我今年二十歲,醫生話:「你有皰疹,即係性病呀。」

 

「你有皰疹,即係性病呀。」醫生話。

當下我本能反應咁講咗一句:

「吓,我同女人搞過野咋喎。」

「咁又點,不嬲男定女都要安全性行為嫁啦。」醫生即時應對作出反擊,相信佢年中都見唔少我呢種戇鳩病人。

我,好好地一個女仔,踏正二十歲,花樣年華。

性病呢嫁野平日都係起Google search下,都明白自己係屎忽痕,無野搵野黎驚。但由我聽到醫生個句,喺個一刻,我真係嚇到鼻哥窿無肉。

我算安守本分,有固定伴侶,無玩3P無SP,咁都可以中招。算點?

醫生話口未完,又再補多一刀:「有冇打算驗埋梅毒同其他性病?」

縱使個一刻,我個心一萬個唔信自己有病,好嬲點解係自己中招,但最後我都係死死地氣搭Lift上去驗全餐。

大佬,我怕死呀。

睇到呢度我同大家講返清楚少少先,最後係誤診,全部results梅毒愛滋皰疹淋病都係Negative。

在此大致交代下起因,只不過係同女友去日本旅行,係酒店房玩得太激,下面整損咗。
去到海灘玩浮潛又唔醒起,海水引致傷口發炎,繼而發燒無力外陰潰瘍死人野乜乜柒柒。

而收到醫院份Report之前,我係足足等咗一個月。

一個月入面其中一個禮拜,瞞住香港所有識我嘅人,我自費加女友補貼嘅情況下,偷偷地搭飛機回港睇醫生,並係airbnb租咗位於銅鑼灣嘅唐樓。

呢段時間,我自己一個人住。日頭就對住劏房個天花板喊,喊到厭就google search個病,點防止傳染畀其他人,點樣減少復發。妹完Google,夜晚就妹下大陸百度吧啲Post。(香港比較少網民討論皰疹)

個陣突然見到有一班患有皰疹嘅網民留好多言,紛紛鼓勵安慰大家,講咗好多個控制病情嘅方法,提供曬餐單,列埋美國Research。本身我都好怕大陸,唔信大陸啲野,但個一刻見到佢地嘅留言,對軟弱無助嘅我黎講,係一股暖流,算係雪中送幾舊炭。

以前細個就成日睇某登嘅Post,見到有文員仔,都不禁會諗,當自己真係有性病,個心態會係點?

宜家諗起個陣時,到真係黎料。
其實我最最最最擔心唔係自己個西幾時再生曬水泡,幾時再潰瘍,幾時再沖涼柯尿都痛到喊。
我最怕係傳染畀身邊嘅家人朋友,最怕佢地為自己嘅病傷心、擔憂。

經過呢單鬧劇,因為自己嘅切身經歷啦,明白到其實班患者最擔心最在意唔一定係病情,係佢地一直長久建立嘅社交圈、社交生活、人與人之間嘅信任會變成點,會唔會因為自己嘅而係剎那間崩塌。

而且都同時感受到,香港地,性知識仲係好落後,包括我自己。

網上好多人認為只要個女人食咗避孕藥,就可以盡情扑野,任食下仔仔囡囡都唔怕。而有更多人亦都唔知,生飛滋唔好幫人口交。

仲有人話搞完野沖涼可以防止懷孕,好鬼離譜。

明明Sex呢樣野,基本上個個人都要Deal with。
但由小學到中學,上過嘅性教肓堂五隻手指數得曬。
我可以同大家講,我九成嘅性知識,都只係靠自己實踐,仲有PornHub,而我到今日仍然係好多野唔曉。

由衷地感謝個天,畀我有呢次經歷。
如果唔係,我應該仲係以前個個,覺得女人同女人搞野永無死嘅戇鳩。

平日唔睇唔問唔傾唔學,唔通真係要醫生同你講個刻先醒先科普咩,Safe sex is great sex 呀。

 

 

作者:阿支阿佐摩洛哥

阿支阿佐摩洛哥
一個麥記招牌跌落嚟都壓死幾件、 普通到唔普通嘅濕鳩港女。 於情路上拐下拐下、浮浮沉沉,日頭就聽王菲,夜晚就聽孫燕姿。 因為太鍾意阿支阿左,所以決定喺呢個空間一洩口頭之慾,同大家鳩噏當秘笈。

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 去到英國做警花(自稱),見盡社會光怪陸離。 by 英國警花
    早排見d移民谷,個個都好擔心治安,人人好似會抬個夾萬日日出街等人打劫咁款,好似治安除左偷竊打劫外就無野要考慮。講到治安,你有冇諗過英國好多警力其實花了在照顧精神病人身上?…
  • 解鎖記 by 健吾
    在泰國演藝圈工作的朋友說,聽說泰國演員之間,都會看不起「拍BL走紅的演員」,會覺得他們沒有演技,用旁門左道上位。只是,在這個時代,如果他們仍看不穿《sex and the city》中,samantha 說的現世代走紅秘笈:「首先是gay,…
  • 【PR】LEGO Bricktober 與你《共闖遊「樂」園》 四款限量版機動遊戲歡度 10 月節慶嘉年華 by VJGamer
     2020 年不經不覺已渡過大半年,準備踏入 10 月之際, 意味著 LEGO® Bricktober「玩」樂 […]…
  • TikTok 其實好重要 by 毛言地
    每個社交媒體都會有唔同嘅低能及危險玩意,就好似Facebook早前都有出現藍鯨遊戲,不過「危險」始終唔係Facebook嘅主流,大家上Facebook嘅主因唔會係為咗睇藍鯨遊戲比咩任務你。但TikTok當中低能嘅影片基本上係主流,咩Skul…
  • 「作為一個女仔識做家務係一件好可恥的事」 by 瓔庭
    「作為一個女仔識做家務係一件好可恥的事,你要同我記住。」細細個便響阿媽度學識呢句說話的Pat一家很完美的實行了這個「理論」,佢係一個十指不沾陽春水的大小姐。家中清潔、煮飯什麼的都是Pat的老竇同阿哥去做。甚至學校有家政堂寧願肥佬都唔肯去做任…
歡迎讚好我們的facebook page,免費資訊源源送上。

文章資訊

ID: 177466
Date: 2018-03-11 05:46:58
Generated at: 2020-09-20 21:09:27
Permalink: https://www.vjmedia.com.hk/articles/2018/03/11/177466/我今年二十歲,醫生話:「你有皰疹,即係性病呀