而家老野先用Facebook嫁啦!我剩係用IG Story同Snapchat!

 

 

每次見到有D細路話:「而家老野先用Facebook嫁啦!我剩係用IG Story同Snapchat!」大家第一個反應就係:「我係咪老啦?要唔要裝返個Snapchat試下。」

但我個人好煩,做乜野都好,都要懶係有深度咁思考一輪。

所以我就諗,究竟點解而家D 00後會覺得Snapchat/IG Story好呢?究竟影完張相比完朋友睇之後24個鐘會自動刪除呢件事,有咩咁吸引呢?

我發現原因好簡單,呢個年代要「留底」太過容易,易到一個地步,大家對「留底」感到疲憊,於是24個鐘自動刪除嘅「即日鮮」先會大行其道。

我係一個老太婆,「留底」呢樣野,係我成長嘅年代難度係好高嘅。同朋友交流,我地有以下嘅方法:

 

1. 打固網電話煲粥

「留底」難度:******

如果你要記低電話講過乜,你要有一部可以錄音嘅電話(難),錄完之後會變成一餅細磁帶(貴),磁帶唔好好收藏會發霉(煩),拎返出黎聽要有個由細帶轉大帶嘅Adapter(已絕種),仲要有部可以播帶嘅錄音機(又煩又貴),最後仲要自己Index好,記底邊餅帶錄左咩(仲好嘥位)。

 

2. 親筆書信

「留底」難度:****

寫信要買筆買紙買信封買郵票用心機(攰),收到之後睇完要搵個位擺起(嘥位),收埋如果唔好好保存D紙會變黃,D字會甩色(煩),睇得多D摺口位會爛(無得救)。

 

3. 影相

「留底」難度:*******

影相嘅話首先你要有部菲林機(貴),有D相機甚至無自動模式,你要學識咩叫快門咩叫光圈咩叫對焦先勉強影到一張相(難),一筒菲林幾十蚊,影得幾十張(貴),D相要晒出黎先睇到,晒相又係錢(貴),晒左出黎要搵本相簿入起佢,如果唔係一定會唔見同唔記得幾時影(煩),D相簿又大又厚又阻訂(嘥位),雖然有相簿保護,但最後D相放得耐都係會變黃(救命)。

 

4. 寫紀念冊/同學錄

「留底」難度:****

你要有一個同學錄制作委員會,入面又有人事鬥爭又有金錢糾紛(煩),整嘅時候叫全班幾個同學每人寫幾十字好似問佢借百幾萬買樓咁難(係呀,果時百幾萬就買到樓),整完拎去印又唔識對色版又唔識釘裝最後本野出黎甩皮甩骨(無得救),拎佢返屋企之後攝埋一二邊最後跟本搵唔返佢出黎(慘)。

 

5. 自己記住

「留底」難度:**

自問有驚人記憶力,過目不忘,要記得一定會記得,但最後都係會有D野唔記得(咁就無嫁啦),唔想記得嘅成日諗起,想記得嘅成日諗唔起(個腦容量留返晒比D賤人)。

 

但自從二十年前,互聯網出現之後,我地如獲至寶,之前一直難於登天嘅「留底」,今日突然間簡簡單單就做到。我地梗係爽啦,瘋狂寫ICQ Info,瘋狂寫Xanga,瘋狂Facebook打卡。

但對於00年後出世嘅細路黎講呢?「留底」係理所當然嘅,係網上面做過嘅任何野,無論你想唔想留低,只要有心,一定搵得返出黎。

佢地根本就未體會過我地以前果種「留底」嘅艱難,由佢地出世開始,所有野會留底就係天經地義嘅,就好似我地根本唔會明白未有飛機之前D人係點去歐美旅行咁,所以佢地對於「留底」根本唔會有任何感情,最好乜都唔好記低,好煩。

即係話,「而家老野先用Facebook嫁啦!我剩係用IG Story同Snapchat!」呢件事本身,就係有經歷同時代嘅背景係度,無論你裝幾多個新嘅Social軟件,條洪溝都唔會消失。

所以,係老就認啦大家!

 

 

作者:Katarina Prestor

Katarina Prestor
好想寫小說,但寫親都無人睇。當然我唔覺得係自己問題。因為呢個世界上,當問題出現既時候,永遠都係人地有問題。https://www.facebook.com/katarinaprestor

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 177946
Date: 2018-03-19 05:07:12
Generated at: 2020-01-20 19:50:49
Permalink: https://www.vjmedia.com.hk/articles/2018/03/19/177946/而家老野先用facebook嫁啦!我剩係用ig-story同snapchat!