【塔羅個案】個客分手兩個月後,驚覺男友小三已懷孕半年

文教 / 最新文章綜覽

 

Susan 黎搵過我幾次,每次都係問工作、投資方面嘅問題,至於感情方面,佢曾經笑笑口咁同我講,「我同男朋友同居,生活好穩定,所以我好信任佢架。」

好多未黎過搵我嘅朋友,可能覺得對我黎講,「梗係個客問得越多越好啦!」,其實答案是 No 的,一來我習慣會幫客人問一條最「精簡而直接」嘅問題(因為時間有限 orz),二來,當客人抱著疑問黎搵我,我嘅目的就係要幫你解決呢啲疑問架啦!如果我比你亂咁問、問到個人亂哂、甚至根本唔記得自己問過啲乜咁,咁又何必呢~

咁 Susan 既然話自己感情上唔需要問,我當然為佢開心,點知開心唔夠一陣,當我隔一排再見 Susan 嘅時候,佢已經同男朋友分咗手了。

我有少少愕然,因為 Susan 表情好平靜,不慍不火;但同時我亦清楚記得,佢以前講起男朋友時,臉上滿滿都是信心和溫柔。

「簡單黎講,佢出軌、佢偷食、佢出面有第二個。」Susan 一路食住買上黎同我分享嘅蛋糕,一路將自己呢幾個月經歷嘅事講比我聽,語氣平靜到好似事不關己咁。

「嗯……佢係一時意亂情迷,定係已經有穩定發展對象?」我小心翼翼地問,因為我唔知道 Susan 係「真係無嘢」定係「故作平靜」。

不過,當我聽完 Susan 嘅故事之後,我苦笑,唔怪得佢已經唔識嬲、唔識喊,因為件事都真係幾荒謬。唔知大家有無試過經歷一啲事情,荒謬到了一個點,或者除咗冷笑,就真係唔識比其他反應了。

Susan 半年前同男朋友同居,間屋係 Susan 屋企人本來放租的,後來用一個廉宜嘅價錢租比 Susan 同男朋友,諗住幫輕下年輕人經濟負擔;不過,Susan 份工係輪班制的,有時夜晚唔會喺屋企瞓,基本上只有星期六日,先會係喺屋企對住男朋友。

而呢位男士,原本喺一間中小企業工作,不過因為公司比人收購,內部重組,男朋友覺得新職位好廢,於是辭咗職無做,但又怕比女朋友睇唔起,於是就扮自己有返工,但係其實就成日去咗啲 Cafe 度坐同打機渡日。

因為悶,又未搵到工,呢位男士經由交友 app 識咗個女仔,原本人地係 PTGF,點知一玩就上癮,仲搞大埋對方個肚。

男士同 Susan 喺兩個月前講分手,原因係「同居之後覺得大家唔夾」,Susan 當時死求爛求,甚至同公司講話肯減人工轉去一個唔駛輪班嘅部門,諗住陪返多啲另一半。當然,男士拍拍屎忽就走咗,頭也不回,Susan 原本好擔心對方,「佢同屋企關係唔好,佢一走,我唔知佢可以住邊。」

「當然,我後來先知我擔心都多餘,佢去咗同個新女一齊住。」Susan 嘆咗一口氣,「我之所以會知,係因為個女仔打比我,佢話佢已經有咗 BB,6 個月架啦,叫我千祈唔好搞咁多嘢、諗住搶返個男朋友。」

「你乜都無做,佢做咩話你想搶返個男朋友?」我好驚訝之餘,仲有少少嬲。

「個男人喺人地面前充大頭鬼,到而家無錢,佢居然老屈係我生活唔掂,要佢接濟,搞到佢無錢。」Susan 講到呢度自己都笑咗出聲,「你明唔明,件事發展到呢一步,我真係唔嬲,我嬲唔落,亦無必要嬲,因為件事真係太核突了。」

我嘆咗一口氣。呢種故事發展,其實我都聽過好多次類似嘅個案,但係每聽一次,我都係不禁嘆氣,然後個心問一句「呢個世界發生咩事」。

Susan 算冷靜算 Tough,佢黎搵我,並唔係問感情事,而係幫屋企人問投資方向而已,「事已至此,仲花錢問佢嘅問題咩!我黎問下而家住緊個單位,繼續放租好定係賣好架咋!」

啱呀。對於唔珍惜自己嘅人,花幾多錢問問題,佢都唔會珍惜返你的;抽身是難,但沉淪更痛,慶幸見到 Susan 及早清醒,在此希望你生活過得更好:)

 

【塔羅牌個案分享】

後生女教友畀已婚傳教士搞大個肚唔認數
「我想分手,佢話唔好,不如去開房;然後我覺得佢仲愛我」
你話想生仔我咪唔避孕囉,我家下有咗你就叫我落?
名校老師婚外情的故事
四年入面,我睇住個客拍拖、結婚再離婚。
中環高薪厚職女強人求愛篇:我一覽眾山小,但係⋯⋯
有種客人的確可以活得 Single and Fabulous
女人就黎三十歲仲係 A0 係咪就叫有問題?

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

  • 我同事笑我唔識用touchpad….. by 緋色雪夜
    「其實你係咪唔識用touchpad?好好用喎~」同事妹妹拎住部macbook坐埋嚟,「不如我教你用touchpad呀。」…
  • 【玩物花絮】正過官方新屋 LEGO集會廣場改建歐陸Jazz Cafe by 阿九
    近期真係冇乜高質素嘅大屋 AMOC 出現喺市面,而官方公佈下年 1 月 3 號正式開賣嘅 10270 Book […]…
  • 你會同另一半講你嘅性史嗎? by 我從不穿睡裙
    講曬出黎,對方真係完全無野,完全接受倒,覺得呢D過去左既野係唔重要的話,我真係恭喜你。但萬一,對方聽完之後唔係咁既話,你要小心了。…
  • 恭喜何君堯終於揾到接班人啦! by 達時製作 (On Time Production)
    何妖能夠孤身(只限香港啫,中國就實有人撐佢嘅)走到今日呢步,殊不簡單。而佢嘅「成功」,亦都感染咗一位等左上位好耐嘅仁兄。佢就係...…
  • How dare you? Because I can. by 諱文
    點都好,首先要恭喜一下Greta本人成為最年輕既年度風雲人物,16之齡得到呢個殊榮證明佢的確厲害;希望佢之後可以真真正正為環境出一分力。點解我會咁講?先唔講佢有班強勁既PR同遊說集團係佢背後撐腰,花少少時間search吓佢背景你就會知得一清…
  • 校服 by 微言
    我對那條藍色裙的認識就只是藍色,及裙,能有什麼改變?可以改動?當然,我相信女生們早已自我分了三、四十派,互相尊重卻各不相讓,守護着自己的傲嬌。老實說,我代表男生們能將她們分為兩派,「短裙」及「一般」兩派。…
歡迎讚好我們的facebook page,免費資訊源源送上。

文章資訊

ID: 179531
Date: 2018-04-26 06:54:05
Generated at: 2019-12-15 11:30:56
Permalink: https://www.vjmedia.com.hk/articles/2018/04/26/179531/【塔羅個案】個客分手兩個月後,驚覺男友小三已