【塔羅個案】客話「我想做你徒弟,我學師期間你免費幫我占卜吖!」

文教 / 最新文章綜覽

 

 

耐唔耐就有人問我「有無開班」「學費幾錢」之類嘅問題。其實都想借此機會澄清一點,學塔羅最基本的是牌義,牌義要學識唔難,只要你勤力,死記硬背點都會記得住;但係,要點樣做到將牌義應用喺唔同情境、又點樣可以一開牌就馬上將個答案解釋比人聽,呢一點先係難處所在,因為多多少少講天份架,加上我時間有限,所以教牌一向不在我考慮之列。

不過,開業三年,我都遇上過唔少有趣嘅網友,例如係:從來未黎過搵我占卜,招呼都唔打,Inbox 劈頭第一句就話「我想拜師,條數點計」嘅人。

喂阿哥,你黎都未黎過幫襯,你又知我準架啦?你唔比我係一個好識包裝自己嘅神棍嘅!同埋,拜師拜到好似你咁 Chill 嘅人,我都真係第一次見,咩「條數點計」,我家下欠你麻將定天九數呀?我信譽良好,從來無借貸款無差卡數,做乜用語咁江湖呀?我驚架~

聽完上面嗰種,係咪已經覺得佢傻傻地?其實唔係,對我黎講無乜嘢架咋,始終人地用 Inbox 搵我,就算佢江湖都好,我咪禮貌覆句「我唔收學生呀~謝謝你」就當處理咗件事;真正痴線嘅,係我以下黎講嘅呢一種。

事緣是咁的。Rebecca 話有事業前途嘅問題,約我占卜;佢預約時講嘢正正常常,又準時黎到舖頭,我原本對佢印象唔錯架,因為我最憎人 No Show(即刻 Blacklist 你呀,哼!)其次係遲到,所以準時的客人都是好孩子。

不過,開始對話之後就發現 Rebecca 唔係好孩子,而係……怪怪地。佢本身讀緊大學,第一條問題係「黎緊畢業,應該做邊一行好」。

「妳想做 Office 定想係對客?」
「唔知呀~」
「咁…妳鍾意穩定,定想要挑戰性呀?」
「我都唔知呀~」

佢「唔知」咗兩次之後,我其實都躁躁地,老老實實,都讀到大學啦,連自己想做乜、鍾意啲乜都唔知,咁無人幫到你架噃!塔羅牌可以幫你 Clarify 或者 Ensure 一啲嘢,喺迷失時,亦可以 Inspire 你一啲嘢;但係,假設你個腦係空嘅,係草包嘅,咁你開一百條問題都未必搵到邊份工適合你架噃!

喺呢個時候,Rebecca 突然側一側頭,然後好作狀咁舉起食指,好用力咁眨咗下眼。

「吖,我諗到啦!」
「係咩工作呢?」
「我想做塔羅呀!好似妳咁搵錢咪唔辛苦囉,又特別,又神秘,幾型呀!我可以出去同人講我係占卜師!」
「吓?」

無錯,我真係吓咗出聲,心底仲即刻冒起一萬分嘅不屑、二萬分嘅歧視、三萬分嘅厭惡。小姐,即係咁,你將來出去做咩工都無所謂,但真係要改下「開口得罪人」嘅毛病先。

首先,無一份工係「搵錢唔辛苦」的,各行各業都各自有苦況,要 Handle 好似 Rebecca 呢種客都可以話係我行業嘅苦況之一,而且我無得放工架!你以為我淨係見客先叫開工架?我除咗瞓覺之外,我每一刻都係覆緊客嘅 Inbox 架!

其次,喂阿姐,你係咪太輕視「塔羅」呢樣嘢呢?我由遇上我師父、學牌、到第一次正式收錢幫人開牌,前前後後,最少都花咗一年時間研習;即係你想做會計師都要讀書考證書啦?定你以為「占卜師」比份 CV 出黎有大學學位就做到呀?同埋唔好玩啦,你居然想為咗「型同神祕」想走去做占卜,即係我都唔旨意你話想幫人喇,你直接話想搵錢我都無咁嬲,型同神祕?你痴咗邊條線呀?

見到我塊面一秒黑哂,Rebecca 都仲唔醒水,繼續以為自己好可愛咁嘟嘴、扮無辜樣、側頭……喂重點係你個樣無賣萌嘅 Quota 呀!我張配圖係呃你地 Click 入黎架咋!見到佢托住下巴打側頭望住我時,我心入面真係忍唔住講粗口架!

