少好多。
如果二人同行想sweet啲,小飛象旋轉世界旁邊寧寧舍舍有隻小飛象畀賓客坐上去影相嘅,兩個人坐啱啱好,雖然會畀啲樹遮到少少煙花,但醉翁之意都不在酒㗎啦。但因為每晚名額得一隻小飛象而啲細路好鍾意爬上去,係就早少少去。

又另,
點解係農曆新年呢?年年農曆新年迪士尼都有兩棵大桃花,其中一棵喺美國小鎮大街街尾,即係廣場飯店Plaza Inn前面。我呢兩年都有去街尾嗰棵轉幾轉(另外嗰棵因為位置同設計問題好難轉),啲桃花又真係轉好咗唔少喎,既然靈咪信下囉,係咪?

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 172664
Date: 2017-11-21 15:53:54
Generated at: 2019-08-20 23:02:17
Permalink: https://www.vjmedia.com.hk/articles/2017/11/21/172664/無煙花嘅迪士尼,仲係咪good-show-嘅迪士尼呢?