將喜好外判既時代

 

何文田特級廚師👨🏻‍🍳

Posted by Kian Lee on 2018年2月28日

 

我第一次想寫呢個主題,係因為大概一年前同朋友講開覺得一蘭好好食,佢既回應係覺得我有無搞錯,一蘭都好食?啲人講一蘭好咸,個麵又細,又乜乜乜乜咁。到今次真係落筆,係因為見到程班長牛肉麵最近面對既一場食評風波。我認為都係個好機會討論一下呢樣野。

咩叫將喜好外判?就係當你喜愛既事物,包括食物、攝影景點、酒店、甚至任何事物,都唔係建基於自己既感覺,而係來自其他人、媒體、評分網站等等。人會因為見到評分高、多人讚,就會先入為主認為一樣野係好。就算自己親身體驗之後,覺得只係一般貨式無乜特別,都會傾向附和主流加入讚許表示享受而忽略自己既感受。

當年未有互聯網,人類接收資訊會靠電視,雜誌之類。當年既人同今日都有啲似,因為佢地都會跟啲媒體或者食家既訪問推介去搵好嘢食。但某程度上,大家都有共識知道點解某啲餐廳會被人宣傳,某啲唔會,背後係一盤生意。

但當互聯網普及之後,人類居然以為網上推介既資訊都係真心,無收錢:食評係真,佢既愛惡可以反映到食物真正既質素。評分網站既統計係真,正評多分數高既餐廳或酒店真係咁好服務。KOL講既嘢係真,真係有咁多follower PM佢問佢用咩護膚品先可以咁皮光肉滑,而佢又係真心推介。

最大問題都唔係信錯左佢地,一間餐廳難食最多中一次伏,一間酒店有問題都係伏幾日,最大問題係個風氣,係人類唔再信自己既感覺,唔敢相信自己既喜好。當我地覺得一樣食物好食,但網上風評不佳,你唔好意思同人講自己其實鍾意,因為你怕其他人會覺得你唔識食。同朋友出街,明明自己有食開既餐廳值得推介,但因為怕朋友唔喜歡,走去上網搵啲正評多,新咩期或者邊個邊個KOL介紹過既所謂出名餐廳,大家半伏半捱咁食完一餐,影張相又話好好食好享受去左邊間邊間食好西咁。又或者去咩隱世景點影相,因為人人讚好你又去影埋一份,係就係得到一啲like,但咁又何必呢?

最後,每件事都被網上既所謂好評牽住走。

程班長揭露左openrice 收錢先有好評既潛規則,因為佢唔肯畀錢呢類食評系統而遭受攻擊,會有虛假食評出現,會有一定數量既惡意負評。見微知著,成個網站既正負評已經唔再可以作準。同樣,今次被人貶低去捧同業既事件中,我地都可以想像到個食評界到底背後係發生咩事。

我地都應該重新相信自己既感覺,唔好對嗰啲資訊照單全收。食完覺得係好味既,唔好畀其他人既意見左右,相信自己既喜好,相信自己既品味。

同時亦應該尊重其他人既喜好,人地鍾意或者唔鍾意一樣嘢,係人地既感覺同選擇,無需要貶抑其他人既喜好,尤其自己都只係道聽途說睇過一兩篇報導個啲就更加無謂。如果自己真係有咩好嘢想介紹人既,咪當係多個資訊畀人參考下,又唔係同人鬥啲咩。

總結一句啦,將喜好外判既人真係好可憐,飲飲食食玩足十九幾年都建立唔到自己。

 

p.s. 唔係反對人賣廣告,我係反對網民盲信網上推介既資訊多啲。明星又好KOL 又好唔賣廣告你養佢咩。

 

作者:木人里

一個心地善良既仆街。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 178157
Date: 2018-03-24 05:07:55
Generated at: 2020-10-31 18:19:52
Permalink: https://www.vjmedia.com.hk/articles/2018/03/24/178157/將喜好外判既時代