毒撚玩Tinder 真係晒鳩氣!

 

Tinder 係一個以相行先嘅app。你睇啱就拉右邊,睇唔啱就拉另一邊,人揀你你揀人先會傾到計。如果你係毒撚嘅話,老實咁講,你玩Tinder 真係晒鳩氣!

我從來唔反對啲人用Tinder,因為我都聽唔少Tinder 或者類似app遇上真愛甚至真係識到交心朋友嘅故事。但係如果喺一個只要樣都睇唔啱就冇下文嘅platform 嘅話,點解你覺得你又唔夠人靚仔又唔夠人風趣嗰陣可以氹得掂啲女?Tinder 入邊男女比例失衡得咁緊要,你試吓用張正常女仔相開個acc,如果你唔理好醜係咁睇啱人嘅話,我諗半個鐘到一個鐘左右你就會收到好多inbox。試吓傾幾句就知個個都狗衝咁制嫁啦!你係一個毒獨撚嘅話,你憑咩覺得你夠狼群爭呢?

Tinder 本質嚟講同facebook 甚或IG 都差太遠啦!佢唔會俾你睇到一個人嘅生活全貌,亦因為咁先會有人安心喺度尋找炮友嘛~換句說話講佢只係一個俾你擺幾張相同埋幾句嘢,表現自己最charm 最想俾人見到嘅一面,而唔係一個長遠記錄到你係一個點嘅人嘅平台。既然係咁,即係最緊要「快」!

玩Tinder 你要食到女,你喺張相入邊個樣至少要中上,或者有啲好吸引到人嘅嘢先可以令人碌你去右邊。個樣就冇得講啦,但係樣以外嘅話,就例如你個intro 要好風趣,又例如你可以喺幾句pm 入邊就令人覺得你好得,又或者行以本傷人路線(<而我覺得如果現實有資本行到呢條線嘅人,除非自己已有家室或者俾女朋友綁住又要尋求刺激,否則可能平時啲女都多到唔洗玩Tinder?)

成日有啲男仔朋友同我講,「仆街,我身邊有個女仔朋友喺Tinder/Skout 嗰度俾人呃咗隻豬。點解我會呃唔到?」原因就係呢啲app 本質嚟講就係俾有極大優勢嘅人快速地各取所需,或者係俾啲marginal case 嘅人透過一開波嘅想像空間嚟換取距離同時間媾女嘅地方。而唔係俾啲本身現實中差十幾萬光年而又完全唔識玩呢個遊戲嘅人玩囉~

自認純純哋、毒毒哋嘅暖男,其實你哋更適合係現實圈子中傳播信、望、愛,溫暖整個大地,照亮整個地球。Tinder 呢啲咁辛苦只能換嚟挫折嘅遊戲,你哋都係唔好玩啦~~俾你玩到有時可能都係呃你去做facial,到時傷心又傷荷包,最大問題係傷唔到身嘛(假設射精係傷身嘅話)!反正係唔係都係做兵,不如喺現實入邊識返一個立體啲嘅女神,至少你知佢係咩人,至少你可以喺現實見到佢笑一次,見唔到都至少聽到同圈啲人講吓啊……而或者有一日,你由一個小兵,可以去到女神嘅大將軍呢?

毒撚們,你是你本身的毒撚。本質上「你係毒撚」呢件嘢就冇錯嘅。即係好似你係仔,我係女咁,生出嚟就係咁有咩錯啫?但如果事實上我淨係鍾意女仔嘅話,你就唔啱我,我對你就冇興趣亦都好正常。換言之,女係唔洗媾,都唔洗努力去令一個女仔對你有興趣,而係你本身就要搵一個對你有興趣嘅人……亦即係……一個真心真意會at the very beginning 欣賞你係一個毒撚嘅人——無論你成功失敗、有錢冇錢、細唔細心、聽唔聽話,喺佢認識你之後,喺你俾晒signal 之後,就會同你講「我願意」嘅人。

呢個世界上沒有追唔到嘅女,只有條女從來都冇諗過受你媾。
毒撚,其實你很好,只係明白你嘅人未出現啫 

 

作者:Echo

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 173341
Date: 2017-12-04 06:30:29
Generated at: 2020-09-22 12:30:11
Permalink: https://www.vjmedia.com.hk/articles/2017/12/04/173341/毒撚玩tinder-真係晒鳩氣!