唔係個個都啱揸車。

 

最近香港實在太多意外:一個人母比人截斷雙腳、有人車死啊婆不顧而去、馬場巴士攪炒死人,我覺得車其實比槍更危險。而家要考車唔係話難,筆試,路試,合格哂你就有個車牌。啱嘅,筆路試係測試到一個人識唔識去揸部車,但係咪令架車識前後行就做得車主?我唔係咁諗。

揸住架車嘅人好大責任,除咗車上嘅人條命喺佢手上,通街嘅人都係一樣。但好多人視人命如無物,邊揸車邊用手拎住電話傾已經係等閒,酒駕、藥駕、未瞓醒就揸車通通都係害死人嘅行為。當然有人會話未出事前冇人知司機會咁做,但香港嘅法例對揸車整傷,甚至害死人嘅罰則係輕得可怕,當你害死一個人,你只需要罰啲錢,坐兩三年就可以出嚟做一條好漢。唔單止啊,你仲可以繼續做一個司機,繼續揸住你曾經殺過人嘅工具穿梭香港大街小巷。

點解揸車揸到可以危害他人嘅車主仲有資格坐上駕駛座?性罪犯都會有案底,所有人申請部份工作前都要去性罪行定罪紀錄查核機制證明自己冇前科先有入職機會啦,但點解一個揸車紀錄花哂嘅人都可以咁易續牌?車話就話係交通工具,但喺班人手上就會變成路邊炸彈、殺人武器、危害香港安全嘅工具。香港管槍管得咁嚴都係想安全啲,咁點解對車主嘅管制同罰則又咁鬆手?

牌夠十八歲就可以考,但車真係唔係個個都可以揸。特別係嗰啲剎車變踩油、出閘撞爛閘、卡死喺彎位嘅司機,麻煩你都係乖乖地坐返乘客位,確保香港人嘅安全。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 178019
Date: 2018-03-20 23:49:47
Generated at: 2022-12-09 18:25:46
Permalink: https://www.vjmedia.com.hk/articles/2018/03/20/178019/唔係個個都啱揸車。