汪阿姐曾經都係女神

 

以前啲劇真係勁,又有故仔,作詞編曲又用心,咁多年聽番,都仲係覺得別有一番滋味。1980年,香港最盛既年代。

我唔係想又追蕪今昔,或者一切只能夠依書直說。《輪流轉》雖然都排出左強卡士(秋官,DID姐),但係果陣咁岩就係電視大戰,無線同麗的打到你死我活。依家人稱燈中之霸、滅世最後兵器、燈神界之首既蕭若元,果陣幫麗的寫出一套叫做《大地恩情》既劇,果陣竟然可以同無線既收視真正做到五五開。對於一向都有無敵慣性收視『六四比』既無線黎講,呢種打成平手既局面雖然未致於數字上係輸,但係從面子來說都可以係話慘敗。

雖然後來有考究指出,並唔係《大地恩情》真係勁到要腰斬《輪流轉》,但係始終無線咁多年都係靠條數去黐實啲廣告大客,一但大幅拋離既高收視率不保,所有廣告客戶即刻詐型壓價,對於無線既盈利影響應該都真係非同小可。因此你話直接又好,間接又好,《輪流轉》就播左十幾集就掟左去星期六播然後索性腰斬埋。咁無線點算好,梗係班救兵啦。而救兵係邊個,梗係依家成日都俾人話心都離一離既阿姐,汪明荃啦。

雖然依家人人都覺得阿姐都差唔多可以加入廢老行列,成日係啲咩經典流行五十年之類既節目仲出現,但講番轉頭,的確係,無線有咩頭暈身慶,次次搵阿姐出黎,就會搞得掂。唔怪得福將之名係不逕而走,甚至被一早公認為鎮台之寶,有住無可取替既超然地位。至於果陣既謝老四,亦都真係成個Chef Lemon 咁既樣,基因既野真係唔到你唔服架。所以《千王之王一出》,又即刻收復失地。果陣有競爭既電視台,真係過癮呀。

依家睇番相,阿姐果陣先三十出頭,風華正茂,都覺得靈氣真係迫人,一顰一笑都令人為之心醉呀(同埋果陣阿姐把聲無咁拆架係)。當然果陣係無文青女神既說法既。但老實講,確係屈機。

 

關於作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

我有回應

則留言

其他熱門文章

歡迎讚好我們的facebook page,免費資訊源源送上。