浸會大學學生會長糾眾圍堵語文中心，聲稱反對普通話課程，事件愈演愈烈，今日校方宣佈將涉事學生停學並提供輔導，最新進展係，「編輯委員會、幹事會、評議會及仲議會四大學生會架構須得學生事務處一位職員同意，才能發出群發電郵（Mass Mail）」，全面審查學生組織的資訊傳播。
爆粗是咪錯，呢個好值得討論，但爆粗就要停學，爆粗引致全面言論審查，我諗全世界絕無僅有，香港道德標準真係高過喜馬拉雅山脈珠穆朗瑪峰。
校方嘅無理，其實明事理嘅人都會明白，但成件事最好睇嘅，相信就係反對派嘅嗰種態度。
教育界立法會議員葉建源率先垂範，認為學生粗魯無禮不可接受。
反對派中人，想運動群眾嗰陣就最鍾意引經據典，左一句好人嘅沉默造就暴政，右一句當日我唔幫佢地講野今日都無人幫我講野，仲有一句「雞蛋與高牆之間無論隻蛋幾錯都一定企喺雞蛋嗰邊」刻喺額頭。
咁事實係點？就係到真係一個不平等嘅師生關係壓下來嘅時候，呢班反對派係會割席沉默。
選舉係好重要嘅，係架，特別係反對派，成日都要諗點樣討好班保守嘅選民，呢啲時候，是非對錯其實一啲都唔重要。唔信？各位睇睇教小學嘅林慧思？當日佢喺公餘嘅時間參與街頭運動，被警察為難，講左句粗口，鋪天蓋地嘅攻擊，搞埋佢學校，反對派係一句都唔會幫口，教協係會睇住佢死，點解呀？林慧思係黃毓民嘅人嘛，講粗口係唔受保守選民歡迎架嘛，點撐呀？
而家補選在即，周庭係浸會大學學生，仲未畢業，嚴格來講佢係持份者，所有候選人之中最需要表態嘅係佢，但佢就一句聲都無出過，反而唔洗選嘅羅冠聰都有講番兩句人話。
好人嘅沉默造就暴政，我信的，真係信，歷歷在目。
晚安。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2018年1月24日
