頁首一句：制度對被性侵犯嘅女性嘅取態同埋對待，我亦都相當不齒，我亦都贊成無論受害者同疑犯有更多嘅保障（如加設屏風），令性侵犯嘅案件可以係公平而無負擔嘅情景下得到解決。
#Metoo 呢單野最近成為全城熱話，無論運動員定係女藝人，大家都突然鼓起勇氣，同大家訴說以往各種被性侵犯嘅經歷。然後大家就上晒身咁希望用網絡嘅力量為呢幾位女性申冤。但係係大家上頭之前，有啲野可能大家要認清。
1. 現階段，究竟邊個係受害者？
好老實講，係呢個階段，大家都對住呢位教練死咬唔放，如果佢係有做過，我都覺得佢係斯文敗類，人人得而誅之，但係事實上，呢件事係咪真係有發生過，到而家，甚至未來都係好難去蓋棺定論，係我自己嘅角度去睇，我亦都唔覺得一個女仔會為咗上位而衝出黎認比人非禮過，但如果佢只係順粹地希望呢位教練身敗名裂，而去將呢件事擺上枱玩謝人，咁又有無咁嘅可能先？唔好話我陰謀論，之前有一單女仔箍煲不邃，老羞成怒咁告個男仔衰十一又有，再有好耐之前仲佔緊旺嘅時候，有一班藍絲呀嬸話佔旺嘅人非禮又有，孰是孰非，無人會知道。但係以上嘅個案都可能只係呢班可能係受害者嘅人為左私利 （例如感情問題或者政治取態）而以自己嘅身體威逼其他人。兩件事都係無頭無尾，各自表述，點解大家係對住藍絲呀嬸果陣就一笑置之，對住香港嘅運動員就同仇敵愾？又唔會有人話呢啲訕笑會對藍絲呀嬸做成二次傷害？
我唔知大家係網絡福爾摩斯定係金田一，當呢個 #MeToo 嘅Status 一出，大家都即刻衝出黎指住個教練喪鬧，基本上，比人鬧完之後呢個教練個朵都臭晒，基本上無得係呢行立足。如果佢有做過，咁我覺得將佢做過嘅野公開，去證明呢個人誠信有問題，咁樣做絕對符合大眾嘅利益。但係當佢真係無做過嘅時侯，呢單野會似咩呢？試想像你公司啲仆街卸咗隻大到令你以後都唔可以係同一行立足嘅鑊比你（例如做銀行穿櫃桶底），但其實你只係得呢行嘅經驗同埋技能，要你中年轉行，咁你可以點？
到最後，如果真係有人指出其實呢單係一單冤案，會唔會有人出黎同呢位教練道歉？無，因為無人會喜歡承認自己嘅判斷出錯，大家只會堂而皇之咁話：「警察又Hea 做」，「查唔到唔等於無做過」。
同埋再退一步，道歉都已經無用。你話其他行業都話可以比返個牌你繼續做，做教練最緊要就係個名，你一Apply 教學校，人地學校一Search 見到你個底咁花，根據學校呢啲咁怕事嘅機構嘅行政邏輯，基本上你都唔會有咩運行。以呢套咁樣行落去，基本上即使教練有做過定無做過，都已經肯定宣判咗。
講可以好容易，但係講完，人地咁就一世。
講到最尾，我想探討嘅係究竟香港人點睇性罪行呢樣野。傳媒又點樣運用公眾對性罪行嘅定型賣紙。
係香港人嘅mindset 有兩種，一種係覺得一定無發生過，係個女仔想拎著數，另一邊就覺得既然女仔講得出黎，咁一定有發生過。但係到現時為止所得到嘅資訊，究竟係咪Decisive 到可以定到佢有做過定無做過？但係到而家，其實好多人都墮入咗女仔係弱者，所以佢地申冤多數成立嘅假像入面。而同時，有媒體，例如三色台，亦都睇到呢種思路，然後將疑份嘅身份大書特寫。有咁煽情寫得咁煽情，去得到一個幻想出黎嘅道德高地，同埋最實質嘅收視。最後做成嘅結果就係輿論大於真相，好似大家用TVB Fun Fun 賞投個票就知邊個有罪咁。但事實上，呢件事無論係對錯好，刑責好，都有唔同嘅因素去考慮。有發生定無發生，你邊度有Say?
而同時，如果男仔比女仔（或者男仔）性侵犯，香港人對於呢樣野又會有啲咩反應？其實男仔行出黎分分鐘比女仔更難，原因係因為係性接觸入面，好多香港人都覺得男仔獲得嘅一定係快感而唔會係痛楚。社會論調最後分分鐘變成「佔了便宜又賣乖」。的而且確，有男仔係未經同意嘅性接觸入面會有快感而唔去反對，但一旦有男仔係未能預知嘅性接觸入面有厭惡而阻止，亦真係有可能出現以上嘅情況，咁呢種 Blame The Victim 2.0 又可以點？
睇到呢度，可能有人話，咁過左咁多年，邊個可以講到呢件事有無真係發生過？無錯，我講唔到，你講唔到，呢單野根本由呂小姐選擇一開始唔講就已經成為懸案。而從呂小姐嘅動機睇黎，最中立都可以睇到佢係希望各位受害者勇敢啲企出黎去指證呢班侵犯過佢嘅人。而呢個動機嘅背後，就正正說明左呢個社會對性罪行嘅嚴苛同散漫。
嚴苛在於審訊過程對於受害者不近人情，做成二次傷害，嚴苛在於執法人員對執法無道德概念，嚴苛在於社會對性嘅畏懼，將性講成一定唔道德，無論你係咪受害者，你個人一涉及性嘅野就係污穢，就係其身不正。散漫在於大眾對尋求真相嘅散漫，大家都似係為咗出啖氣多過想以理服人。散漫，係在於大家覺得性侵犯呢樣野尤如肥皂劇劇情，可以高談闊論而唔洗理人感受。以上種種原因都成為受害者（無論係性侵定誹榜）唔去提告嘅原因。 講到最尾，我要重申一點，我唔係要話呂小姐立心不良，我真正要鬧嘅人，係廣大食緊花生嘅市民，就係因為你地夠晒三姑六婆係度加把口，成為左受害人先至唔敢坦白嘅其中一個因素。今日你大義凜然咁講，其實正正姑息咗呢班性侵人嘅變態佬進一步作惡。
最後一句總結，性侵犯係一件嚴肅嘅事，唔係一粒花生。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2017年12月4日
