「你凍?咁你伸入嚟啦」

 

 

天寒地凍,即使我未到要著羽絨嘅地步,喺梳化坐得耐都真係陰陰寒。

難得女朋友話要煮餐飯比我食,仲落咗「嚴禁內進」嘅命令,我緊係大安旨意坐喺度玩住電話等開飯。不過我連部食神都翻睇完佢都未出過嚟,又唔覺廚房有咩動靜,我都係決定入廚房睇下咩情況。

一嚟睇下有咩要幫手,二嚟廚房夠哂暖。

「有冇嘢要幫手啊大廚。」我喺後面攬住佢,而佢繼續好淡定咁將蘑菇切粒,睇嚟佢一早知我入咗嚟。
「冇啊,仲差少少就食得,你唔好阻住我整嘢添啊。」佢用圍裙抹一抹雙手,將切好嘅蘑菇粒放埋一邊,然後開始切其它嘢。
「加水打蓉整醬係咪?我幫你啦。」我依然係攬住佢嘅動作,不過雙手唔再係攬實佢條腰,而係幫佢放啲蘑菇粒落攪拌機。
「我熱到成身汗,你唔好痴埋嚟。」
「我請你食凍柑吖咁。」話口未完我就擺隻手落佢塊面。
「小可喎,你隻手咁凍嘅?」
「出面好凍,所以咪嚟搵你取暖囉。」

平時我喺冬天長期都係做人肉暖爐,難得今次我同佢角色互換,而且睇落佢都好享受我依位客串退熱貼提供嘅溫度。就喺依個時候,佢講咗句所有男人都抵擋唔到嘅說話。

「你凍?咁你伸入嚟啦。」講完佢仲指一指自己條腰個位。

我馬上將隻手經由佢衫腳伸入去佢嘅小蠻腰度。嗰一刻,我終於明白點解平時佢咁鐘意將佢凍到冰嘅手腳放喺我肚腩,真係好暖。

「喂啊,我叫係伸入圍裙入面,你仲要入埋件衫添?」佢冇估到我會錯意,刀都跌埋落砧板。
「唔好嬲啦,幫你降溫嘛。」而家嘅我就好似一個漂浮大海嘅人搵到個水泡咁,點都唔會放手。
「好啦好啦,我條腰凍啊喂。」
「咁我伸上啲囉。」我隻手開始摸到佢件最貼身嘅物品。
「嗱,你再係咁我煮唔到飯架啦。」佢把聲已經表明佢而家最想嘅都唔係煮飯。
「我都冇再諗過比你煮。」

我抱住佢入房,兩個鐘後大家先出返嚟。

原來伸入啲,真係好暖。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 174294
Date: 2017-12-23 18:33:45
Generated at: 2021-10-27 11:11:50
Permalink: https://www.vjmedia.com.hk/articles/2017/12/23/174294/「你凍?咁你伸入嚟啦」