當你搵咗個空姐做女朋友

 

空姐對男人嚟講可以話又愛又恨:做得空姐嘅水準都唔會點差,對睇樣為先嘅男性嚟講可以話係首要之選;但因為空姐嘅職業特性,仲有佢日常所見所聞,又會令到你要同空姐女朋友維持一段二人甜蜜嘅關係困難好多。喺你搵個空姐做女朋友之前,或者有好幾樣嘢你要認真諗下。

唔係我有偏見,每次香港有啲咩慾照流出啊,綠帽事件啊,唔少女主角都係任職空姐,無論係最出名嘅蘭桂坊港女、國泰空姐當值食肉腸、定係最近發生嘅100毛街訪素人,全部主角都係空姐,如果要用職業去計派帽比率,空姐極大機會出現喺三甲之內。

點解會咁?好大可能因為空姐要同男朋友好好咁拍返日拖太難。個個都呻另一半要輪班好慘,等得佢收工都夠鐘食宵夜。但如果你同空姐拍拖,佢收工嘅時間可能係凌晨三四點,唔好話你已經瞓到豬咁,就算你肯夜媽媽仆出嚟搵佢佢都可能冇精神應酬你。又或者難得到佢放假,但偏偏嗰日係閒日到你要返工,結果等你六七點收工同佢食完個飯,因為佢第二日要飛早機,你地連戲都冇得睇就要送佢返屋企甚至直接去機場。拍拖都係想有自己鍾意嘅人陪,但喺空姐工作時間咁唔定時之下身為佢男朋友嘅你可能一星期一次都見唔到,久而久之佢就會平時返工空餘時間上網識下人,玩下交友APP,然後到有日平日放假就搵個咁啱得閒嘅網友出嚟玩。喺長期缺乏男朋友嘅關懷下,面對住一個條件幾好嘅男網友,大家飲多兩杯然後好自然咁更進一步唔係冇可能,當佢試過第一次就自然會有「接二連三」同樣嘅情況發生,到邊一日你發現佢同個男人開房,可能喺之前佢已經有過幾十次嘅一夜情。

你以為你個空姐女朋友唔會上網識人就好安全?唔好忘記佢份工每日接觸幾多人,當中又有幾多條件好嘅男人。機師、空少、坐商務甚至頭等嘅客,空姐要有外遇真係易過食生菜。你以為空姐喺駕駛倉食腸真係得一單就咁唔好彩比人流出?其實咪同山頂啲黑的一樣,警察放蛇拉到嘅只係鳳毛麟角,就算唔喺駕駛倉,飛到國外返酒店休息嘅時間都好足夠機師同空姐好好交流一下;又或者當個空姐招呼飛美國嘅商務客,有個男人禮貌示意要杯「Black coffee with ice」,然後喺空姐比咖啡佢嘅同時遞張卡片比個空姐,同佢講自己會留喺美國公幹兩個星期,睇下有冇時間同個空姐出嚟食餐飯咁。你唔好以為依啲爛橋實冇人受啊,落Club靠借打火機都識到女啦,而家見到卡片寫住係某間大公司區域經理,已經足夠成為唔少人心動嘅理由。

當然啦,以上唔係講哂所以做空姐嘅人都係咁,要比帽你戴,就算你女朋友喺女校做教書都可以同學生妹磨豆腐。不過同空姐拍拖的確比同其他職業嘅女仔會遇到更多困難同挑戰,大家喺時間配合同埋維繫感情方面都要付出更多心機,而佢亦都會受到更多嘅引誘,成唔成功就真係要睇下你地當中嘅愛有幾多,同埋願意作出幾多遷就。如果你而家嘅女朋友真係空姐,我只可以同你講一句:

祝閣下旅途愉快。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 175886
Date: 2018-01-26 06:11:53
Generated at: 2021-10-27 12:33:41
Permalink: https://www.vjmedia.com.hk/articles/2018/01/26/175886/當你搵咗個空姐做女朋友