我自己身為Lesbian,都覺得我哋有時未必值得俾社會接納尊重

 

 

我呢個標題都幾撚大鑊下,所以屌我之前,俾個機會講一講。

我自己幾鐘意黃秋生,覺得佢講野一針見血又到位。
佢喺黑紙訪問入面講過一句說話,我本人好鐘意:『我最憎人唔尊重人,但我最鐘意唔尊重啲唔尊重人嘅人。』

我自己踏入呢個圈子三年矣。呢三年,先唔講我地香港社會大氛圍底下,對LGBT接受程度有冇咩前進,就講我地自己Lesbian圈對我地『自己人』嘅包容力同接受可以有幾低。

我大概用一句總合到我地圈子嘅生態,
『我地自己都鐘意歧視返自己人,而且係可以十分之理直氣壯。』

我地大部分lesbian,都會有download 一個App——Butterfly,同一般交友app 有少少出入,有自己嘅Profile 之外,Users 可以開Post,上至人生哲學,下至柯屎柯唔出都會有人開Post 講。
我自己通常夜晚係床冇野做,就會碌一碌Butterfly 先訓。

近日見到一個Post,令我都幾嬲,亦覺得我地圈子被社會某部分人歧視、攻擊,都係可以理解,臭口講句就係『抵』。

Post 入面嘅樓主,可以由佢張相睇得出係一個女性打扮嘅男人,而佢自己都表示,計劃緊去進行變性,讓自己可以於心理及生理層面都成為一個女人。
見到個Post,我第一下覺得佢係勇敢嘅,而且交友態度好真誠,我欣賞嘅。
點知,樓下就有一班lesbian對佢進行人身攻擊,例如:『你男扮女就走啦,你唔係女人囉好冇!』
嘩見到啲comment,我真係屌咗聲。
講得呢種說話嘅圈內人,你識唔識咩叫包容,咩叫尊重不同性傾向人士。LGBT,入面嘅T就係Transgender。

我地Lesbian 成日抱怨,覺得社會唔接受我地呢班小眾。
但我好老實咁講,如果你唔識大愛包容尊重同自己唔同嘅人,同時你都唔值得獲得社會其他人士對你嘅愛同尊重。

呢個Post 只不過係冰山一角,用咗個App 三年,耐唔耐就會見到又有人玩圈子批鬥。
又有啲人鐘意批鬥TB,笑尻佢地係男人婆扮男人,唔夠feminine,係到同班Pure 爭囡。
有時見到不禁會想,明明我地都係被現實社會壓榨,歧視嘅一群,點解我地唔鐘意被人咁對待而我地又要咁去對待人。

近日,小妹又番睇哥哥有份做嘅《春光乍泄》,睇完有啲唏虛,心涼咗一涼。我發覺唔單指香港社會,定女同志圈,同樣都係行近回頭路。

廿年前,香港可以有《春光乍泄》,但宜家睇TVB,男同志嘅形象竟然會係停留係娘娘腔,嗲聲嗲氣呢種,誇張且無知嘅演繹手法。
我覺得呢個現象某程度係反映香港喺同志議題上倒退緊。

尻噏咗好多野,想講嘅係,香港社會中同志議題上嘅退步,唔能夠完成怪我地個濕鳩政府,唔能夠怪曬班乜都唔知就屌嘅直佬直女,我地要求社會,要求別人對我地尊重,了解我地。

我地自己應該先好好做好本分,最基本係唔好傷害自己人。
唔係嘅話,廿年三十年後,係自己嘅屋企——香港,好好咁同另一半結婚,得到啲咩社會嘅接納同尊重,呢啲希望仍然係好撚奢侈。

 

 

作者:阿支阿佐摩洛哥

阿支阿佐摩洛哥
一個麥記招牌跌落嚟都壓死幾件、 普通到唔普通嘅濕鳩港女。 於情路上拐下拐下、浮浮沉沉,日頭就聽王菲,夜晚就聽孫燕姿。 因為太鍾意阿支阿左,所以決定喺呢個空間一洩口頭之慾,同大家鳩噏當秘笈。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 179319
Date: 2018-04-20 05:18:23
Generated at: 2019-05-22 18:13:00
Permalink: https://www.vjmedia.com.hk/articles/2018/04/20/179319/我自己身為lesbian,都覺得我哋有時未必值得俾社會接