關於性侵，我想說的是……之後呢？

性侵這個字眼，如洪水猛獸。

面對性侵的指控，旁觀者只能選擇無限量無底線的支持受害人，因為一但提出「我想知道有冇證據證明」或者想「想企中間保持兩秒距離」，之後好多會話你 blame the victim。香港人最鍾意係所有事未有定案之前歸好邊，最緊要係可以企係道德高地上面去指責其他人，愈快愈好。總之係呢啲事上面，女性一定係受害人，只要有人露出一絲懷疑，就會被一堆鍵盤戰士轟殺，埸面將會異常火爆。

打人，要證據；偷嘢，要證據；殺人，都要證據。偏偏係性侵呢件事上面，真係冇證據都可以判定先。點解明明都係法律，性侵就有特權？性侵係唔係大晒？

今時今日，香港已經去到一個係女人都可以告人性侵嘅地步。而且，香港法律對男性真係少少保障都冇。

好似之前幼教醉酒懷似被強姦顏射咁，審得愈深，再比人踢爆原來事主在受害人好好傾，又主動摸事主，走嘅時候仲要冇醉，又話係因為現任有錢男朋友唔滿意佢唔係處女（好似係）。事件到現階段就因為陪審團未能達到一致判決，所以要重審。但係事主已經比人開名開樣，他人其他人一但 SEARCH 佢個名，就自然會搵到呢單新聞，睇完標題，又邊個會理到底結果係點？

性侵真係好恐怖，恐怖在一但有一個男人被人指控佢性侵，都係被審先判。男方嘅事業、家庭同人格已經係冇證據未-判決嘅情況之下，被完全謀殺，而且係永不翻身。班道德人又唔會係事後向被屈者道歉，佢哋更加會本著「我都係想為件事好」、「咁嗰時冇咁多資料」、「我點知咁多」，啱呀，唔知咁多嘢，又唔係當時人，點解又會二話不說義憤填膺就去伸張正義？

說到底，呢班網上道德人真係貪口痕，總之有乜事就講咗先，伸張咗正義先，事後有乜事都唔關佢哋事，因為佢哋根本唔洗負出乜代價。

反觀今次事件，受害人係 FACEBOOK 講完之後，到底想達到乜目的？

想人去重視兒童性侵？去留意香港體肓界可能有大量未被發現嘅性侵事件？不論係點，最好結果都係去報警，尋求警方協助，又或者用另一個另好嘅方法去公佈呢件事。

而我個人覺得，冇證據嘅指控，只不過係私怨同是非。

當然，如果教練冇做過，就應該立即出嚟澄清，而呢個就係 FACEBOOK 唔開名公佈事件嘅最大問題。冇開名而有教練出嚟澄清，對香港人嚟講就係此地無銀三百兩，唔係身有屎又點會急急腳出嚟講嘢？

所以最難滿足係香港人係網上嘅行為，嗰一種完全無視理性證據邏輯，單純地企係道德高地去指控其他人嘅行為。

到最後，學校教練被炒（唔知係唔係當年嗰個），香港人繼續向道德高地爬行，大家都好留意有體育界人士被人性侵但係唔想同警方合作調查，咁，之後呢？

作者：Tabristory

文壇小賤人Tabristory

閱讀後覺得好，請多多讚好及分享～：）