【塔羅個案】已婚中女偷食有婦之夫,仲借錢唔還貼小白臉

文教 / 最新文章綜覽

 

個題目就咁睇,有啲複雜係咪?我自己當時聽呢個 case 都聽到一頭煙。

話說 Miranda 當年因爲有咗 bb ,咁加上環觀身邊姐妹都紛紛出嫁,所以明知當時個男朋友好似唔係好可靠咁,都聽家長建議結咗婚先。

小朋友係仔仔,奶奶嗰邊傳統人,見到家有男丁,對 Miranda 都相當唔錯;不過個老公就真係麻麻地啦,明明打緊份工無咩錢,都好鍾意聲色犬馬嘅生活,30 幾歲人都仲係返屋企伸手拎錢找卡數。

Miranda 望見個老公咁,當然就灰心到加零一啦,加上 Miranda 以前喺姐妹堆中算係最靚嗰個,望見以前自己有少少睇唔起嘅同學,居然嫁得好好又享福,每年同老公拖實手仔去日本歐洲觀光,住私樓有私家車,Miranda 心中不是味兒,更加睇個老公唔順眼,所以當佢知道個老公出面有女人時,就更加嬲。

「係都我搵新對象先啦,點會係佢搵先架?我有咩對佢唔好先?」

Miranda 是要面子的,因為覺得唔開心,佢開始放縱自己識男人,為咗得到男人青睞,佢開始不斷消費置裝,搞到一身卡數。

呢個時候,佢與一個同樣地有婚姻問題嘅男士開始發生感情,男士做生意,家境唔錯,見到 Miranda 唔夠錢洗,本來諗住佢一個女人仔湊住個小朋友,應該好辛苦,咪耐唔耐幫佢找下卡數咁樣。

男人對 Miranda 都認真架,甚至有考慮過為佢離婚,但係 Miranda 唔知係咪見錢開眼,卡數越碌越多,男人有一日見到 Miranda send 過黎總數十幾萬嘅卡數單,居然一句唔該都無,男人忍唔住發咗 Miranda 脾氣。

Miranda 覺得男人好小器,「佢兩層樓揸手呀,十幾萬對佢黎講算得係乜?我都無叫佢離婚,我都好安守本份啦。」

我同 Miranda 講,我話「感情唔係咁計,咁樣難免令人有錯覺認為你貪心的。」我嘗試比較厚道地去表達我嘅想法,哪怕我其實知道 Miranda 口中嘅「開支」,其實只係佢不斷買名貴手袋衣物以及去高檔地方食飯嘅消費。

Miranda 不置可否,「咁我貪靚吖嘛,你都係女人,你唔貪靚咩?」

我笑笑,擺喺我腳邊嘅,係一個購自連鎖店 Crossover Minions 嘅平價背包,裝到電腦同埋水,與 Miranda 口中嘅「貪靚」似乎有點距離。

但係 Miranda 對男人甚為不滿,佢另一邊廂,認識咗朋友嘅弟弟,對方年青力壯,平時鍾意打波做運動咁,Miranda 毫不猶豫,主動 Approach 呢位比自己細好多嘅男仔。

男人比錢 Miranda,而 Miranda 拎錢去同呢位弟弟去玩樂……呢件事,好快就比男人知道咗。男人知道 Miranda 把口話「供小朋友讀書」嘅錢,原來居然係比佢拎咗去貼第二個男仔,當然好嬲,不過,男人同時覺得自己無咩資格講啲咩,始終自己有家室,比唔到咩幸福 Miranda,所以悄然離開。

不過,失去咗男人金錢支持,洗慣錢嘅 Miranda 好快就面對現實:眼前嘅小伙子,只可以彌補自己心靈空虛,但係根本無可能照顧到自己生活。對方年青,有可能一生滿足於與自己這種關係裡嗎?佢有可能娶自己嗎?佢會想一黎就有個仔嗎?對方屋企呢?自己會過到門咩?

Miranda 望住又一張十幾萬嘅卡數,開始茫然;而呢個時候,Miranda 老公,都正式向 Miranda 提出離婚了。

Miranda 黎問我應該點做。點樣可以有錢。點樣可以搵到新對象。

我都好老實咁同佢講,與其執著於男人,不如考慮下自己嘅消費模式,「小朋友供書教學都要錢的。」因為面子同自己銀包賭氣,是最可憐的行為,因為社會好現實,唔會有人體諒你「點解會買咁多嘢呀?你唔開心呀?」咁樣的,傻的嗎?銀行見到你欠錢就會追架啦。

我唔識評論 Miranda 嘅個案,但係,佢似乎唔係好認同我講嘅嘢;老老實實,我唔擔心佢吖,我擔心佢個仔仔,而家仲咁細個,之後唔知點算呢?

 

【塔羅牌個案分享】

後生女教友畀已婚傳教士搞大個肚唔認數

「我想分手,佢話唔好,不如去開房;然後我覺得佢仲愛我」

你話想生仔我咪唔避孕囉,我家下有咗你就叫我落?

名校老師婚外情的故事

四年入面,我睇住個客拍拖、結婚再離婚。

中環高薪厚職女強人求愛篇:我一覽眾山小,但係⋯⋯

有種客人的確可以活得 Single and Fabulous

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。