【真人真事】溝女前必須學習社交(一)——我要早日出POOL 威俾啲港女睇

 

上個月,中學同學洪大偉WhatsApp我,約我出嚟食飯,我十分意外。事關我地並不熟稔,只係上堂互相恥笑下,畢業會合照嘅同學,未試過兩個人出嚟食飯。出於好奇,加上中學情誼,我欣然應約。

「喂!Fayly,好耐冇見啦!」觀塘站A出口,等咗40分鐘,阿偉終於出現。我地去Pizza Express食下午茶,阿偉一搵到位就坐入去,拎起餐牌揀嘢食。

「唔該,要呢個同呢個呀。」頂,我咩都未揀,佢已經叫咗侍應過嚟。

「頂你,我都未揀!」我打趣地說,然後極速落Order。

「屌,睇你個格都食慣呢啲港女餐廳㗎啦,一定唔使諗都揀到。」阿偉唔耐煩咁講。

「唉好啦好啦,唔講呢啲啦,咁耐冇見,你近排點呀?」

「幾好呀,而家喺律師樓返工,近排有個大客想搵我地搞上市。唉,勁忙!」聽到佢咁講,我有啲愕然,因為我記得阿偉未有升上大學,而係讀咗兩年高級文憑,佢係點入呢一行,被大客找上門搞上市㗎呢?

「呃,你係做律師樓嘅⋯⋯」我知咁問有啲唔尊重,好似質疑人地咁,但我都想搞清楚。

「都係文職啦,搞下啲document咁。」我估係秘書。

「Oh I see! 咁你今日搵我做咩先?」我回到正題。

「我想溝女。」

「吓?咁突然嘅?」我真係嚇親。

原來,阿偉二十三年嚟都冇拍過拖,佢之前鍾意咗公司個實習生,但追求失敗。佢覺得「呢條港女」睇唔起佢,所以想搵我介紹啲「唔係港女嘅女」畀佢,早日出pool,威畀「呢條港女」睇。

「嗱,介紹女唔係唔得,但為咗威畀人睇而拍拖,唔係咁好喎。」食物嚟到,我飲咗一啖檸檬茶,再認真咁回答。

「屌,咁我都想有女㗎,你咁多女,唔好咁自私唔益人啦。」佢一邊食飯一邊講。屌⋯⋯我鍾意男人㗎,我收埋啲女做乜。

「好啦好啦,我15號有個party,你都嚟啦,睇下可唔可以識到女。」

「吓?你唔直接約條女出嚟同我食飯?」佢講到噴飯。

「大佬呀,見都未見過就一對一食飯,好odd唧。」

「好囉,你畀啲details我啦。」

「Okay,你到時帶多個男性朋友出席呀。」

「緊係唔得啦,容乜易佢同我爭女㗎!Fayly呀,你想賺錢都唔使咁呀?」

「唔係呀,我係怕你去到淨係識我一個,會唔自在。」

「屌,你放心啦,我識自己去馬㗎啦。」

「呃,好啦。」我話。食完嘢,佢就去廁所。佢返嚟之後,我啱啱埋緊單。

「喂,行得啦?幫我攞個袋出嚟呀。」

「哦,好。」我遞畀佢,我地就分開了。

 

【真人真事】溝女前必須學習社交

(一)——我要早日出POOL 威俾啲港女睇

(二)——點解你畀伏我中?

(三)——我唔要社交!我淨係要性交!

 

作者:霏子

霏子
Fayly .Party Host .不務正業、自甘墮落 .香港大學主修文學及文化研究

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 178578
Date: 2018-04-02 19:37:03
Generated at: 2020-02-21 23:17:11
Permalink: https://www.vjmedia.com.hk/articles/2018/04/02/178578/【真人真事】溝女前必須學習社交(一)-我要