儲乜儲物點解唔儲錢?

 

 

對於有儲開嘢,例如儲玩具儲香水儲舊相機儲手錶之類嘅人,成世人應該最怕另一半問呢個問題,點解你儲咁多嘢都唔儲下錢呀?

筆者有個儲咗幾十年相機鏡頭嘅uncle,佢平時喺我哋面前成日吹噓自己啲珍藏幾犀利,有時佢會為咗一支鏡頭,專程飛去外國搜尋;又有時佢會為咗喺網上bid一支鏡頭,大費周章咁翻譯啲俄文網站。雖然筆者對相機鏡頭無乜認識,但都睇得出呢位uncle作為一名收藏家,對自己嘅珍藏十分有熱情,而且佢喺同好眼中都有啲江湖地位,受人敬仰。不過,威水背後,佢呢幾十年都會仲為點樣過海關感到困擾,一般通關就有文件可以填姐,但當你要過嘅係屋企嘅海關,即係佢老婆。雖然唔使報關稅,但要說服到家中海關畀你運新寵入境,真係唔易。你以為佢無試過「走私」入境咩?Uncle話:「其實我都唔明,明明我老婆完全唔識相機,對鏡頭又完全無興趣,但唔知點解我一買咗新鏡頭佢即刻會知。佢個鼻仲靈過啲緝毒犬呀。」Uncle嘅證言話畀我哋知一樣嘢,老婆呢種生物,佢或者對你所好完全無認識,但屋企作為佢嘅地盤,多一樣嘢少一樣嘢佢都會即刻知道,唔好諗住走私入境呢招行得通。

你以為Uncle係個別例子,係佢老婆特別嚴?以筆者喺啲網上二手物品買賣區上觀察,好多師兄放嘢嘅理由都唔係因為周轉不靈,而係因為屋企隻「老虎」要求。以玩具為例,成日見到啲大大盒嘅機械人玩具發售,賣方好多時都係因為不幸畀老婆發現又買新嘢,又或者因為屋企細而被迫賣咗啲心愛之物。去到呢啲時候,你會發現個世界都唔係太差,因為好多身同感受嘅同好都會肯接收件玩具,仲因為見對方係被迫賣出去而唔壓價。呢啲係咩?呢啲係愛呀哈利!作為同好,大家都明呢一種苦況同賣仔無分別,正所謂賣仔莫摸頭,所以交收之際大家都唔會講太多嘢,啲有良心嘅同好亦都唔會左check右check,務求畀賣家盡快完成呢件傷心事。

講返當另一半問你「 點解你儲咁多嘢都唔儲下錢呀?」,呢個問題究竟點答好呢?筆者只可以畀一個建議,照直答啦。老土啲講句,人生有啲嘢真係無得退讓,對收藏者嚟講,件收藏品嘅價值好多時唔可以用面價去衡量,你以為一個名錶收藏者最愛嘅錶一定係幾十萬嘅機械錶啦,但對佢最有意義嘅,可能係佢中五嗰年生日佢阿媽送畀佢嗰隻精工。但雖然隻精工錶係對佢最有意義,但係咪其他收藏品係可以隨時轉賣嘅呢?其實除咗有意義之下,可能A名錶係佢第一份糧買,b名錶又係佢第一隻買嘅伯爵錶,收藏者對收藏品嘅愛有好多種,好難取捨。所以當畀另一半問呢個問題之時,你只可以照直答,期望佢會明白,又或者期望當你每次都答呢個答案,十年後佢會明白,照算唔明白佢都學下接受。有啲人話一生只想搵個肯陪你食麥記嘅女人,但有時搵到個肯接受你喜好嘅另一半,其實仲幸福。

 

 

關於作者:沾屎

沾屎
花生日報創辦人之一,八十後講故佬,自稱人類行為觀察者。喜愛觀察人類,也愛抽水。 FB PAGE: https://www.facebook.com/comeonjames97https://www.facebook.com/PeanutsDailyHK

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。