月老 VS 邱比特

會議室內，兩派人物吵得面紅耳赤，互不相讓。
左邊為首的是保守派月老，他認為凡事不應過急，所以他主張用紅線把有潛力成為情侶的人連起來，令他們有更多相處機會，自然發展。
右邊為首的是激進派邱比特，他覺得若把事情拖得太久，會令他們錯過機會，所以他直接以愛神之箭射進人們的心，直接使他們墜進愛河之中。

「後生仔，我唔係話你唔岩。但你睇下，你次次都用盡力將支箭一下射落凡人個心到，你睇下佢地，好多最後個心都碎晒喇！好似我咁綁下紅線咪幾好，等佢地慢慢相處慢慢認識，到最後就算甩左條紅線都唔洗咁傷心。」月老一手捋鬚。
「兩個人拍拖會傷心就好自然架啦！你仲好講，你知唔知點解而家人口老化，就係因為你成日要佢地慢慢黎要自然，搞到而家啲人咁遲婚，最後變高齡產婦唔肯生！最抵死既係，你老花就唔好學人亂咁綁紅線啦，你知唔知你亂咁綁搞到好多本身有機會既人最後都無疾而終！」邱比特飛到天上，觀察世人。
「好喇，兩位卿家冷靜啲！我而家呢到有一對男女，佢地糾纏左好多年但始終都未一齊。你地邊個可以令到佢地修成正果就以後邊個話事啦！」天神拿著手中的水晶球，向眾神展示。
「好，一於咁話！」月老及邱比特二人齊聲道。

作為激進派的邱比特一收到任務後即刻飛到那對男女的身後。
他悄悄的跟著他們，看好時機，右手拉著金黃色的愛神之箭，準備發射。
「嗖！」愛神之箭劃空而出。
當箭差不多飛到他們身旁時，那男生突然蹲了下來綁鞋帶，完美地避過那快得肉眼看不見的神箭。
「唔…唔緊要，咁岩既姐，等我今次瞄準個女仔！」邱比特看準時機，再發一箭。
中了，那一箭結實的插在女生的心上，正當邱比特想走前確認時，卻發現那女生心上早已插滿了屬於那男生的箭。
「冇理由架…點解會咁，明明一早插滿晒箭佢地冇理由唔一齊架…」邱比特雙手掩頭，自言自語。
「哈哈哈，後生仔果然係未到火候，跟係我後面學習學習！」月老自信的微笑。

此時，月老口中唸唸有詞，然後大喝一聲，男女的腳上已連著一條小小的紅線。
「綁左紅線之後就唔會離開對方太遠，日見夜見，打風都打唔甩，到時自然就會開花結果。慢慢睇野啦後生仔，哼哼。」
一個月，兩個月，三個月…無事發生
「到底點解會咁，明明佢地已經朝見口晚見面，佢地都好明顯係喜歡對方，點解會咁架！」月老此時看起來真的很老，眼眉的尾已經長到落地上了。
「哈哈哈，你地明白未，其實你地冇人岩，亦都冇人錯，只係對唔同人要有唔同方法。」天神在後慢慢行出來。「戰神，你去幫幫手。」
「戰神？」月老跟邱比特一臉迷惘。
只見戰神左手右手分別放在男生及女生的頭上，然後男生就一手牽起了女生的手，甜蜜地離開了。
「到底發生咩事？」邱不特忍不住問天神。
「你仲唔明呀？其實呢對男女一早就鍾意對方，只係佢地都唔敢開聲，驚對方唔鍾意自己，會破壞左段感情。岩岩戰神比佢地既，係勇氣，一個行出一少步既勇氣。」天神續道：「所以你地兩個其實都冇錯，只係唔同人有自己唔同既處理方式，你地應該做既，係搵一個適合既方式對待適合既人。」

自此，月老會間中拿著愛神之箭，邱比特也會拿著紅線去結合情侶，他們二人合作無間，撮合了世上許多的情侶。而更重要的是，他們向戰神學習，學會給人勇氣的力量。

作者：九妹

閱讀後覺得好，請多多讚好及分享～：）