【香港電競代表隊】足球有「足總」，咁電競都應該有「電總」

（容海恩FB 圖）

琴晚（11月30日）人稱電競恩（？！）嘅容海恩議員應邀為電競業界人士，講述一下政府喺鼓勵電競呢方面應該有咩做得更多。電子競技係近年全球各國都銳意發展嘅運動項目，除左令青少年多一個機會發揮潛能，更加係可以創造大量就業機會嘅新興產業。無論從青少年成長，抑或係發展經濟嘅角度，香港政府喺電競呢個議題上面都係責無旁貸嘅。

可惜嘅係，每次傳媒、遊戲業界同埋議會希望香港政府交代電競產業分析報告，政府都只係聲稱已交由數碼港負責此類分析，多年來仍然未聞樓梯響；此外每當社會及議會要求成立香港代表隊，政府總推搪稱，而家缺乏像「香港足總」之類可以代表隊伍及選手的組織。目睹政府嘅沈默被動，容議員話唔可以只等待政府帶頭，佢已經正努力著手團結業界，希望籌組相關總會，下而上咁令政府知道香港代表隊嘅重要。

（容海恩FB 圖）

的確香港嘅現況，相比於南韓乃至台灣，都仍然非常落後，香港嘅選手都只能夠各自喺國際賽場上努力，如果成功獲獎則可能獲個別投資者垂青，資助佢地繼續練習同埋取得佳績，但呢啲比賽機會都係喺香港以外嘅地方；而另一角度睇，就係香港電競產業，包括電競選手嘅質與量，都不足以吸引大企業投資。要打破呢種雞先定係蛋先嘅問題，政府帶頭認可電競成為可以籌組港隊嘅運動項目係好重要嘅，而香港現有嘅電競隊伍、電競選手，當然仲有佢地背後嘅投資者，要多努力交出成績，本地公司籌辦嘅電競比賽要製造就業創造財富，令整個社會都認同呢項運動。

我都搞網嘅，我都知道IT 人乃至電競業界，性格都係比較沈默，好慶幸容議員席間都鼓勵業界與媒體連結，令外界知道電競業界做緊啲乜。

作者：白木乩

聽聞係總編分身，專用來出D 與總編身份不符既膠文

閱讀後覺得好，請多多讚好及分享～：）