女性主義，由個名開始就唔係平權，而係特權

近排女性主義又引起咗啲討論，我就乘機講兩句。

我一直都唔明「女性主義」呢個名點解係代表平等。
當爭取種族平權嘅時候，我哋唔會因為黑人處於劣勢就高呼「黑人主義」㗎嘛，因為咁樣似乎係代表主張黑人比其他種族優越，暗示以另一個霸權取代現有嘅霸權嘛；
當爭取性傾向平權嘅時候，都唔會高呼「同性戀主義」㗎嘛，同樣係分化，同原本平等嘅理念背道而馳；
咁點解爭取性別平權嘅時候，「女性主義」就變成性別平等主義呢？

根本由個名開始就唔係平權，而係特權。

女性主義喺第一世界發展到今時今日，我相信大部分人對於呢四個字都已經有既定嘅印象，換言之女性主義已經變成一個標籤。
只要我講一句「我係女性主義者」，大家就會「哦～～」，然後用你對呢個標籤嘅印象去定義我，而你係唔需要親身認識我、同我交流過，甚至唔需要睇過我寫嘅任何嘢，我喺你心目中已經成為一個〔形容詞A〕同〔形容詞B〕甚至〔形容詞C〕嘅人。

而問題就係，人人對於女性主義嘅理解都唔同，即使女性主義者之間都有唔同嘅主張，更何況整個社會嘅人。
一百個人對女性主義有一百個唔同嘅印象，包括我自己，如果我好簡單咁講一句「我係女性主義者」，我就有一百個唔同嘅形象，而且好大機會都同真實嘅我無關。

即使我唔計較女性主義個名偏頗，睇返佢個餡係主張性別平等嘅。但無可否認有害群之馬真係以女權嘅名義爭取特權，而且講緊嗰啲馬嘅數量已經多到可以另起山頭，著書立說整套「新．女性主義」出嚟㗎喇。

坦白講，今時今日女權個朵已經好臭，換言之，好唔入屋。而我眼見嘅來來去去都係同一班人喺度圍爐，用啲外人聽落好高深嘅學術名詞交換諗法，抨擊資本主義物化女性正正中咗男性凝視嘅圈套，為實踐女性嘅主體性及身份認同，改以客體化男性將陰性著迷變成新趨勢以對抗父權壓迫文化⋯⋯似乎圍圍下爐就可以燒曬啲春袋象徵，達成解放女性嘅同時解放男性嘅願景。

既然要推動某種主張，就要推廣去啲唔認識，甚至唔認同呢個主張嘅人，咁梗係用啲佢哋聽得明又聽得入耳嘅方法啦。
「要為女權正名／去污名化」？既然目標係實現性別平權，用唔用「女性主義」嘅名義其實唔係必然。

而我覺得個名係重要嘅，除咗因為女權個朵臭咗之外，亦好似上次所講，個名能唔能夠客觀地反映其主張嘅本質，其實都好影響推廣成效。

好嗱，講到尾，係唔係要自稱「XX主義者」先等於支持嗰個主張呢？

例如我需唔需要自稱「種族平等主義者」，先等於我支持世界大同；
需唔需要自稱「性別平等主義者」，先等於我支持多元成家；
需唔需要自稱「佛系戀愛主義者」，先等於不主動、不抗拒同不負責任；
需唔需要自稱「去標籤主義者」，先代表我唔想畀標籤定義自己呢？

當我哋拋棄「」入面呢啲標籤，唔通就會由一個立體嘅人變成一具空洞嘅軀體咩——
標籤只係方便世人好快咁樣定義一個唔識嘅人咋。

再講，有幾多自稱「XX主義者」嘅人真係對個XX主義有好透徹嘅認識，包括一班「女性主義者」？
我冇，所以我唔敢輕易為自己嘅價值觀歸類，亦唔需要呢啲流行標籤所帶嚟嘅光環。

另，「文青」係另一個好臭嘅標籤，今時今日文青已經變成一種生活風格同態度，同興趣冇直接關係，同能力更加無關。
我唔鍾意小確幸，唔睇村上春樹，冇資格做文青，bye。

作者：一百八十呎

既然有人表演瞓劏房，全天候住劏房的都是行為藝術家。

閱讀後覺得好，請多多讚好及分享～：）