但係上面都未算呀,最爆嘅而家先黎:

「就咁話,好唔好?我做你徒弟,咁我會聽你教嘅,我會問問題,咁你就答我,同埋你會幫我買塔羅牌架可?有無款揀架?仲有呀,因為我無乜預算呢,如果做你徒弟期間,我有咩生活需要想開牌呢,你做師父嘅,會唔收錢幫我開牌架可?」

嘩嘩嘩嘩嘩!Rebecca 呢一連串嘅發言,真係足以令我嘔十幾兩血,我開舖以黎都未遇過如斯厚面皮又天真(我用字幾厚道!)又痴膠花又自我中心嘅客,幫佢買塔羅牌都仲要揀款呀~要 Hello Kitty 定要布甸狗呀?駛唔駛我包埋伙食呀?Lunchbox 要食中餐定西餐,要唔要少油鹽呀?怕唔怕睇筆記傷眼,買埋藍莓素比你食呀?

我毫不客氣咁笑咗出聲,「咪住,我無話教你,唔好亂叫師父,我唔識你,亦唔打算教你,如果你無野問,請你比錢離開。」

咁我都肯定我雖然係笑緊,但我當時嘅面色都幾難睇吓,Rebecca 就直情趴喺我張枱度,大聲嘆氣,「你做咩咁惡喎……人地真係想試下吖嘛……我又唔知自己想做咩,見你份工好似幾過癮咪想試囉……」

各位朋友,Rebecca 喺呢個個案入面,充份而傳神咁演釋咗咩嘢叫做「火上加油」。我望住 Rebecca 扮天真無辜少女個樣,原本好嬲,嬲到想串佢,不過嬲咗一陣,突然覺得,算啦,我做咩為咗個傻嘅而勞氣呢?

慶幸當時我下個客已經黎咗,我大條道理送客,雖然 Rebecca 走嘅時候,用怨婦嘅眼神喺舖頭門口仲望咗我兩眼,不過是但啦,我已經 Blacklist 咗你架啦,祝你搵工成功呀,記得面試見 HR 嘅時候,要繼續托下巴側頭同埋扮無辜呀!你一定會幸福架!加油呀!

 

【塔羅牌個案分享】

「我想分手,佢話唔好,不如去開房;然後我覺得佢仲愛我」

個客認為喺放工時間嘅金鐘地鐵車廂入面睇英文書會增加異性緣

你話想生仔我咪唔避孕囉,我家下有咗你就叫我落?

有個客為咗受男人歡迎,走去養狐仙

著名大學 Year 1 學生問「我點先可以做到 Hall Queen」

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

  • 【真人真事】「我知道怎樣讓那些女人高潮,我每一次都成功。」 by 阿痞
    阿旦講到一半,也許發現我面無表情,也沒怎麼參與對話(應該是參與不了),突然笑了一聲,吐了一口煙,一臉意味深長地盯著我道﹕「你好冷靜,真是個成熟的女生。我喜歡女生成熟。」雞皮……疙瘩……掉一地………
  • 【塔羅個案】年輕女性客戶努力儲錢,只希望將來間屋買大啲比男朋友擺Gundam by 神婆
    Cherry 由大學畢業後就開始搵我問工作方向,到而家不知不覺第五年了。出野做野無幾耐,佢經朋友介紹認識一個宅宅地嘅男朋友,兩人皆從事金融行業,人工尚算不錯,加上理財有道及各種原因,兩人加起來略有積蓄,近日男友暗示有結婚之意。…
  • 【跳樓啦】唔小心講多左 LEGO跳樓機今年殺到?! by 阿九
    LEGO 過山車熱潮都仲未減退,大家都仲諗緊點安置佢嘅情況下,喺德國嘅 LEGO 銷售網站 Brickmerg […]…
  • 香港人,返工返到傻L左 by 哈姆太狼
    話說呀輝是應屆畢業生,正在一間剛正名的大學裡面做辦公室助理。至於在前文提到他準時下班需要向上司提交合理理由,這不是我編的,而是真人真事。呀輝的工作合約是朝九晚五,但每天都要加班到七點才能下班,最重要的是加班還沒錢。「Quit左佢啦!伏工。」…
  • 女朋友話我當佢係洩欲工具 by 哈姆太狼
    最近女朋友拒絕行房,令我百思不得其解。明明思前想後也沒有得罪這位主子的地方,難道是.....「黎m呀?」我摟著她。以我的經驗,只要我抱她抱得緊緊的,總能大事化小,小事化無。「吓⋯⋯冇呀。」「咁做咩唔想呀?」「唔想咪唔想囉⋯⋯」她把頭撇到了一…
歡迎讚好我們的facebook page,免費資訊源源送上。