影帝在身邊

 

人生就像一套連續劇，每個人都是一位演員，

由睜開雙眼開始，都在演繹著屬於自己的戲份。

在平淡的一天裡，我遇見了影帝和影后。

 

拖著殘留的軀殼，好不容易才擠進車廂，

終於能拿起電話看一下未回覆的whatapp。

「豬BB」

「BB係度」

「嘻嘻，你走未呀？」

「走了，肥肥你呢？」

「…我好肥咩！行緊去坐車了」

「套戲唔知係唔係似人地講到咁好睇呢，好期待啊」

「嘿嘿，我就係鍾意你肥在應該有肉的地方上」

「你咁易喊，睇笑片都喊得出啦」

「咦，好衰呀你！咁你應該早過我到啊」

 

「下一站係大學，The next stop is University⋯⋯」

車廂中響起那千篇一律不帶感情的廣播，

「習慣了，嘿」

就像習慣了做著一份自己不喜歡的工作，

對著一班嘔心的客戶都要擠出燦爛的笑容，

上班下班都在港鐵上被迫得像沙甸魚一樣。

 

「請勿靠近車門，Please stand back from the⋯⋯」

當車門關上，我終於能再站穩的時候，

前方一個背著背囊的男人，突然後退撞在我的身上。

「sorry」男人立刻轉身跟我道歉，

我的目光卻被他身旁的女伴吸引著。

大大的眼睛，筆直的鼻樑，濃淡適中的妝容，長到胸部的微卷髮，

都可以算是一個中上級的美女啊。

重點是她穿著傳說中的摟HI裙＋薄黑絲＋高跟鞋的配搭，

就算外面穿著一件中褸遮掩，都阻止不了她散發出來的費洛蒙，

立即將她原本是中上的等級再升一級！

相信讚同我眼光的男人都有不少，

因為我發現周圍的目光都集中到她身上了。

她好像也感覺到被下流的目光包圍著，害羞地低下頭，依偎在男人身上。

我對那男人報以一個微笑表示不要緊，這才看清楚那個男人的樣子。

心中不禁問候了他的母親，為什麼這麼平凡，

可以說有點醜的人，都能有一個這麼漂亮的女朋友呢？

就像每天在中環、尖沙咀，隨便一束吊燈傾瀉下來，

都能壓死一堆那種四眼西裝友。

為什麼為什麼為什麼 ，我不能接受.jpg

 

拿在手中的電話，收到whatapp的聲音響個不停，將我帶回了現實。

「有時都係我早過你好唔好！咁我係女仔著裙行得緊係無咁快啦。」

「好累呀，一路行都一路覆你訊息，你睇下我對你幾好。」

「頭先見到件裙好靚，想唔想我買來著比你睇啊？嘻嘻」

「喂喂」

「⋯⋯」

「做咩唔覆我！」

「差唔多到話我知」

「係唔係掛住昅女呀？」

「李俊熙」

「李俊熙李俊熙李俊熙」

「你再唔覆我就以後都唔駛再覆了！」

看著這一堆未回的whatapp，

我笑了。

不是每天戴著假面具，附和地皮笑肉不笑那種，

是很窩心的，發自內心地笑。
被人重視的感覺真是很好，而且她總能看透我的心思，

好像只能在她面前我才能夠做回真正的自己。

如果世上真的有另一個我，那個人一定是她。

 

「哈哈，點解昅緊女都比你估中的，你係我電話裝咗讀心器呀？」

她一定在看著電話，急著等我回覆的，

但因為我這麼久才回覆她，她一定鬧脾氣特意隔一回兒才會覆我的，

這種小脾氣真是很甜蜜又很可愛。

 

「你開心啦依家，係要人地咁著出來比你睇，

攪到我係咁比人望了，你咩氣都落哂啦」
耳邊突然響起一把像志玲姐姐般清脆的雞仔聲，

原來是出自那個黑絲靚女，估不到她的聲音是這樣尖的，

跟她的樣子很有違和感啊，但也有一種反萌差。

 

