有你個膊頭,已經好夠。

 

 

曾幾何時,我好鐘意同女朋友講「有咩事我同你一齊頂」,然後拍一拍自己膊頭。個個都話做男人最緊要有膊頭,我一直都按住依條金科玉律去做,亦都成為大家眼中一個夠哂安全感嘅男人。

只係再硬淨嘅人都有頂唔順嘅一日,而我喺嗰陣都明白點解膊頭咁重要。

「不如食完飯就返去,唔好睇戲啦。」我女朋友同我講。
「點解?你唔係好想睇部戲咩?」我遊緊魂嘅精神比佢把聲搵返上身。
「你睇你吖,個樣殘咗好多啦,係咪返工做嘢好攰啊。」
「冇事喎,係多嘢做咗少少,不過濕碎啦。」

做男人就係死要面,就算幾攰都唔可以投降。而且最近忙住做嘢已經陪小咗女朋友,難得有個夜晚準時收工可以同佢睇戲,我點都要盡下做男朋友嘅責任。食完個飯我同佢去郎豪坊嘅戲院睇戲,雖然係攰,但好彩部戲冇乜冷場,我總算可以清醒咁睇足全場。只係精神唔夠反應慢咗,有幾個笑位Load唔切,個個都笑但我就冇反應咁。完場之後我同女朋友離開個商場,係條街慢慢街一陣先再搭的士送佢返去,依個係我地嘅習慣。

「部戲唔啱你睇?見你冇乜笑到。」
「唔係啊,係反應慢咗啲Load唔到。」講完我打咗個喊露。
「話咗你攰架啦,又唔認。」
「難得有時間同你拍拖,我唔會浪費。」我攬住咗佢,以一個小小大男人嘅態度講依句嘢,浪漫得嚟不失霸氣。
「算你有我心。」佢笑到見牙唔見眼。「好啦,快啲返去瞓。」
「我送埋你返去先。」未等佢出聲,我就截咗架的士。

上到車,講咗女朋友屋企地址,司機就好專心揸佢嘅車,而我女朋友就睇佢嘅Facebook。喺一個咁靜咁舒服嘅環境,睡意真係話嚟就嚟,好快我就已經半夢半醒咁,連的士去到邊都唔知。就喺依個時候,我女朋友一手將我個頭拉過去佢膊頭,然後同我講咗一句「今次等我借個膊頭比你啦」。當下我突然明白到安全感係咩一回事,亦都明白點解女士們咁在意安全感:真係好Warm,好令人放心。我瞓喺佢膊頭上面,好快就瞓著咗,而喺失去意識之前,我Feel到自己流咗滴眼流。

咁好嘅女朋友,真係幾生修到。

的士到咗目的地,女朋友好溫柔咁拍醒我。當我一望出窗口,發現的士居然去到我樓下。就喺我未搞清楚咩事嘅時候,女朋友就話見我咁攰都唔放心我自己返嚟,所以決定陪我返屋企,亦已經同屋企人講咗今晚會喺我度過夜。依個時候我只係識攬住佢,唔理的士司機嘅無奈,喊到不似人形。

其實不論男女,大家都想搵到一個咁為自己著想嘅人,而當你發現依個人就係你身邊,其實人生你已經別無所求。雖然當下我喊到出唔到聲,但我嗰陣其實好想同女朋友講:有你個膊頭我已經覺得好足夠。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 179305
Date: 2018-04-20 01:00:17
Generated at: 2021-05-13 18:10:10
Permalink: https://www.vjmedia.com.hk/articles/2018/04/20/179305/有你個膊頭,已經好夠。