你哋有冇聽過綠帽反噬定律?

 

**警告 Warning :此文章已被存放於海拔一萬米嘅道德高地,經常派帽出軌嘅撚屌慎入。Btw,請勿對號入座。

 


 

戴綠帽,相傳起源於春秋時期,根據明朝典籍《七修類稿》所記載,當時依靠妻子賣淫肉金為生嘅男人都會一律戴上青色頭巾以作識別。

呢種充滿眼淚同屈辱嘅狀態一直係熱戀男女嘅禁忌話題,係眾人避之則吉嘅邪惡名稱。

就好似佛地魔咁,大家唔願意自己撞到,亦唔希望自己中咗呢種愛情酷刑咒。

大家都害怕,儘量避免談論,但呢種背叛行為又確實存在。

放心,今日我唔係想討論自己嘅親身經歷賣慘,我係想講下因果報應呢個課題。

先問大家一個問題,你哋有冇聽過綠帽反噬定律?

未聽過唔緊要,小弟解釋下。

我識得一個朋友,嗯,姑且叫她J小姐吧。J小姐平時冇咩嗜好,最鍾意就係煲韓劇同睇孽念深。

將大導演洗腦愛情金句奉為人生真理嘅J小姐換畫快過保特,背後啲人稱呼佢為西隧女神,嚟歌頌佢嘅戰績。(個名點嚟自己諗。)

啊!唔記得咗,佢仲有一個嗜好,就係將佢啲男朋友變成史力加,往往未夠一年,佢嘅伴侶就會由頭綠到落腳指尾。

有趣嘅係,佢成日同第二個男人偷情,亦都成日中大伏。就係當佢為咗小鮮肉,撇甩舊情人嘅時候,往往都會發現新對象原來都係個大滾友,轉頭又傷心離場。

J小姐派出去嘅綠帽,就好似回力標咁,一定會飛返落自己個頭度。

如是者,J小姐彷如墮入咗永劫輪迴。紅杏出牆,溝新仔,被背叛,分手,新關係…… 無限loop,一直到世界的末了,阿門。

吊詭嘅係,當我喺露比星期二,同朋友分享呢單趣聞嘅時候,幾位死黨都表示自己都識得一啲咁嘅人。

「有呀,有呀。賤人Dicky 咪背住老婆溝大陸妹,點知原來條女有性病㗎,仲係萬人斬添。」收卡暖男阿強為大家加添了花生。

驚人嘅係我哋發現身邊都不斷發生緊綠帽反噬定律,呢單野仲奇妙過曼德拉效應。

演藝界方面,相信大家都聽過中國演員王寶強嘅慘痛經歷。佢老婆馬蓉同經理人合謀想分咗佢副身家,然後雙宿雙棲。點知後來發現呢位經理人瞞住馬蓉,喺出邊同好多個女伴開房。

歷史界方面,著名代表有唐太宗李世民。佢曾經試過撬佢細佬元吉嘅牆腳,送帽畀人帶之後,晚年都有報應。就係佢最寵愛嘅武媚娘同太子李治私通。

生物界方面,當然就唔可以唔提海洋公園嘅樂樂盈盈,呢對夫婦本來非常恩愛。但好景不常,盈盈因為參加咗全國大熊貓繁殖計劃,竟然係四川,同津柯自然交配咗5次。其後,臭MK津柯就冇再理過盈盈。

盈盈以為懷到孕好開心,點知最後都係流產收場,逃唔過綠帽反噬定律嘅制裁。

究竟點解呢個世界會出現綠帽反噬定律呢?!點解出軌嘅人有好高概率,落得慘淡收場?

真相只有一個!!

我而家就嚟剖析吓呢種現象點解會發生。

 

原因一:奸夫淫婦易生情變

我哋發現派帽俠往往同新partner 都唔會開心得好耐。佢哋會因為某啲事爭執,同平常愛侶一樣鬧交,冇咗以前嗰種燃燒不盡嘅火花。

為何會咁,答案好簡單。因為佢哋嘅愛情基礎建基於一個字,「偷」!

「偷」意味住佢哋相處嘅時間唔會太長,亦都代表佢哋無辦法認識到出軌對象嘅真實一面,對呢個人冇充分嘅了解。

可能因為新鮮同刺激,大家嘅引擎Engine都開到㷫烚烚,彼此只係見到對方嘅好處,對方嘅浪漫同細心體貼。

但係一旦呢對奸夫淫婦有咗名份,多咗好多現實問題要處理,感情就會迅速降溫。幾時結婚?點解呢個人好似冇乜上進心?之後,各種人類劣根性就會走返出嚟,所有缺點浮面,最後分手收場。

Part time 變Full time 點解咁難頂?因為唔做Full time,你點知原來公司個水機成日壞,上司係變態癡漢,公司同事係八公八婆?

Part time 變Full time 係多數會出事。因為從今以後你就要OT苦幹,感情亦都一樣。

 

原因二:真理必勝,正義長存

無論出軌者點樣辯護,都冇辦法否認有外遇就係傷害咗自己身邊最親近嘅人。

背上這個最壞罪名,肯肯定身邊嘅親朋戚友唔會個個都認同你。呢個都係你嘅危機。因為你唔知幾時會有人起你底,將你嘅事唱通街。

更恐怖嘅係,呢個世界係有連登偵探嘅存在,佢哋最痛恨嘅就係負心漢同淫婦。你嘅一時貪玩,好可能令你身敗名裂。

你嘅生活圈子都可能會窄咗,承受無限大壓力,咁樣生活又點會順暢如意呢?

當然你可能會話,全部朋友都同我一樣mindset 喎,冇衝突呀。咁我真係恭喜你啦!成班賤人,坐埋一枱,樂也融融。我只好祝福各位尋找STD之旅順順利利。:0)

 

原因三:姣婆遇上脂粉客

物以類聚,人以群分。出軌嘅朋友留意返。人係好自然畀啲同自己有相似特質嘅人吸引。

所以富家女會愛上二世祖,MK妺會同金髮型男一齊。同樣道理,西隧女神就會搭上蘭桂坊USB。

你嘅道德界線無限低,你嘅偷情對象亦都同你一樣。佢明知你有伴侶,都肯接受你嘅追求,你估佢能夠有幾專一?有幾忠誠?

佢同你一齊,係認可咗愛情可以好多可能性,覺得背叛偷食唔係咩大不了嘅事,接受複雜嘅男女關係。

所以佢都可以為咗一個更加出色嘅人,去放棄你,佢係唔會有任何道德枷鎖,亦唔會覺得自己錯。

咩話?佢鍾意你係因為你性格好,體貼又善解人意,你哋係真愛唔會分開?咁如果佢遇到一個比你更加細心,更加小鳥依人嘅對象呢?

你覺得呢個忠誠度低過魏延嘅人仲會唔會對你一條心?佢直頭一拳打你入馬里奧世界,等你試吓做Luigi 啦。

最後總結,我知實有人會話「感情無分對或錯」,我想講呢句說話真係難聽過粗口。陸先生一介斯文,就最撚憎人講Foul language。

我想同認同「感情無分對或錯」呢句說話嘅朋友講聲……

我屌你啦!你一句感情無分對或錯就派帽,知唔知你個前度隨時會因為咁唔再相信其他人,唔夠膽去戀愛,亦都要面對其他人嘅流言蜚语。

點解對方要因為你用下體諗野,就要承受咁嘅傷害呀?

點解好人好姐,唔可以結束一段關係,一單還一單,之後先去識其他人。冇理智控制唔到?咁你同街邊發情嘅唐狗有咩分別?

人之所以係人,就係因為我哋有辨別對錯,分清善惡嘅能力。做人就唔該有返做人要有嘅界線,學識為他人設想。

剃人頭者人亦剃其頭,派人綠帽者,其頭亦必發青光。

我在此衷心祝福每個惡意出軌者他朝君體也相同。條路自己揀,仆街唔好喊。

 

#我就係偏激咁又點

#你當我是道德撚吧

#嗱我冇針對某某KOL㗎

#下篇寫返啲理性文調劑下

 

 

作者:陸子瀧

陸子瀧
政治太複雜,愛情太混亂。為了消除政治智障,促進浪漫主義,讓我們一起來研究這人生兩大課題。FB專頁: https://www.facebook.com/lukchilung/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 176130
Date: 2018-02-01 19:38:15
Generated at: 2020-05-25 15:26:50
Permalink: https://www.vjmedia.com.hk/articles/2018/02/01/176130/你哋有冇聽過綠帽反噬定律?