有種秘書,係會被成team 人輪_

 

唔知係唔係物以類聚,之前做咗一排保險公司秘書,突然識咗一堆同行(唔計自己team)。網友又有,飯聚識嘅又有;連去做個facial,傾開計先知原來個姐姐以前都係做保險秘書。

聽聽埋埋,間間公司條條team嘅情況都大同小異,剝削勞工嘅程度都一樣令人大開眼界。

 

根據我聽返嚟嘅,秘書主要有兩種。一種係team leader出錢請嘅,畀全team嘅人share嚟用;一種係私人請嘅,阿旺財出錢請你,你就淨係幫阿旺財做嘢。

私人秘書冇咩好提啦,同行業冇咩關係;我主要想講下啲畀成team人輪嗰啲。

除咗啲一般文書嘢、幫啲客約時間睇醫生、整powerpoint砌proposal、幫啲agent book餐廳呢啲正常工作之外,其中一樣佔好多時間嘅工作就係跟啲agentsss出去簽單。

亦都係我最唔明嘅部分。

 

我好懷疑啲保險agent一係文盲,一係有學習障礙。

個客你識返嚟搵返嚟嘅,張單又係你傾返嚟嘅,去到簽名臨門一腳,你自己同佢簽單都好應份,點解要帶埋個秘書去呢?有啲直情自己唔去淨係叫個秘書去。

據說係有啲agent唔識睇中文、或者唔識填form唔知要喺邊度簽名、或者爭取時間見其他客(唔蒲頭嗰啲),甚至乎係對啲product details唔熟悉,所以就搵秘書幫手。

好啦,我當啲agent係蠢到幫佢喺張單上面畫曬記號都會簽漏名,真係要秘書出手喇,咁有咩問題呢?喂,請得秘書就係為咗唔想煩啲文件嘢,個秘書收得人工就要做嘢㗎啦。

其中一個問題就係,啲agent簽單好多時都唔係喺office hours簽。

 

而家好多保險team都開發大陸市場啦,自不然簽單都少不免要上大陸;另外有啲agent鍾意同啲客摸住酒杯底簽,摸下摸下分分鐘零晨三四點先畫到隻龜。星期六日都會繼續叫個秘書繼續準備資料同隨時ready出門。可想而知份工係幾剝削員工私人時間。

好喇,咁啲秘書O咁多T有冇補水呢?係冇㗎!冇㗎!冇㗎!!!

咁秘書嘅底薪係咪好高呢?係都好啲,另一個問題就係工時咁長而人工低到喊呀。

 

我都係入咗局先知,首先保險秘書嘅學歷要求唔高,中學畢業就做到(我之前條team個大秘書中五畢業都冇,咁當然啦,呢個學歷都做到大秘書,需要嘅就係其他技能啦),再來人工一般只係一萬中游,即係15k左右,聽過最低嘅只有11k,最高嘅都係得19k。

喺保險秘書界,二字頭嘅人工已經係天價。

至於bonus同雙糧呢?暫時未聽過有bonus,13個月糧都係部分team先有,係唔係年年有人工加/加幾多人工,都係睇你老細良心。

咁福利呢?喺保險公司做,有關保險嘅福利係咪會完善好多?唔係㗎,我聽返嚟嘅都係得啲普通醫療㗎咋,即係感冒傷風睇醫生有得claim嗰啲。其他啲意外保呀危疾保呀,都係要靠自己供㗎。

 

換言之,當啲agent唔識字又懶到唔願意學習新事物,連啲product details都唔肯記熟佢而要靠啲秘書幫佢同個客介紹先簽到一張張單返嚟,繼而做到MDRT每年起碼幾十萬佣金、鍾意就去下旅行嘅時候,啲秘書係一蚊佣金都冇,每個月依然係拎住嗰15k上下嘅人工,過住有返工冇放工冇假放嘅日子。

不過,都要強調唔係個個agent都會叫秘書陪/幫自己簽單,只係有能力自力更生嘅agent一半都冇,三成都唔知有冇。

當然,有人願打有人願捱,喺商業社會「搵食啫」,冇良心從來就不是犯法der。

 

我唔知各位秘書選擇留喺呢個冇晉升前景aka冇career path嘅行業為何,會唔會係以為自己冇得揀呢?做慣咗唔想轉?度度都係咁差㗎啦,得中五學歷做得啲咩丫?blah blah blah⋯⋯

如果你唔係對保險公司情有獨鍾嘅,不如試下apply醫管局?

 

我都係早排從朋友口中得知,如果look for平穩安定嘅文職,醫管局其實唔差。

你知公營機構嘅人工一定好透明,你上醫管局個網search下就有,定咗幾多就係幾多一定唔會海鮮價(當然都唔會因為你多人一兩年經驗有人工加)。

我見唔少二級Executive Assistant(有啲posts得英文版,如果有心搵工嘅睇少少英文啦)都只係需要中學學歷,三年contract,人工15k起跳,每年按薪級點加人工,目前頂薪18k,三年之後有機會升做一級,就算唔升你都唔會炒你(除非你真係好有問題啦)。

Job duties都係普通文職嘢(除咗寫明patient care嗰啲要執屎尿之外),準時放工(萬一OT都必定有補水),而且因為係醫管局員工,睇醫生同攞藥(包括標靶藥物)唔使錢之餘,都唔係同一般市民排同一條隊aka快啲有得睇醫生,保險都慳返(當然你鍾意自己另外買多份醫療睇私家都冇所謂)。

悶就一定㗎喇,但做保險秘書咪一樣咁悶,起碼準時返工放工同醫療福利好囉,同埋醫管局係預咗蝕錢嘅公營機構,唔會因為市道同業績呢啲嘢影響你份人工。

 

醫管局嘅文職本身已經等人用,奶媽又啱啱確定會畀多五億用作增聘人手。

除非你老闆同啲agentsss對你好好、好尊重,人工以外畀咗好多令你唔捨得走嘅嘢你,或者你份人工同你嘅工時好合理地成正比,如果唔係我睇唔到留低嘅理由。

 

 

關於作者:一百八十呎

一百八十呎
既然有人表演瞓劏房,全天候住劏房的都是行為藝術家。

我有回應

則留言

閱讀後覺得好,請多多讚好及分享~:)

其他熱門文章

  • 【真人真事】「我知道怎樣讓那些女人高潮,我每一次都成功。」 by 阿痞
    阿旦講到一半,也許發現我面無表情,也沒怎麼參與對話(應該是參與不了),突然笑了一聲,吐了一口煙,一臉意味深長地盯著我道﹕「你好冷靜,真是個成熟的女生。我喜歡女生成熟。」雞皮……疙瘩……掉一地………
  • 【塔羅個案】年輕女性客戶努力儲錢,只希望將來間屋買大啲比男朋友擺Gundam by 神婆
    Cherry 由大學畢業後就開始搵我問工作方向,到而家不知不覺第五年了。出野做野無幾耐,佢經朋友介紹認識一個宅宅地嘅男朋友,兩人皆從事金融行業,人工尚算不錯,加上理財有道及各種原因,兩人加起來略有積蓄,近日男友暗示有結婚之意。…
  • 【跳樓啦】唔小心講多左 LEGO跳樓機今年殺到?! by 阿九
    LEGO 過山車熱潮都仲未減退,大家都仲諗緊點安置佢嘅情況下,喺德國嘅 LEGO 銷售網站 Brickmerg […]…
  • 香港人,返工返到傻L左 by 哈姆太狼
    話說呀輝是應屆畢業生,正在一間剛正名的大學裡面做辦公室助理。至於在前文提到他準時下班需要向上司提交合理理由,這不是我編的,而是真人真事。呀輝的工作合約是朝九晚五,但每天都要加班到七點才能下班,最重要的是加班還沒錢。「Quit左佢啦!伏工。」…
  • 女朋友話我當佢係洩欲工具 by 哈姆太狼
    最近女朋友拒絕行房,令我百思不得其解。明明思前想後也沒有得罪這位主子的地方,難道是.....「黎m呀?」我摟著她。以我的經驗,只要我抱她抱得緊緊的,總能大事化小,小事化無。「吓⋯⋯冇呀。」「咁做咩唔想呀?」「唔想咪唔想囉⋯⋯」她把頭撇到了一…
歡迎讚好我們的facebook page,免費資訊源源送上。