「算你乖乖聽我話啦，但你今晚真係唔陪我呀？」

眼鏡男絲毫沒有浪費一分一秒的時間，

一邊說話一邊緊緊地抱著志玲姐姐又聞又親。

「唔得呀今晚真係，要同親戚食飯真係推唔到呢，乖啦好唔好。」

志玲姐姐慾拒還迎那樣輕撫著眼鏡男的頭髮。

「我真係好唔捨得你呀BB」

眼鏡男沒有再說話，只繼續旁若無人地上演春宮圖…

 

「哇，有無咁饑渴啊，好心就返屋企先痴纏啦」

身旁的中年姨姨好像有點看不過眼在呢喃著。

其實我是不介意繼續看下去的，

醜男跟美女的配搭看AV的朋友都一早習慣了吧。

只覺得他們都不是十八廿二了，需要這樣難離難捨想抱緊些嗎？

 

就在這時，眼鏡男的電話響起，

他們相視而笑了一下，才接聽了電話。

「喂，老婆」

眼鏡男情深款款地望著志玲姐姐，

好像這句老婆是說她一樣，她亦照單全收一臉陶醉甜笑著。

「未叫你唔駛等我食飯囉，留飯比我得啦」

「頭先開緊會未聽唔到你電話囉」

「不過個會早咗開完，我都差唔多返去喇，你同洛洛食住等我啦，唔好餓親啊」

「喂喂，洛洛呀」

「喂，洛洛，有無乖乖聽話啊？」

「爸爸好快就返到，一陣食完飯再同你玩波波好唔好？」

 

所有謎底解開了，原來是偷食男女，怪不得這麼悲天憫人。

但是爸爸剛才先玩完波波，洛洛你都是早點洗洗睡吧…

 

「哈哈哈哈，你依家真係講大話唔駛諗的」

「愈來愈叻呀你真係」

志玲姐姐很開心地用雙手揉著眼鏡男的臉蛋。

「唔比人識穿既大話就係真話」

「好衰呀你，洛洛真係好得意，你幾時帶佢見我？」

 

這時候她終於覆我訊息了。

「一定係黑絲女女啦！你望佢得啦唔駛理我啦！」

「精彩了，志玲姐姐搭上已婚男！」

「咩呀，你講咩呀？」

「是咁的⋯」我就將事情經過告訴她了。

「哇，好賤囉個女人！人地結咗婚有小朋友仲痴埋去，

個男人又係，未玩夠就唔好學人結婚啦。」

「未係囉，我覺得婚姻係神聖的！」

「我好鍾意小朋友，如果我有小朋友一定會比個幸福的家庭佢！」

當我們在一言一語道德審判別人的時候，我還是默默留意著他們。

「就到站要轉車了」志玲姐姐收起笑容緊緊抱著眼鏡男，

剛剛還一直害羞地慾拒還迎的她突然變得主動起來。
「好在我地順路仲可以痴纏多你一陣，嘿嘿」眼鏡男邊笑邊撫摸著她的纖腰。

「佢話係九龍塘接我。」

「吓！佢唔係話係酒樓等你咩，無啦啦去接你？」

「未係囉，阻住哂。」志玲姐姐嘟起咀唇滿臉失落。
「咁…」

眼鏡男未及開口，志玲姐姐已經請他吃唇膏來表現她的不捨了。

「媽呀，我好亂呀，原來志玲姐姐都有另一半的！」

我立刻將最新消息告訴她。

「痴線，咁都有既！」

「好在我都係九龍塘轉車仲可以食多一陣花生」

「你真係八公嚟，不過我都好想知，嘻嘻」

「哈哈，你錫完我轉頭就錫你老公，佢未即係同我間接KISS囉？」

「咦，想死呀你？」志玲姐姐狠狠地咬了眼鏡男的手臂一啖。

「愈諗愈覺得益咗你老公，平時你都唔會咁著的，

因為見我今日先著得咁靚，佢今朝有無覺得奇怪？」

「同佢出街我真係妝都懶得化，更加唔會著高跟鞋啦。

佢一早出咗門口啦，所以你係早過佢見我咁著，第一名，哈哈」

「算你啦」眼鏡男好像很滿意這個第一名。

 

