【塔羅個案】港女偷食同男友分手,仲要偷埋人地架車同隻貓!喵~

 

自從開始寫《塔羅個案》呢個系列(?)以黎,最近有一個頗為有趣嘅現象,就係有部份讀者朋友上黎幫襯嘅時候會順手搭一句,「你如果想寫嘅,可以寫我嘅故事出黎架!」聽到呢句,真係不禁要跪謝各位客戶嘅信任同埋器重(好似係)。

今次分享 Johnson 嘅個案。Johnson 家境唔錯,高大白淨,英國留學返黎,屋企有間外貿公司比佢繼承打骰,聽落相當開心係咪?(嗱唔好問我拎 Johnson Contact(笑))不過,Johnson 唔知係咪因為以前讀開男校,唔算係好習慣同異性相處,所以一旦鍾意咗個女仔,就好快同人同居,一諗就諗到去結婚嗰一步。

咁如果個女仔係乖女嘅,呢個發展當然就風光明媚啦;不過我聽完 Johnson 近幾次同人交往嘅經歷,我個心忍唔住喺佢額頭標記住「仆街磁石」四個字。

Johnson 三段感情關係都唔理想,令佢由「好想結婚有自己家庭」慢慢變成「我都係專心做野算啦」嘅狀態;佢最新一段感情關係,係唔小心發現女方一腳踏兩船。但係最差勁嘅回憶,就要數佢同 Jessica 嘅關係啦。

兩人當時喺英國做兼職時認識,Jessica 報稱自己讀緊 Aston,而 Johnson 自己就讀緊 Bermingham。Johnson 無疑心太多,Jessica 甜美可人,好快佢就追求對方,一個月之後對方話屋租有問題,Johnson 就叫埋對方黎自己度住。

半年之後 Johnson 返香港探親,而 Jessica 就飛咗去外地旅行。Johnson 醒起嗰個時期係考試成績發佈嘅日子,佢怕 Jessica 掛心,就諗住幫佢上網 Check 埋。點知 Jessica 多番推塘,甚至口出惡言認為 Johnson 多事。Johnson 有啲疑心,突然醒起每次自己話去接 Jessica 放學或者想知佢嘅 Time table,Jessica 都支支吾吾;而同居幾個月以來,都好似無乜點見過 Jessica 趕 Paper 或者溫書。Johnson 有不祥預感,提早返英國,拿拿聲走去 Aston 度查詢學生資料。

無錯,睇到呢度,結果,係如你所料:Jessica 根本唔係 Aston 嘅學生。

Johnson 好嬲,嬲得黎有啲不安,點解女朋友要呃自己?同埋,如果連學歷都係假嘅話,到底 Jessica 有幾多嘢係講緊真話?

「我以為自己已經諗到最差嘅狀況,但係原來真相比我想像中更嘔心。」Johnson 苦笑,「佢原來仲有一個男朋友,對方係早過我喺餐廳度做 Part time 嘅亞洲人,但係當時因為偷錢所以比老細抄咗。」

真相係咩?真相係 Jessica 呢位正式男朋友,因為犯事而坐緊監,所以 Jessica 先會無地方住,所以先會埋 Johnson 身;而佢本身,只係一個連 Foundation 都讀唔完嘅人,簡單黎講,就係無院校學歷。

Johnson 忍唔住打咗個視像電話比 Jessica,講咗句「I know all the truth.」Jessica 喺電話入面表現得好驚,話自己真係愛 Johnson,Johnson 心軟,決定等 Jessica 返英國先講。

結果,Johnson 按 Jessica 嘅指示去機場接佢機,但等咗好耐,都唔到 Jessica。電話短訊唔覆,問航空公司,人地話無呢個名嘅乘客。

Johnson 覺得唔對路,即刻衝返屋企,已經太遲;佢兩部 Macbook,iPad,三千鎊現金,一件名牌大褸全部不翼而飛;而 Johnson 平時有兩部車代步,其中一架,都唔見埋。

而 Johnson 屋企本身有隻自來貓,叫做 Forest;連 Forest 都唔見埋。

我聽到呢度,吃驚到唔知比咩反應,因為呢件事實在太 Dramatic,太 TVB,太不可思議,太無賴。Johnson 最後當然係選擇報警,「我諗我已經唔係傷心,而係覺得好可笑,喂原來呢個世界真係可以有人反轉豬肚,可以咁狼心狗肺。我真係上咗一課。」

