「前世鬧交,今世不和」呢種所謂嘅「分析」,你信唔信?

 

你幾耐冇係面書度睇野睇到笑左出黎?

我呢十幾日都冇。以前,係日日都笑得出架。點解呢?

大概係面書換左演算法之後,我覺得好笑既野,都screen 晒啦。或者係,面書想我唔開心,剩係睇d 無聊人開戰,哭波喪啦。

但最近,終於有一條新聞,係令我覺得,睇完真係人生好有意義架啦。

話說,故事係咁既

係台灣,有兩個歌手,都係大陸發展。一個係主持人黑人老婆范瑋琪,另一個係叫張韶涵。兩個都係大陸發展得好好地,但佢地兩個人呢,經常因為各種不合,而鬧上媒體版面。而有創意既台灣記者呢,就搵左個命理師,呢個命理師叫江嘉葉,聲稱自己開左天眼,於是就可以睇到兩個人既前世。

 

 

佢地兩個既前世呢,范范和張韶涵過去是仙女,負責送公文的工作,因年紀相仿成為好友,但卻因為一場送公文比賽,埋下心結。於是,就將仇怨,帶到今世。

因為切入點實在太有創意,或者係有啲網民覺得太過白痴。所以呢,佢地兩個呢單野,本來就不成新聞既。但由於而家大部份既新聞網站,要既只係點擊率。越白痴既新聞,就越多人廣傳。就係台灣既網路留言版度,引起極大回響。甚至將呢個「仙鬥」故事,重新改寫,加入左新角色。

個故事呢,係咁既。本來呢,「范仙女」原本在仙界地位不高,後來拉攏7仙女上位,涵仙女一開始就好夠義氣,處處提拔,但之後呢,被暗暗插刀,范仙女的計畫被當時同期的潔兒知道,潔兒忍不住出言相勸,結果潔兒被打入凡間,而另一個仙女靜兒被招攬力捧。之後涵仙女果然被暗算墜入滅仙洞,靜兒深知范仙女的手段,因此之後也離開,深怕自己成為下一個被推入滅仙洞的人。

點解潔兒,同埋靜兒呢?

原來,同范瑋琪同一間公司既,仲有兩個女明星,一個叫徐潔兒,另一個,就係903聽眾都有聽過既台灣歌手郭靜。成個故事,都係度影射范范、張韶涵、徐潔兒、郭靜四個女明星,搶奪公司資源,最後都爭不過范范,只好求去。

呢個故事一出,因為實在太白痴既關係,又被廣傳。而係面書呢,仲有一個event,叫「第一屆仙女送公文大賽」係四月一日進行。各路漫畫家、YouTuber,就爭相係呢件白痴既事上面,再抽一浸,再劈啲點擊率。

 

呢啲 9up新聞,用台灣術語講,都有啲無下限。而係香港,我覺得最有資格做點擊率女王既,當然係我敬愛既麥玲玲師傅啦。好似早排呢,2016年之前,英女皇伊利沙伯二世昨日90歲生日,英國駐香港總領事館更在facebook上載英女皇的出世紙,同時在附註中指,英女皇是在1926年4月21日凌晨2時40分出生。

 

麥玲玲師傅一睇「事頭婆」的命格。玲玲姐就屈指一算,指計返英國時間,事頭婆屬金,春天出生的她財運極旺,一生衣食無憂,是大富大貴之格局。

說英女皇的出生為魁罡(音江)日,有領導才能,受人敬重,「佢有兩個魁罡星,有一個已經好貴氣」,但她說魁罡星很霸氣,個人獨旺,子女及兒媳關係則會較差。

嘩,真係神算,簡直係先知啦。

當然,呢單新聞,亦都因為太好笑既關係,所以就會被廣傳啦。

 

面對呢啲咁既狀態既新聞,可以點做呢?

一笑置之?
加以廣傳,所以我地有更多呢類型既新聞?

 

同樣道理,最近係網路,唔少大學生、泛民支持者都係度「檢討選舉」。對我黎講,呢堆選舉分析,其實只有一句說話重要:邊個贏,邊個輸。其他既野,大部份都係臆測,或者係有目的而羅織出黎既所謂數據,等啲人以為佢係選舉KOL。

而大部份呢啲咁既分析,都只係得出一個結論:一個人比第二個人多票,因為佢做左 a/b/c/d/e,所以佢多票。

至於呢啲影響有幾大呢?有幾深?其實,亦都冇人去深究。

比如,本土派一直都覺得,新移民區,都係建制派老巢。中產選區呢,就一定幫泛民。呢啲咁既想像,其實仲中唔中呢?

而家,仲有咩分析係值得聽既呢?睇埋睇埋成百篇所謂分析,黎黎去去,都係跑得慢、無速度、唔夠快。對手贏,係因為佢強,你弱,嘩,真係多謝晒。

民心思變,已成事實,好多野,唔係你話改就改。

對我地呢d冇後台亦都手無寸鐵既人而言,睇住泛民節節敗退,仲有咩方法呢?

 

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 177653
Date: 2018-03-14 20:10:46
Generated at: 2022-01-19 06:17:16
Permalink: https://www.vjmedia.com.hk/articles/2018/03/14/177653/「前世鬧交,今世不和」呢種所謂嘅「分析」,你