【真人真事】溝女前必須學習社交(二)——Sammi:「點解你畀伏我中?」

 

到咗party當日,阿偉出席了。今次佢只係遲咗20分鐘,不過表現得好唔自在。因為佢自己一個嚟,去到大家已經一堆堆咁玩緊,佢唔敢埋堆,自己一個坐喺道玩手機。我見到咁,過去同佢傾下。

「喂,做咩唔去識下人呀?」

「屌你咩,畀個伏我中。」佢一嚟就屌鳩我。

「吓?咩伏呀?」我百思不解。

「根本啲人就識晒嘅,我一到佢地已經圍威喂咁傾晒計,冇諗過預埋我,你叫我嚟托柒呀?」

「洪生呀,人地本身唔識㗎,佢地係兩三個男人一齊行動,去埋兩三個女人堆,大家一齊玩,多人啲先冇咁尷尬,玩得咁放咋。」

「屌,你又唔講聲,我帶多條仔嚟呀嘛。」

「我上次有叫㗎,你話怕人地同你爭女,你可以自己去馬嘅。」

「咁你冇同我講過,個情況會係咁呀嘛!」屌你⋯⋯

「唉好啦好啦唔好嬲,等下仲有幾個女女會嚟嘅,到時介紹你識!」

好啦,之後我就介紹咗Sammi畀佢,等佢成晚有伴,玩得開心啲。最後佢都攞咗人地電話,叫做有收穫嘅。

三日之後,我寧願佢嗰晚冇嚟過。

「Fayly,點解你畀伏我中?」Sammi打畀我,講返三日前阿偉嘅對白。

「吓?發生咩事呀?阿偉?」我大概估到都係呢條友。

「係呀,你嗰位做接待,但自稱返律師樓見大客嘅friend呀。」我屌⋯⋯呢條友又喺人地面前吹大咗。

「Sorry⋯⋯我知佢吹大咗⋯⋯」我真係十萬個唔好意思。

「唔止呢樣呀!屌!上次食飯呀——」接住落嚟嗰一個鐘,Sammi向我瘋狂屌鳩阿偉,包括佢遲到、冇禮貌、唔請食飯、話佢個look 好柒(註:Sammi乃香港理工大學紡織及製衣學系三年級生)、變態、見人唔受溝就鬧人等等。

「等等——變態?佢份人係衰啲,但未到變態呀?」

「佢係!嗰晚呀——」

屌,嗰晚Sammi返hall,阿偉同佢一齊搭火車去紅磡,搭到九龍塘站,阿偉用佢166cm但77kg嘅身體哄埋去,喺佢耳邊講:「你係咪想落車呀?」

「落咩車?」Sammi呆咗。

「你唔想俾我推車咩?」

「屌!佢癲㗎!佢癲㗎!佢癲㗎仆街!」電話嘅另一邊,Sammi失控地狂吼。

Sor——聽到呢道我真係忍唔住笑咗,點解洪大偉可以咁爆?佢咁叻,做律師樓又見大客喎,佢唔知人地可以告佢性騷擾㗎咩?Anyway,好彩Sammi睇在我份上,冇搞到上差館,嗰晚鳩噏完場算。

「Sammi,對唔住,係我錯。下次party你免費,我額外介紹多兩個真律師你識,希望你原諒我。」

之後,我決定約洪大偉出嚟傾下,真心地話佢知,如果佢要溝女應該點做。

 

【真人真事】溝女前必須學習社交

(一)——我要早日出POOL 威俾啲港女睇

(二)——點解你畀伏我中?

(三)——我唔要社交!我淨係要性交!

 

作者:霏子

霏子
Fayly .Party Host .不務正業、自甘墮落 .香港大學主修文學及文化研究

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 178582
Date: 2018-04-02 19:36:13
Generated at: 2019-06-20 04:15:38
Permalink: https://www.vjmedia.com.hk/articles/2018/04/02/178582/【真人真事】溝女前必須學習社交(二)-sammi: