你最光輝的一刻在何時?

 

學界籃球精英賽曲終人散,呢壇嘢對於喺體育版工作嘅我,令工作量急劇增加不在話下,煩到嘔先係重點。然而,儘管係咁煩,我都為一眾年輕人而高興。因為,我都曾經年輕過,我都曾經喺中學時代為運動著迷過。

每個人玩運動都有唔同嘅原因,有啲人為興趣、有啲人為咗滿足屋企人、有啲人為咗埋堆,有啲人係為左溝女等等。但我覺得令人會繼續走落去嘅,係個份成功感同榮耀,倘若你玩一樣嘢玩極都係咁上下,其實好難有恆心繼續落去。中學生運動之所以令人著迷,就係當你只係一個脾氣差到爆嘅mk,又或者只係一個暗瘡毒男,更甚係一個不收篇幅嘅小肥妹,喺呢個凡事講成績定生死,講品格操行嘅地方,你都搵到一樣嘢能夠贏過人地,令夠證明自己,讓人仰慕祟拜。

對唔住,原諒我用功利嘅眼光去睇呢件咁浪漫嘅事。中學生運動的確有一種浪漫嘅氣質。例如我親眼見證過有男仔因為贏唔到金牌,決定將銀牌送俾嗰個同佢晚晚傾好幾個鐘頭電話嘅女仔,然後自己搵個隱閉嘅地方自閉,嗰個女仔就不斷喺運動場問人佢去咗邊,單睇文字已經夠浪漫,已經有畫面吧!依家望返向後,呢啲事係不堪回首,覺得戇居。但學林海峰話齋,呢啲咪就係青春。

每個玩運動嘅人,都追求一個光輝時刻。我嘅光輝時刻有啲遲,喺中五嘅畢業盃西瓜波班際比賽。嗰一刻,我準備射一個罰球,放眼望去,操場四周都坐滿人,而各個樓層都企滿睇波嘅人,我從來無諗過自己踢波會咁多人嚟睇。儘管嗰一年我只係拎到季軍,但個段時間只要小息、lunch,或者放學去自修室,撞到唔太熟嘅人,都會有人行埋黎講兩句加油,話你都幾好波。嗰一刻,已經係我嘅光輝時刻。

你嘅光輝時刻係咩呢?學櫻木花道話齋,我最光輝嘅時候,就係依家。無論班際又好、社際又好、學界又好,甚至代表香港又好。你覺得嘅光輝時刻,就係屬於你,不分大細,不講級數,一世你都會回味,其他人都唔可以多嘴。

我唔知道仲有幾多中學生會睇到我呢篇文,如果你咁好彩睇到,我希望你會為咗你嘅光輝時刻去盡。未來,你都係打死一世牛工,搵朝唔得晚,再練習你都唔會做到職業手。或者你會諗,咁咪好戇居。戇居嘅嘢,留係青春做,咪最適合不過。唔通等到個個諗緊買車買樓個陣,你仲同人講我想練波想訓練咩?

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 176219
Date: 2018-02-06 06:37:59
Generated at: 2022-07-07 02:26:42
Permalink: https://www.vjmedia.com.hk/articles/2018/02/06/176219/你最光輝的一刻在何時?