​​究竟交通公具嘅車資同質素係咪應該成正比?

 

(photo via cc Flickr user torbakhopper)

 

話說前排在的士業界引起一場風波,的士司機高調要求打擊白牌車接客,以保障的士司機的生計。我今日唔同大家討論究竟邊個限制的士發牌搞到市區咁少的士、邊個炒到啲牌貴晒、同埋出嚟遊行慢駛嗰啲司機背後有冇收錢。我反而想探討下究竟作為顧客,我比咗若干數量金錢,係咪應該享有相等或相若的服務質素?如果提供服務者覺得收入少,係咪可以提供較差服務?而最重要,服務質素由邊個話事?

的士拒載、話唔識路、交更、入汽、坐地起價…我諗大部份坐過的士嘅市民都遇過,就算未遇過都應該聽過身邊朋友訴苦。有站出來請示嘅的士司機表示,佢地只係害群之馬,為數最多幾十個;亦有司機話,如果收貴啲,一樣可以比到UXER嘅質素…但事實係邊個平邊個貴,大家心中有數。

但究竟作為職業司機嘅服務態度其實有咩可以做指標?假如話唔識路,我上車教埋你點去你係咪就可以載我去?話交更、入汽唔載,我又無權跟佢尾睇下佢係咪真係去交更或者入油,而拒載同坐地起價就真係責無旁貸喇掛。有啲司機會嫌去到目的地,因為無客要空車出而唔想載,但反觀其實的士入石油汽已經超平,而且就算佢地唔載呢個客,下個客又未必真係搵多好多。仲有一樣好有趣嘅現象,就係佢地永不找錢。本人就試過有一次尾數係一毫,個司機就收埋我嗰一蚊。雖然零錢太散真係好難找,但的士司機的確有責任準備足夠輔幣找比客人,亦應該依據咪錶上價錢收取車資,唔應該take it for granted,遇上客人話要找埋啲尾數時仲好似比人搶錢咁款。所以講到尾都係態度問題,無當自己係一個專業司機,無諗過自己係提供緊服務,只係諗緊客人要比錢。

另一例子係巴士。好似二月馬場巴士嗰單意外,司機正正係無將車上嘅人當係受服務者,更加無視佢地為有血有肉嘅生命,所以便以極差嘅駕駛方式駕駛,最後生成意外。其實巴士重心已經好高,行快少少都會飄,加上香港咁多上落斜同彎路,揸咁大架巴士真係應該要好小心先得,畢竟背負著成車上百位乘客的生命。有啲巴士司機揸到好似跑車咁,起步地板油,埋站就急扭軚急brake,講真,真係會坐到頭暈!

有朋友同我講過「如果想服務好去坐UBXR 啦!」,好似UBEX已經變左服務唔錯嘅代名詞。但諗深一層,巴士司機嘅薪金並唔係由乘客直接支付,而係公司以月薪支付,所以巴士車資理應不會直接影響巴士服務質素。到底係咩因素提供服務嘅司機提供劣等服務?

講到尾,係咪只要車費加倍,司機工資上漲,就能夠解決以上種種矛盾同問題?無人知。喺呢個人工追唔上通漲嘅大時代,車費再加,可能會引發更多其他不滿及矛盾。

 

作者:伯母

已畢業N展仔一名,周身刀無張利

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 178689
Date: 2018-04-05 04:52:02
Generated at: 2020-06-04 01:15:45
Permalink: https://www.vjmedia.com.hk/articles/2018/04/05/178689/​​究竟交通公具嘅車資同質素係咪應該成正比?