（photo via cc Flickr user Ding Yuin Shan）
當香港人要乜無乜，想要真普選無真普選、想要John Tsang當選變做林鄭777、宜家連議事規則都俾人改埋。香港人不斷輸，輸到攰，就想尋找快樂。
想知一個社會嘅狀態係點，就要睇嗰度拍咗啲咩廣告出嚟，因為廣告係最即時反應到人民想要啲咩，所以廣告想講嘅message其實就係香港人想講嘅嘢。而呢排啲廣告就狂sell快樂，正正反映香港人想用咩方法尋找快樂。我想攞一兩個例子嚟講，為免做廣告之嫌，一律唔提牌子名，有興趣嘅自己去搵，唔關我事。
第一個廣告舊咗少少，係聖誕檔期出嘅，要人提名自己身邊嘅Christmas Maker，贏咗就送機票畀佢。驟眼睇好似又係體現港人核心價值──去旅行大過天，去少幾次日本就買到樓都一定要去。但諗深一層，呢個廣告講緊嘅，係香港人好想自己嘅努力被認同。佢嘅努力可能係為供樓、可能係為家人、或者為自己個衰上司OT。但我地都應該再諗翻自己：你有幾何認同呢班為你不斷付出努力嘅人？你平時唔會留意到佢哋嘅努力，亦都好少主動去認同佢哋，但當你細諗，就會發現其實身邊有好多人為你付出緊。
跟住嗰個幾特別，仲好肉麻，佢要你將一件幸福嘅事寫落張紙仔度，然後當做社區貨幣當「多拿」咁用。首先社區貨幣呢個concept已經好特別，喺香港比較少聽過，可以喺附近啲小店當錢咁用，而個牌子真係會俾返錢畀啲收社區貨幣嘅小店。其實對啲小店好好，因為而家啲小店真係買少見少，為佢帶來人流之餘又唔會要佢哋蝕錢。而叫人寫幸福嘅事，你諗下香港人而家有幾多嘢值得感到幸福？平時你可能唔記得，但當有人叫你寫嘅時候，你諗起你身邊原來都有嘢值得高興，其實感覺幾好。
其實香港嘅現實係好殘酷，你想要嘅嘢真係得唔到。但正如呢兩個廣告教導我嘅嘢，快樂同埋幸福通常我哋都係留意唔到，我哋亦唔會主動去搵，但當你仔細咁去發掘，原來呢啲嘢一直都係自己身邊。所以香港人唔好氣餒，就算現實中輸咗一仗，我哋身邊仍然有好多嘢值得我哋高興；有所值得高興嘅嘢，我地就有勇氣繼續行去。互勉。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年1月21日
