如何撬人牆腳(絲打用)

情愛點滴 / 最新文章綜覽

 

我唔係撬牆腳專家。我知人有女我都會避忌,一般除咗食飯吹水之外,我會避開做其他嘢。但由於太多囡囡都覺得本人實在好叻媾仔/食仔/搶仔,經常PM查詢。故此就在此講吓啲全天下所有女都會明同唔叫好做到嘅嘢,以後叫佢哋睇文就算。

 

一﹒立flag

你嘅對手係女人。女人係一種妒忌心好重嘅生物相信大家都認同。你要做嘅就係立flag。Flag 主要係明flag 同暗flag 兩類,咁技術嘢一定有分高低。明嘅就係喺任何社交媒體tag 個男仔或者mention 個男仔名或者荷彈實槍wtsapp/ig dm 條女,咁高低就視乎你對手啦。對家係醋罈嘅,而你又知條仔冇報案嘅話,咁好大機會都分手嘅。但你要諗吓條仔係咩人囉,如果條仔氹功好嘅,一定會氹返條女,而嬲鳩你,更加唔會同你一齊。咁你aim at 破壞人哋幸福而從來冇諗過要一齊嘅係congrats 嘅。

但唔好意思,你想一齊嘅話,一定要用暗flag。咩叫暗flag,就係影只有男仔身邊熟嘅女仔/朋友認得嘅嘢,例如鞋、車嘅局部、屋企階磚或袋邊(唔係春袋邊啊屌晒你哋老母!),或者高風險少少嘅同餐廳/同地區打卡。你未必要同條仔有超友誼關係,都做到呢啲,機會成本超低而冇乜風險(知情人/估到嘅人夠少嘛)。而到時人哋呷醋就係正印嘅錯,而製造猜疑同埋感情裂痕只不過係撬牆腳嘅第一步。

 

二﹒保持行車距離

學黃子華所講,「男人要新鮮,女人要保鮮」。你同正印比其實冇咩特別優勢嫁咋。任何人鍾意一個人都唔係只睇一個數值,而係睇所有嘢嘅平均值。一個人鍾意另一個人有好多原因,而佢係一個點嘅人,佢鍾意嘅人都一定有個既定range 喺度。正常狀況下,如果一千分係滿分,你情敵係有七百分嘅,你最多攞到九百分(即係拎多滿分入邊嘅兩成)。咁嗰兩成係點嚟啊?有一方面係你好撚過個正印成截啦,否則人哋都唔會花時間同你有風險咁一齊約出嚟啦。另一樣嘢就係嚟自幻想,即係虛構出嚟嘅好處。如果你比起佢嘅現任更通情達理嘅,佢會諗如果我同你一齊咁我可能有一啲感情問題可以同你solve 而唔係唔夠膽講﹔如果你比起佢嘅現任更加識享受生活嘅,佢會覺得你哋可以一齊周圍去,小小嘢都可以發掘好多驚喜(雖然男人出軌同發掘墳墓比較近似)。

咁新鮮其實同保鮮都係一樣道理啫,唔好擺落雪櫃咁耐囉!!!你可以鍾意呢個男仔,可以力追,但唔該你要尊重佢嘅人生同埋生活。唔好一個頭舂埋去,猛咁chur,等佢有時間回味吓你嘅肉質新鮮(未扑嘢抵壘就難啲肉質新鮮嘅)或者fresh fresh feeling。而學蔡瀾所講,令一條仔掛住你就係俾佢屌完第一次之後唔搵佢,要佢主動搵你(唔好問我條仔唔搵你點算啦,因為真心用完即飛冇戲唱。施主你咁鍾意撬牆腳嘅話都係換個有成功結局unlocked 嘅game 啦)。

 

三﹒supporter 路線

你係做supporter 唔係reporter。記撚得為咗得到呢條仔,你唔好揚出去,要講都係講「我同佢份屬好友,我覺得佢哋兩個先係最襯」。如果有打機嘅,都會知呢個角色面向普遍唔係攻擊性強嘅角色,甚至唔係一個主動性好高嘅角色。唔係要你扮弱者,而係如果不幸條仔真係想跳槽轉機,做你條仔嘅話。你記得要體諒佢會俾人閒言閒語,甚至乎要明白同尊重佢對佢現任嘅愛係恆久忍耐,而你係一定要含撚忍耐嘅。

所以埋門嗰腳,你要做嘅嘢係主動掩飾掩護,錫住佢唔好俾人知道你同佢啲嘢,等佢受壓少啲嘅狀況下轉機。唔好逼佢一定要揀你,而係話佢知你明白佢處境,如果佢唔滿意佢呢段關係嘅,佢可以落手去同女朋友傾吓,或者分手保持單身狀態,最後先係同你一齊。你要講得出口「兩個人一齊,唔係分咗手換個畫就算,而係要一齊拆一齊傾。」呢個唔單只係承上仲係啟下,幫你同佢有機會發展嘅戀情開返一個靚嘅開始。當然對方係啲唔知做乜勁想拖兩邊嘅人而你唔接受嗰陣你就要逼。但老實講,逼返嚟嘅通常都冇好嘢。





後記:寫呢篇文其實唔係真係想大家學撬牆腳。反之係諗一諗一段感情上大家點樣可以做得好啲,例如溝通方式、戀愛距離同埋體諒對方。而更重要嘅係……硬搶返嚟嘅嘢係冇咩好結果,好簡單就係「明白如你要這樣易變心 哪到我害怕」,我都唔想大家「用第三者身份見證 最不可靠是愛情」。然後灰撚晒,以後拍親拖都玩猜猜畫畫,驚頭驚尾嫁嘛。

而如果你係做人正印嗰個,唔好人哋身邊有如遠若近嘅紅顏知己就呷晒醋,因為一段感情總有啲嘢係要同人呻吓,呢個世界唔係男就係女。立明flag 嘅你唔洗擔心唔洗理,因為除非條仔主動同你講分手(講得嗰陣留嚟爭嚟都冇意思啦),否則其實條仔至少都唔介意公開坦白俾你見到啊!但立暗flag 嗰啲你就真係要拎出嚟同條仔講啦 ~佢哋有嘢又好冇嘢又好,坐低訂返條大家都接受到嘅「請勿超越黃線」都係好事嚟。

唔立flag 嗰啲一係叫你條仔鳩痕,一係就你自己多心,but not 人哋撬牆腳囉,唔好成日屈鳩人搶仔啊!!!撬牆腳係一門藝術同專業,事實都唔係咁多人做到,所以冇暗flag 證據真係唔好亂咁講lol

 

作者:Echo

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 173168
Date: 2017-11-30 23:42:03
Generated at: 2020-09-22 10:39:22
Permalink: https://www.vjmedia.com.hk/articles/2017/11/30/173168/如何撬人牆腳(絲打用)