香港樂壇又死?你做咗幾錢帛金?

 

天后楊千嬅返大台拍劇,令我諗起佢對上一次喺大台拍劇已經成18年前,當時套劇《美味情緣》嘅劇情係點我都唔太記得。不過就好記得當時主題曲同插曲都十分受歡迎,我到而家都記得點唱。而當時收錄主題曲嘅唱片仲炒到幾百蚊隻,你諗下本地唱片可以炒到幾百蚊,近年呢個情況真係比較少。係因為近年少咗好嘅歌手?定因爲香港人而家已經唔多聽歌?

早幾個月正值樂壇頒獎禮,最常見到係有網民話樂壇已死啦,以前啲歌好聽好多:之後又有人會話而家啲新歌手我真係唔識呀,真係一蟹不如一蟹。喂,你聽都無聽過啲新歌手唱歌,梗係唔識,唔知佢唱得好唔好聽啦。樂壇點解死死地呀?因為你都唔聽新歌,啲新歌手又唔係做神功戲,無人聽人哋點算呀?

其實唔使講都知,同幾十年前樂壇最興盛比,而家嘅歌手好難靠賣碟賺大錢,即係唔少歌手都要靠知名度去賣廣告而生存。聽過有啲老屎忽對此相當不屑,會話:「而家啲歌手都唔專注於音樂嘅,我嗰個年代啲歌手剩係跑下tour都買到幾層樓啦。」喂呀你講緊幾十年前幾十萬買到太古城呀嘛,你幾耐無買過唱片呀?不如你教下啲歌手光合作用,餐風飲露啦。喂佢哋閒時唔賣下廣告拍下劇咁點生存呀。

其實我最想都係覺得樂壇已死嘅人,肯用心去聽下啲新歌手。近年外國有個有趣新趨勢,喺Spotify呀Apple Music呢啲串流平台咁盛行之下,黑膠唱片竟然開始盛行,銷量十分唔錯。即係意味著科技點進步都好,有質素嘅嘢都係可以用傳統方法去流傳。我覺得香港樂壇只要有知音人,就唔會死,只要你肯去接受下新事物,一定會遇到新嘅心頭好。

 

 

關於作者:沾屎

沾屎
花生日報創辦人之一,八十後講故佬,自稱人類行為觀察者。喜愛觀察人類,也愛抽水。 FB PAGE: https://www.facebook.com/comeonjames97https://www.facebook.com/PeanutsDailyHK

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。