有咩理據要求全世界嘅人類都唔可以食狗?

 

恭喜發財,新年流流,今日我哋嚟講啲喪盡天良慘無人道嘅唔老黎嘢。

適逢狗年,Now新聞台早前就整咗條短片,由世界各地忠心到流芳百世嘅狗狗,講到世界各地食狗肉嘅情況,去到結論係「爭取全面禁食狗肉之路,似乎很遙遠。」

又係呢個拗極都沒完沒了嘅議題,正所謂狗狗這麼可愛怎麼可以食狗狗,啲素食撚同動保撚一見到個題目都已經扯扯地準備戰鬥發射爆火喇係咪?
嗱,講明先,我覺得食狗肉一啲問題都冇。來,盡情顏射我吧。

首先,素食主義並不在討論範圍內,呢篇文嘅前設係大家都唔反對食肉呀(去去素食撚走)。
好喇,去返最老土個問題,點解豬牛羊係食物,貓貓狗狗就唔可以係食物呢?縱觀唔同嘅文章,加上同真人sss嘅討論,講到尾核心只有三個字——情意結。
因為喺香港成長,由細到大個社會都會同你講「狗係人類嘅好朋友」,所以你點可以食自己嘅好朋友呀?
喂但唔係度度地方嘅文化都係狗狗=好朋友㗎嘛,有啲地區嘅人同狗就係冇咁深厚嘅情感牽絆㗎啦,人哋嘅價值觀就係狗=狗,咁食狗又錯咗喺邊?

有啲羊群人云亦云,見個主流鬧人食狗佢又跟住鬧,加上惹人生厭嘅北方強國作為食狗大國,反對食狗可以加大譴責嘅本錢之餘,仲可以為自己加上愛心爆棚嘅光環。但有冇思考背後嘅理據又係另一回事。
好喇,佢哋最喜歡嘅泡菜國,普通街邊餐廳都可以食到狗肉,可能佢哋最喜歡嘅oppa同女神平日都係若無其事地大口大口送狗肉入口,又唔見佢哋因為咁樣而批判韓國冇文化、抵制韓國?

自己奉行一套守則,由得人哋奉行另一套守則,呢啲叫尊重;但自己奉行一套守則,然後逼人哋跟自己嗰套,人哋唔跟就追擊譴責人哋,呢啲就修煉成撚㗎喇。
素食撚、動保撚、女權撚、環保撚同最人多勢眾嘅耶撚之所以成撚,就係因為佢哋已經將信念變成信仰之餘,仲要排斥異己啊。
你自己唔食狗,強國人民同oppa都冇逼你食啦,咁我哋又有咩理據要求全世界嘅人類都唔可以食狗?

好喇,如果你想講某啲殺狗嘅手法好殘忍,例如強國嘅玉林狗肉節,或者馬來西亞嘅殺狗隊,呢個係動物權益嘅問題,關乎嘅係所有動物,狗的生命沒有特別高尚。
輕輕講兩句,我都反對不必要嘅殺生以及令動物死前遭受不必要嘅痛苦。但我聽過素食者講,先不論成本,無論人類嘗試以咩方法屠宰動物,即使係安樂死、迷暈佢再喺睡夢中屠宰佢,研究顯示其實啲動物一樣會知自己即將要死,一樣會承受精神上嘅恐懼。
所以,除非一刀切任何肉類都唔食,否則我哋只能夠盡量將動物死前嘅身心痛苦減至最低。
(題外話,我覺得「魚素」呢個term都幾on9,食得魚就同素食冇關係,呢個唔係哲學問題係語文問題。)

好嗱,咁我本人食唔食狗,或者會唔會想食狗呢?
唔會喎,無他㗎,情意結囉。我由出世到五歲之前住嗰度周圍有好多唐狗,隻隻都高過我,我成日都同佢哋傾計,所以自細都冇驚過狗仲好鍾意佢哋。成日都FF中六合彩頭獎就搬大屋,到時一定要領養隻大狗。
雖然我好鍾意狗,但唔代表我有權強逼全球人類認同我嘅喜好啊。

最後,適逢狗年,謹祝大家狗年身心健康,自己同身邊嘅人類都善良頑強如狗。

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 176696
Date: 2018-02-22 05:43:50
Generated at: 2019-12-16 19:16:15
Permalink: https://www.vjmedia.com.hk/articles/2018/02/22/176696/有咩理據要求全世界嘅人類都唔可以食狗?