香港籃球隊啱啱同大陸打左場世界盃外圍賽

 

你知道嗎?香港籃球隊啱啱同大陸打左場世界盃外圍賽。

修頓,我曾經入過場一次,係睇朋友打Nike league,大概都十年前了,之後就再冇入過去。今次重遊,驚訝嘅係,呢度真係十年如一日。唔好誤會,呢個唔係讚美。香港嘅籃球聖地居然無因時代進步過,幾百個座位,男廁都係得一個尿兜同一個廁格,難怪籃球運動發展亦係咁。

如果唔係因為工作,其實真係好難知道有呢場波,需知道籃總個網一星期前仍然冇任何資訊,到有資訊,籃總亦無任何社交平台可以畀我share出去,唔通真係要我print srceen你地個純文字網頁擺上FB宣傳?我好多已經算緊貼本地運動嘅朋友,都係睇我擺左相上ig先知有呢場波,話係零宣傳都不為過。

 

 

門票要到比賽當日下晝四點喺修頓現場先買到,究竟我生活係咩年代?要不是我off根本就唔會咁輕鬆買到飛。都唔苛求你有網上賣飛,早兩,三日喺修頓開賣得唔得呢?又或者唔好四點先賣又得唔得呢?

講咁多賽前,講到場波未。58:111,職業隊對業餘隊。我唔係踩香港,實情係香港只有一支職業籃球隊,而人地有好幾個CBA嘅頂級球星,年薪隨時過千萬人仔。咁足球夠迫和到人地喇?問得出呢句嘅人,試下自己落街場打5分鐘全場先再講嘢。

抺咗比數,今場比賽有唔少香港球員都打得好。惠龍兒北上浸咗一年,真係好有大將之風,低位打易帝都未驚過,身為中鋒仲走埋快攻,真係超誇張。李琪嘅三分一向都知佢勁,今日見到佢出手嘅冷靜,同埋馬步之穩,如果唔係前幾日要飛黎飛去打波搞到體力未回復,表現會仲好。可能係全場最矮嘅梁民熊又係犀利,貢獻幾球3分不在話下,仲可以上籃搞到易帝goaltending真係拍爛手掌。蔡再懃一開波就兩犯,之後放開嚟打,表現都唔錯。

咩政策配套呀,籃運發展呀、青訓呀,起新球場個堆老套唔講喇,講咗又係得個講字。從我角度,香港籃球比足球,更少人關注,更who fu_king care,但都可以交到咁嘅功課,我個人就覺得呢80蚊好抵玩,幾時有下次?mark低喇,7月1號,香港會主場對南韓,到時見。

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 176948
Date: 2018-02-27 06:05:20
Generated at: 2020-06-04 00:41:37
Permalink: https://www.vjmedia.com.hk/articles/2018/02/27/176948/香港籃球隊啱啱同大陸打左場世界盃外圍賽