就算你再好,一樣有人唔會珍惜

 

港女老婆caca出軌,係依兩日最爆嘅話題之一。

一個結咗婚咁多年嘅另一半,喺一個場合識到個男人,幾個月之後就一齊去旅行,如果曾經比另一半帽過嘅你一定知道當中有幾咁難受:你全心全意去愛嘅人,居然喺你背後做咗咁多不為人知嘅事,一直比帽你帶,仲可以喺你面前扮冇事扮恩愛。

咳神係咪好男人,我唔可以百份百肯定,畢竟我同佢並唔相識。但一個肯用自己老婆做題材一直畫咁多漫畫嘅老公,一個願意買層樓同你組織一個家嘅男人,甚至唔介意你生唔到小朋友只係想同你白頭到老,處處都將老婆放喺首位嘅人,一定唔會差得去邊。

或者你會以為只要你份人夠好、夠錫另一半、夠為佢著想,你同佢就可以平平穩穩咁過日子。事實係好多人雖然口講另一半錫自己係最重要,但更多時侯吸引佢地嘅係新鮮同刺激。同一個素未謀面嘅人會面,比同自己老公完全唔同類型嘅佢吸引,然後享受同第三者去旅行去迪士尼——依啲新鮮同刺激感,係一直陪伴住自己嘅「好男人」永遠都比唔到。你可以話咳神唔係靚仔,但個第三者又好得去邊?最多咪叫有身高182。明知人地有老公都要搞,件事揚咗冇企過出嚟講一句說話,咁樣嘅男人居然有港女願意話包養佢,用嘅錢仲可能係嚟自咳神為佢地而買層樓同咳神啱啱過身嘅爸爸留落嚟啲遺產,我都唔知話依個港女蠢定係醒好。

不過狠心同惡毒就一定。「最毒婦人心」依句嘢每日都有女人親身做證明。

難為咳神去到依一刻仍然喺聲明入面處處維護住依位港女,話大家一直都有問題解決唔到,唔好咁多猜測,留番啲空間比佢地兩個。咁嘅舉動夠唔夠好男人?但係點解港女依然要離佢而去?因為愛情從來唔係睇你好唔好人,只係睇你滿唔滿足到佢當下想要嘅嘢。就好似你返學想放假,但放得耐又掛住學校咁,當一個女人留喺一個好人身邊太耐,佢想要嘅或者就只係單單偷情比佢嘅刺激感。到某一日刺激不再又想要返平淡幸福日子,港女可能又會覺得咳神先應該係自己真命天子。

日後如果你被分手,唔洗再問係咪你有咩唔夠好,有啲咩你可以改,因為就算你再好都一樣有人唔會珍惜,又或者可以話因為你太好所以先係佢放棄你嘅理由。人總是犯賤,得到手嘅永遠唔及其它路人甲乙丙,格離飯永遠香過住家飯。當一個人唔肯定落嚟,當佢永遠唔會知足,就算有一個集所有好男人要素於一身嘅男人喺自己身邊,佢都總會搵機會同個一搞女人個肚就叫人落咗佢嘅休班警一齊,然後喺成為下一個受害者之後先抱怨男人都係咁賤格。

又係男人嘅錯?係啊,個好男人咪錯在曾經去愛你。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 176084
Date: 2018-01-30 22:19:24
Generated at: 2021-05-13 16:42:30
Permalink: https://www.vjmedia.com.hk/articles/2018/01/30/176084/就算你再好,一樣有人唔會珍惜