如果男朋友為咗你去學煮飯. . . . . .

 

 

正所為江山易改本性難移,要一個男人為咁你去改變真係唔易,但同時都代表會為你改嘅男人真係將你放喺一個好重要嘅位置。除咗努力搵錢同著重事業,如果一個男人願為為咗你而入廚房學住飯,我諗佢已經當你係佢下半世嘅伴。

「喂,過兩日得唔得閒?」有個朋友WhatsApp我。
「得啊,做咩?」
「我上網學咗幾味餸,諗住搵幾個朋友上嚟幫我試味。」
「唔係嘛,你煮飯?」我依個朋友平時煮公仔麵都嫌麻煩,而家居然肯學煮飯,肯定受好大刺激。
「女朋友下個月生日,我諗住自製燭光晚餐嘛。」

能夠令我依個寧願挨餓都唔煮麵嘅朋友花咁多心思,我諗佢終於搵到一棵可以令佢定落嚟嘅樹,而身為朋友當然義無反顧答應啦。約定嘅日子我同兩位朋友一齊上去佢屋企,只見依位朋友著住條圍裙出嚟開門,然後又仆返去個開放式廚房煮試食大餐。用料就夠吸引啦,有鵝肝、牛扒、大蝦沙律、羅宋湯(雖然係罐頭嘅),不過見佢手忙腳亂嘅樣,我地都覺得有啲不妙。

「個鵝肝煎之前要上粉啊喂。」朋友A提佢。
「大蝦灼完浸浸冰水啦,會彈牙啲。」朋友B喺雪櫃拎啲冰出嚟,加凍水幫佢浸埋。
「牛扒落牛油煎,上色靚好多架。」我都加把口,將平時YouTube見到嘅Grodon Ramsay教學講埋出嚟。

就係我地七嘴八舌同佢嘅雞手鴨腳之下,依餐晚飯終於搞掂。雖然佢用嘅料係靚,但落喺一個冇乜煮食經驗嘅人手上都幫唔到幾多:鵝肝煎到得返細細嚿其他變哂油,好彩有A出手即刻拆包意粉恰一恰再用啲油去炒先唔算浪費;個大蝦沙律佢以為用生菜配蝦就OK,都係靠A幫佢整返個牛油果醬加埋落去先見得人;個牛扒就好明顯煎太耐,我諗而家都冇人鍾意食全熟下話。成餐飯最正常就係個湯,照比例溝水再煲,搞掂。

「唉,睇嚟我都係同佢出去食算啦。」
「冇煮開係咁架,試多兩次啦,好快就上手。」A拍拍佢膊頭,煮嘢食A真係我地當中嘅權威。「下個星期啦,我嚟教你煮。」
「真係,咁我靠你救命啦大佬。」

一個月之後,佢Send咗張同女朋友嘅浪漫合照上FB,見到檯面放咗我地試食過嘅嘢,不過今次望落對板好多。後嚟A同返我地講,上去教佢嗰陣唔止好專心咁聽,之後Keep住一有唔明就WhatsApp問佢點做,認真到好似學徒咁。佢女朋友一剎嘅驚喜,條友仔足足用咗一個月去準備。

「我估唔到佢個懶鬼會咁努力,只係為咗餐飯。」A咁樣講。
「愛情嘅魔力。」B感嘆。
「好事嚟嘅,起碼證明今次佢搵到個啱自己嘅。」我咁答。
「咁你呢?幾時到你學煮飯啊,我實教你喎。」A笑笑口咁講。
「咪搞,我肚餓識落街買雲吞麵食,夠架啦。」

我都想搵到個肯為佢煮飯嘅人啊,你估易啊?

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 178698
Date: 2018-04-05 19:54:29
Generated at: 2021-05-13 17:54:58
Permalink: https://www.vjmedia.com.hk/articles/2018/04/05/178698/如果男朋友為咗你去學煮飯