聽到呢度,我原本以為 Johnson 係咪咁傻豬,仲想問「Jessica 係咪鍾意過我」呢啲問題;不過好慶幸地,佢只係想知隻貓 Forest 而家過得好唔好。不過,雖然開出黎嘅牌,顯出佢而家有人鍚、有人照顧,然而好遺憾地,我唔識幫貓開塔羅牌,唔敢作準,建議 Johnson 聽完就算,問返事業前途啦。

Johnson 黎搵我時已經返香港幫緊屋企公司做嘢了,「但係 Jessica 仲係會開唔同嘅 Facebook / IG 假 Account 黎嘗試 Contact 我,講咩 I miss you 同埋自己生活唔好,可唔可以幫幫佢之類嘅廢話。」Johnson 嘆咗一口氣,「我唔想再諗呢啲嘢,屋企需要我,我諗我都係專心工作最實際。」

我不置可否,始終我唔係 Johnson,我可以理解佢有幾失望,但我始終唔係佢,我唔會明白佢到底要點樣先建立返對感情嘅信心。不過人各有志,既然人地想工作為主,男人老狗又無話急唔急嘅,做多幾年嘢話唔定會無咁易比女人呃都係好事。

我最後淨係勸咗 Johnson 一句,「如果你屋企環境唔錯,唔好一黎就話比人知,見利忘義嘅人很多,保護自己,慢慢學習吧。」

反正,Johnson 我唔擔心呀,大好前途呀仔,驚咩。我擔心 Forest 咋,我貓奴黎架嘛。

 

【塔羅牌個案分享】

「我想分手,佢話唔好,不如去開房;然後我覺得佢仲愛我」

你話想生仔我咪唔避孕囉,我家下有咗你就叫我落?

著名大學 Year 1 學生問「我點先可以做到 Hall Queen」

名校老師婚外情的故事

集氣,祝福・妳一定會好返的!

 

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

  • 【真人真事】「我知道怎樣讓那些女人高潮,我每一次都成功。」 by 阿痞
    阿旦講到一半,也許發現我面無表情,也沒怎麼參與對話(應該是參與不了),突然笑了一聲,吐了一口煙,一臉意味深長地盯著我道﹕「你好冷靜,真是個成熟的女生。我喜歡女生成熟。」雞皮……疙瘩……掉一地………
  • 【塔羅個案】年輕女性客戶努力儲錢,只希望將來間屋買大啲比男朋友擺Gundam by 神婆
    Cherry 由大學畢業後就開始搵我問工作方向,到而家不知不覺第五年了。出野做野無幾耐,佢經朋友介紹認識一個宅宅地嘅男朋友,兩人皆從事金融行業,人工尚算不錯,加上理財有道及各種原因,兩人加起來略有積蓄,近日男友暗示有結婚之意。…
  • 【跳樓啦】唔小心講多左 LEGO跳樓機今年殺到?! by 阿九
    LEGO 過山車熱潮都仲未減退,大家都仲諗緊點安置佢嘅情況下,喺德國嘅 LEGO 銷售網站 Brickmerg […]…
  • 香港人,返工返到傻L左 by 哈姆太狼
    話說呀輝是應屆畢業生,正在一間剛正名的大學裡面做辦公室助理。至於在前文提到他準時下班需要向上司提交合理理由,這不是我編的,而是真人真事。呀輝的工作合約是朝九晚五,但每天都要加班到七點才能下班,最重要的是加班還沒錢。「Quit左佢啦!伏工。」…
  • 女朋友話我當佢係洩欲工具 by 哈姆太狼
    最近女朋友拒絕行房,令我百思不得其解。明明思前想後也沒有得罪這位主子的地方,難道是.....「黎m呀?」我摟著她。以我的經驗,只要我抱她抱得緊緊的,總能大事化小,小事化無。「吓⋯⋯冇呀。」「咁做咩唔想呀?」「唔想咪唔想囉⋯⋯」她把頭撇到了一…
歡迎讚好我們的facebook page,免費資訊源源送上。