求好公司不如求好同事

 

 

個個都想搵間好公司,最好薪高糧準假期多。但十個老闆九個閪,唔好話搵一間將員工放首位嘅公司咁夢幻啦,有公司肯唔揸乾揸淨你,唔洗你點OT的話已經夠你劏雞還神。老闆都未必要日日對住,但見同事嘅時間分分鐘比見你屋企人仲多,所以好同事比好老闆真係緊要好多,依個係我親身感受。老闆係出糧比你嘅人,佢就算再閪你都仲有一個忍嘅理由;但同事之間大家都係求份糧求兩餐,偏偏有人好鍾意喺公司搞風搞雨,或者係將要做嘅嘢比哂其他人做。如果每日返工你都要鬥智鬥力去防止有同事捅你一刀、點樣拒絕唔屬於你嘅工作、甚至唔會無啦啦食死貓的話,老闆再好都冇用。

就拎我遇過嘅其中兩個同事做例子。有一個長期話自己好忙好多嘢做,次數係密到你每五分鐘就會聽到一次。佢係咪真係咁忙呢?佢手頭上係有嘢做,但以佢可以睇淘寶揀衫上網睇片同搵朋友密密WhatsApp嘅情況睇嚟,其實佢啲時間都幾鬆動。當然啦,可能係佢唔善於面對壓力,可能同一時間比兩件事佢已經覺得好難應付,當初我都唔介意話幫佢,同佢一齊諗下點做,但佢一方面又話好大壓力唔知點做,另一方面又唔肯聽人意見,要佢改一隻字都要講足五分鐘,之後我都決定唔理佢,繼續忍受佢不斷話自己好攰好忙好大壓力——我成日覺得如果佢肯將講依啲嘢嘅時間用嚟做手頭上嘅工作,應該半日就做得完。

另一個仲利害,利用手頭上一兩份嘢去做理由推哂其它工作比人已經係等閒,手頭上啲嘢做錯哂,留比同事們一堆爛灘子,最後搞到好多事都要我地幫手處理,結果佢大把時間睇波鞋同意甲精華。我都唔知點解佢到而家都未比人炒,傳聞實在係太多太多,由佢識喺老闆面前扮嘢,成日幫手訂檯食飯等我都聽過,而最令我難忘嘅係有次佢約咗老闆返嚟開會,事前我地個個問佢有咩要準備佢都話聽老闆講嘢就得,點知一開會佢就拎隻手指想開個Powerpoint出嚟話依個係佢諗嘅年度計劃(然後發現Mac機開唔到搵人幫手),最後當然又係講一堆屎出嚟比我地同老闆否決哂,仲比個同事當面問佢點解要老點我地。邀功不成反被問嘅佢當然係急急腳拉個同事走話出去先講,免得喺老闆面前被踢爆。

啲咁嘅同事一個都嫌多,但間間公司總有一兩個。慶幸到目前為止我返過嘅公司都冇出現過第三個,當然都希望永遠唔好發生。閪人真無好難頂的。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 179388
Date: 2018-04-22 20:20:31
Generated at: 2021-05-13 17:41:39
Permalink: https://www.vjmedia.com.hk/articles/2018/04/22/179388/求好公司不如求好同事