【外賣仔日記】金色拱門的黑面經理

 

嗰日我去攞金色拱門快餐店嘅食物,呢間理論上應該係比較好嘅餐廳嚟,因為啲嘢食全部都已經煮好哂,餐廳收到張單之後齋執啲食物入袋。

唔知點解,金色拱門快餐店,入面啲一般嘅員工只會做啲餐廳嘅工作,應付我呢啲外賣平台送遞員都唔會曉,只係個經理會識得處理我哋啲單,如果咁啱個經理唔係出面,埋得去取餐區嘅非金色拱門員工都會俾佢哋視作為佢哋客人,爭在佢哋未講到出口叫你排隊去做查詢,但係默認嘅慣例係,我哋係直接繞過曬所有堂食客打尖去最前面去攞餐,畢竟我哋公司對時間嘅嚴謹程度比堂食客為高。(BTW,試過到咗餐廳之後通知個一般嘅員工話某某公司到咗,應咗我之後竟然無視我呀,乜都無做呀,我爭啲想爆佢一鑊呀)

張單本身係好正常,而今次個客響張單到講明要3套餐具嘅,都睇落冇乜特別嘢可?你錯啦,竟然今次係個經理有怨言呀。

當我去到金色拱門快餐店之後,佢竟然係未準備好啲食物呀。張單係一張預約嘅單嚟架,個客係選擇咗個指定嘅時間收到啲食物, 即係話我哋個系統可以計算得到一個時間,係會要求餐廳喺呢個時間之前準備好食物, 我去到餐廳之後啱啱好喺準備時間,即係話我到咗餐廳之後理應會即刻攞到份餐可以離開

我嗰陣時心諗,你下次計好啲時間去執餐啦,個客有指定送遞時間架。

最有趣嘅係,我望住佢執餐嗰陣佢竟然對住嗰張單黑晒面喺度話,點解個客要3份餐具,佢仲要用一個好燥嘅語氣去講, 我嗰陣時心諗,要3份餐具,有幾唔合理呢? 我嗰一刻真係覺得個經理係咪…… 我真係鄧佢啲員工擔心,有個咁樣嘅上司。然後嗰張單最後係以遲緊十分鐘嘅時間先至出到。

呀經理,即係咁,你既然做到呢個位,咁啲客人嘅要求只要唔太離譜你都要接受架啦,同埋你響金色拱門快餐店到做,連指引都跟唔到, 講到明有指定時間你都做得咁差,好彩我係步兵姐,如果咁啱遇著係車手攞餐,佢有架電單車泊咗響出面,因為你遲出餐,導致佢架車俾人抄牌,個320係咪你俾呀?

 

專題:【外賣仔日記】

 

 

關於作者:外賣仔

外賣仔

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。