【塔羅個案】三字頭 OL:「我認為公司五個男同事都想追我」

 

人係好有趣嘅,唔知點解每年臨近聖誕,就越介意自己身邊有無伴侶,越係覺得「街裡愛人一對對」呢件事係督眼督鼻,所以呢排特別多單身嘅朋友黎問感情。

Polly 今年三十出頭,佢黎到舖頭嘅時候,我都覺得有少少難以招架,因為佢不停講嘢。

「你好,今日我有咩幫到…」
「我呢,我有好多嘢想知,不過我今日想問咗感情先;我有幾多時間架?妳之後有無客?我可以講幾耐?我為咗節省時間呢,我有寫低嘅……」

Polly 講嘢都幾快幾大聲,我示意佢細聲少少時,「吓我正常音量黎架啦喎,同埋我覺得自己算係咁,我講嘢無懶音,嗰個叫咩話?字乜圓話?」

我無奈,Polly 幾乎完全唔比我說話嘅機會,我惟有默默咁答咗佢一句「字正腔圓」。

咁呢位字正腔圓嘅 Polly 姐,到底有咩感情問題呢?佢話,佢身邊有五個對象,五個都係同事;因為佢「明顯感受到對方對自己嘅好感」,唔知邊個先係真命天子……

「為咗方便妳理解呢,我將我同佢地五個人嘅人物關係寫咗列表出黎。」

Polly 入咗舖頭十分鐘,我都仲未有機會講一句完整嘅說話,而我望住面前兩張寫滿洋洋千字嘅 A4 紙,唔知點解有少少沮喪:你黎問牌就問牌啦,寫乜嘢列表呀?點解無啦啦要我睇字呀?我知咁多嘢托呀?直情問我 ABCDE 五個男仔邊個有發展機會咪得囉!

我忍住反白眼,比面 Polly 拎起兩張紙 Scan 咗兩眼,已經想倒抽一口涼氣!呢份列表寫咗五位男同事嘅「年紀」「星座」「職位」「部門」「估計月薪」「大學學位」,根本成份 CV 咁!然後 Polly 仲寫咗自己對每個人嘅「欣賞」「不滿」「有咩感覺」,真係去見工都無咁詳細,定 Polly 以為我係做姻緣一線牽呀?

我推開兩張紙,對唔住都要講句:我真係有少少唔耐煩,「其實直接開牌就得,我唔需要知道佢地嘅私人資料。」

見我唔係好欣賞佢嘅傑作,Polly 好直接咁望住我扁嘴……是但啦,我扮見唔到。快快手叫佢開五隻牌代表五位男士,原本我係想睇下佢地各自對 Polly 係咩感覺嘅,點知副牌開咗出黎,我打咗個突,因為五位人選入面,無一位係對 Polly 有好感!嚴格少少黎講,當中仲有兩位係討厭呀 Polly 姐添!點解會咁架?Polly 姐明明信心滿滿、誓神劈願咁認定自己裙下有五隻兵架喎!

喺我思考緊嘅時候,Polly 姐好緊張咁話,「邊個先係真命天子呀?」

呢個時候,我就當然忍唔住問佢,「其實你話人地對你明顯有好感,佢地係做過啲咩黎?」我以為以為人地係送過花呀、朱古力呀,或者狂短訊、約食晚飯咁樣,但係,原來真相係呢,呢幾位男同事呢,分別可能曾經幫 Polly姐推過門啦、換過水啦、朝早買過早餐(但其他同事都有)、有時行過 Polly姐個位會吹吓水⋯⋯

然後無啦。連曖昧嘅短訊都無呀。然後 Polly 姐見有男同事埋身,就覺得人地想追自己呀。

「神婆,咁我揀邊個好啫?」

我沒好氣,「即係咁,Polly 呀,其實五位男士都唔得,唔係話佢地個人唔得,係無發展機會嗰種唔得喎!人地對你友善,唔代表人地想追求妳架噃!其實⋯即係好似 A 君咁啦,佢真係當你同事架咋!」

「Oh. Oh really. 」Polly 呆一呆,係咁望住佢手上面張「五男列表」,開始自言自語:點解會咁嘅?明明佢地咁對我嘅?係咪開錯牌呀?

嗱,其實我由 Polly 坐低嗰吓開始,我都對佢印象麻麻架啦;而佢拎張列表出黎嗰下,我直情係心諗做乜勁?結果,佢問完第一條問題之後,發現自己食白果,佢就坐喺度自言自語,一路打量我,一路暗示佢想聽到啲佢想要嘅答案。

我就唔想評價 Polly 究竟個人係咪有問題,不過佢無啦啦扁嘴坐喺度唔走,又唔問問題,我就躁躁地啦,大佬我聖誕月份生意最旺,妳發花癲唔緊要,妳唔好阻住我做生意吖?

我最後忍唔住送客,Polly 不甘情願咁樣擺低錢,直至離開嗰吓,都仲「點解我無男朋友嘅」咁樣不斷碎碎唸緊。

今日嘅小小分享就到呢度為止,大家睇到呢度,又認為 Polly 嘅問題出喺邊度呢?

 

【塔羅牌個案分享】

「我想分手,佢話唔好,不如去開房;然後我覺得佢仲愛我」

個客認為喺放工時間嘅金鐘地鐵車廂入面睇英文書會增加異性緣

你話想生仔我咪唔避孕囉,我家下有咗你就叫我落?

有個客為咗受男人歡迎,走去養狐仙

著名大學 Year 1 學生問「我點先可以做到 Hall Queen」

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

  • 【真人真事】「我知道怎樣讓那些女人高潮,我每一次都成功。」 by 阿痞
    阿旦講到一半,也許發現我面無表情,也沒怎麼參與對話(應該是參與不了),突然笑了一聲,吐了一口煙,一臉意味深長地盯著我道﹕「你好冷靜,真是個成熟的女生。我喜歡女生成熟。」雞皮……疙瘩……掉一地………
  • 【塔羅個案】年輕女性客戶努力儲錢,只希望將來間屋買大啲比男朋友擺Gundam by 神婆
    Cherry 由大學畢業後就開始搵我問工作方向,到而家不知不覺第五年了。出野做野無幾耐,佢經朋友介紹認識一個宅宅地嘅男朋友,兩人皆從事金融行業,人工尚算不錯,加上理財有道及各種原因,兩人加起來略有積蓄,近日男友暗示有結婚之意。…
  • 【跳樓啦】唔小心講多左 LEGO跳樓機今年殺到?! by 阿九
    LEGO 過山車熱潮都仲未減退,大家都仲諗緊點安置佢嘅情況下,喺德國嘅 LEGO 銷售網站 Brickmerg […]…
  • 香港人,返工返到傻L左 by 哈姆太狼
    話說呀輝是應屆畢業生,正在一間剛正名的大學裡面做辦公室助理。至於在前文提到他準時下班需要向上司提交合理理由,這不是我編的,而是真人真事。呀輝的工作合約是朝九晚五,但每天都要加班到七點才能下班,最重要的是加班還沒錢。「Quit左佢啦!伏工。」…
  • 女朋友話我當佢係洩欲工具 by 哈姆太狼
    最近女朋友拒絕行房,令我百思不得其解。明明思前想後也沒有得罪這位主子的地方,難道是.....「黎m呀?」我摟著她。以我的經驗,只要我抱她抱得緊緊的,總能大事化小,小事化無。「吓⋯⋯冇呀。」「咁做咩唔想呀?」「唔想咪唔想囉⋯⋯」她把頭撇到了一…
歡迎讚好我們的facebook page,免費資訊源源送上。