「下一站九龍塘， The next stop is Kowloon Tong…」

短短幾個站的路程，好像看了一套現實又殘酷的連續劇一樣。

「咁落車我地要分開行喇，佢係邊接你？」眼鏡男突然有點慌張起來。

「你驚佢打你呀？」志玲姐姐緊緊地繞著眼鏡男的手臂不讓他分開 。

「佢好懶一定唔會走上來依度接我的，只會係地鐵月台等我。」

她面上露出一絲詭異的笑容。

「我…我未驚過，但你咁肯定佢唔會比驚喜你？」

「咁我打比佢，問佢係邊吖，我地賭吖」
未等眼鏡男答話，志玲姐姐已經拿起電話了。
「老公豬，你係邊呀？」

「下站到呀，係月台等我呀～」

志玲姐姐一邊說一邊看著眼鏡男，
擺出一副勝利者的姿態，像個天真的小女孩一樣。

「好想快D見到你呀，老公豬～」

 

剛步出車廂就覺得寒風刺骨，除了因為香港的濕凍是世界最凍之外，

真是有種心寒的感覺。

影帝影后級的演員原來都隱藏在身邊。

 

在行去轉乘地鐵的路上，我都跟隨著他們的身後，

他們還是手牽著手，笑笑鬧鬧，似進入無人境。
如果不是聽到他們的對話，在其他人的眼中，

他們都是一對平凡而幸福的情侶吧。

怎樣的相遇，怎樣的錯失，

才變成現在這種關係，

我永遠都不會知道。

終於，在地鐵站內往月台的扶手電梯上，
看見他們把握最後的幾秒鐘深情地擁抱著，

到差不多到達月台時，
回頭、分開，變回陌生人。

多麼熟練的默契，是經過多少次的綵排練習出來的。

就好像剛才發生的一切都只是我幻想出來。
志玲姐姐向左走，我和眼鏡男向右走。
我很想看看她老公是一個什麼樣子的人，
我想像一定是個地中海的中年大叔吧。
只見她左看右看很快就小步跑向一個男人身邊，
在跑到男人的途中她還望向我這邊一眼，
原來眼鏡男還在看著她。

雖然只是一瞬間，
她老公竟然算是一個靚仔，如果打扮一下會是脫胎換骨那種型男。
⋯⋯
只能說比眼鏡男好太多了。

 

志玲姐姐挽著她老公的手臂，相對而笑著，

她還是笑得那樣甜蜜，老公低頭親吻了她的咀唇一下，

他可能永遠都沒有想像過，會和別個男人間接KISS吧。
這一幕眼鏡男都看在眼內，都是他預計之中會發生的事嗎？

看著他那個似笑非笑的表情，是落莫還是不捨，是愛還是恨。

目送志玲姐姐和眼鏡男消失在人海之中，
這輩子可能都不會再碰見他們了吧，
這場萍水相逢的鬧劇到了落幕的時候。

「喂～又掛住自己食花生呀？？」
「喂呀，又潛水！」
「SORRY，我太投入咁追緊果套連續劇了」
「低能，你真係跟住佢地尾呀？哈哈」
「順路而已，好多花生派比你食呀，但你都差唔多到喇？」

「係呀，聽日先慢慢派啦，等你覆埋我就準備入場了」

我刪除已經打好一半的花生
「係喎你地睇7點半，咁聽日再傾啦」

「佢一定係去拎票先，你又匿係廁所覆我呀？」

「嗯」

「豬BB」

「李俊熙」

「愛你」

「看完記得要del啊，嘻嘻」

「傻妹，知道啦，你都係啊」

「愛你」

我知道她今晚不會再回覆我訊息的。

 

習慣了，習慣真是一件可怕的事情。

 

但我還是把這個whatapp名字叫「物流部阿偉」的女仔按了靜音一個月才放心，

之後再仔細看一次今天她對我說的愛你、愛你，愛你。

最後才心滿意足地把聊天紀錄都刪除。

原本在聊天紀錄第二個位置上，

名叫「豬BB」的女仔升上了第一位，

收到最後一條訊息是「差唔多到話我知」。

 

唔比人識穿既大話就係真話

 

我深呼吸調整了一下心情，生活還是要繼續。

「差唔多返到樓下了BB，今晚想食咩？」